[真人真事]那些年錯過的愛情: 小學10

開始左同啊喬傾計之後，都係講下學校野，大家有咩興趣之類，但係大家都無提啊靜既事。呢幾日大家都有係MSN呢個平台傾計，但係大家係學校仲未見過面。同佢傾左幾日，啊喬就話不如聽日放學約係附近一個公園等，出黎見下面，而大家傾落又幾投契，我同佢傾計有一種同啊君傾計，信任佢既感覺。所以佢一講出黎就答應左佢。 

　　第二日放學之後，我就早到左係個公園到等，等到夠鍾果時，就有一個女仔慢慢行入黎。呢個女仔遠睇高高地，愈行愈近果陣就見到佢有小小肥，塊面有小小紅，好似長期面紅咁。樣貌睇落幾得意，仲同啊靜有得比，同MSN張相有七分相似。當呢個女仔行到我身邊就問我　「你係啊傑？」　原來佢就係啊喬。 

　　當我同一個唔太熟既女仔我就會唔太自然同怕羞，所以我答左係之後，就唔知搵咩話題講好，唯有等佢開口，點知佢一開口就一針見血。 

啊喬：「啊傑，你知唔知啊靜做咩話唔鍾意你？」 

　　我聽到之後都唔知點答，估都估唔到佢第二次同我講野就講啊靜。我自己都唔想再提呢件事，唯有對佢講咩都唔知。 



　　佢好快就講第二句，呢次更加令我啞口無言，真係坐在係到唔識出聲。笑都唔識笑 

啊喬：「其實啊靜仲好中意你」

 　　我坐係到，聽到之後就諗返兩個月前果個場景，果個絕望既「無」字又出現返係我腦入面。 

我：「我唔會再信佢...」　 
啊喬：「不如你聽我講先...」 

　　跟住啊喬就將呢幾個月既事一五一十咁講晒出黎。原來啊靜一直有講我地之間發生既事講比啊喬聽。 



啊喬：「其實啊靜不嬲都對你有好感，但係唔知點開口向你表白，因為佢知道啊君鍾意左你四年，而啊君又係佢好姐妹，啊靜認為唔應該同好姐妹爭。當時啊君向你表白，你無答佢。於是啊靜就問你鍾唔鍾意佢，點知你答左你自己都鍾意佢。佢聽到之後好開心，但諗起啊君鍾意左你四年...佢就...」 

　　聽到呢到，我已經知道，原來啊靜一直都有中意我，原來我地自己對大家既感覺一直都一樣。係呢一刻，先發現自己係幾咁蠢。 

我：「咁佢最近點...」 
啊喬：「都係咁啦，不過我知道，你再唔搵返佢，佢可能會比人搶走架啦。」 
我：「點解？」 
啊喬：「因為最近有人追緊佢，仲要好靚仔架。你仲想搵返人就快啲啦。」 



　　同啊喬傾多陣之後，就各自返左屋企。當晚返到屋企之後，我打開MSN解封返啊君同啊靜，佢地兩個都有上線，但係我又唔知點開口同佢兩個講。想當初我誤會左啊君，仲同佢嗌左交，冷戰左咁耐，自己既無知佔左好大責任。所以我決定要向啊君道歉。 

我：「啊君，我係啊傑。兩個月既事，我要同你講對唔住。聽日可唔可以出黎傾下？」 
啊君：「得」 

　　啊君應左我之後就落左線。我決定聽日向呢個知己道歉。至於啊靜果面，我解封左佢之後，我都無同佢講過野。因為兩個月前搞到咁僵，我都唔知點開口。不過既然佢有一個靚仔追緊佢，一定係朗才女貌，我呢個肥仔又點會比得上... 

　　我唯有對自己講，「我放棄了」 

最怕其實是輸得很遠 
還不知道　 惹人生厭