在夢境與少女相遇後有壞人殺死了我: 最終章(4)

登上巴士，我依舊坐在上層。
 
我前面的坐位，坐著一對年輕情侶，使我想像如果妳也在的話，我們會不會像前面那對情侶一樣。
 
有話就談話，無話就各自各玩手機，累了就依在一起睡覺。
 
看著窗外的街道，看著林立的廣告牌，每天都很多人途經這裡，每天都有人看過廣告牌。
 
如果，我登一個廣告，去找妳。妳會不會看到呢？
 


「尋人啟事。」我右邊的一位叔叔正在看報紙。
 
在街上貼尋人啟事？
 
登報紙尋人？
 
電話震震震，聆聲響響響。
 
——是阿力的來電。
 


「喂？」我滄桑地說。
 
「屌你唔睇訊息。」阿力一句屌來。
 
「頭先趕住出門，有咩……你依加講啦。」我沒精打彩。
 
「點啊，你話本筆記有用？即係，你能夠憑潛意識去影響夢境？」阿力緊張地問。
 
「係啊，另外，我係隻紅雞蛋上面寫字，結果夢入面既我，成身都係文字紋身。」我說。
 


「嘩，咁好玩？」
 
「唔好玩囉。」我扁嘴欲哭，「我好掛住藍藍啊，但我冇晒紅雞蛋喇。」
 
「琴日爛左嗰隻呢？你唔係話留起左咩？有冇辦法整返好啊？」他問。
 
「仲係雪櫃，用碗、保鮮紙包住。」我說。
 
他沉靜半晌，然後「嗯……」了一聲。
 
「邊有可能整返好……就算整返好，都冇用啦。即使可以長長久久，白頭到老，結果第二日我一樣會係朝早醒返。」
 
「就算今晚有得再見佢一次，聽日一樣要面對現實。」我說出了比較理智的話。
 
「咁你諗住點啊？放棄嗱？」阿力問。


 
「我最想，係可以係現實搵到佢，但我……」說著又很想哭，「我一啲線索都冇。」
 
「我想試下登尋人啟事之類，搏一搏。」我垂頭說。
 
「咩年代，你醒返未啊？哩度係21世紀啊，互聯網發達既年代啊。」阿力說，「屌你鬧少陣都唔得。」
 
「咁你話……我可以點喇？」我無助地問。
 
「你唔借用下網上人肉搜尋、起底小組既力量，都借用下Facebook大神既力量丫。」
 
「比起你傻傻仔仔晒錢去登廣告，或者返工嗰時同圍搵人……」他激氣地說，「不如你寫低要搵既人，寫低佢既特徵，寫低你地既共同經歷，然後係網上面發佈，睇下有冇人應機仲好啦。」
 
「總之，你上討論區開個post將經歷打晒出黎又好，用facebook廣傳又好，總之咩方法都用晒佢，可能好快就會有好消息。」
 


「係咪……真架？」我問。
 
「但係你做戇鳩野之前，嗱嗱聲將你琴晚個夢講出黎先，我照舊幫你分析下！」阿力說，隔著電話的他，好像托了一下眼鏡，「然後，今晚照舊係Sweet Cafe，開第二次戰略會議。」
 
「我會叫定野飲等你。」他再補充。
 
「哦……」我答應了他，「咁我講架喇。」
 
「等等，我拎筆同筆記簿先。」他截停了我，靜了數秒，按出筆芯，「OK，你可以講喇。」
 
「琴晚既夢，我係一隻風精靈……」
 
接著，我把昨晚的夢境，以及明天的希望，交托給我的好朋友阿力。