[真人真事]那些年錯過的愛情: 小學15

＿返到屋企當晚，無論我用電話，電腦都聯絡唔到啊靜。唯一依家知道啊靜既情況，我諗得啊君一個人。 

我：「啊君，啊靜今朝冇事呀？」 
啊君：「應該冇啦，佢叫我遲啲先搵佢。」 

　　我諗啊靜依家一定好唔開心，呢一排佢成日係我面前提起我地三個下年會讀同一間中學，仲話三個以後要友誼永固，估唔到我同到啊君一齊...佢就要自己一個。諗到呢到我隻眼又有淚光。 

啊君：「傑，聽日九點準時拎齊野去中學登記報到呀，遲到就唔收架啦。」 
我：「好啦，聽日八點十係個間中學門口等啦，訓先。」 





　　訓左落床之後，仲係到諗緊啊靜依家點。由本身好早落床訓教，一直諗野諗到好夜先訓得著。 

「咇咇　咇咇」 

「屌...咁快天光架...下..八點半？？ 今次仆街啦！！」 

　　我起身換衫望一望電話。哇，啊君打左幾個電話黎都嘈我唔醒，快啲出門口先得。 

　　於是我就好快咁出左門口，仲破左例人生第一次飛的去學校。八點五十分，當我仲以為趕得切果陣，偏偏全部燈位都係紅燈。我屌，我要做入學手續啊，快啦。 





　　一落車之後，我就沖埋去學校關緊果對大門到。最後，我都係趕唔切入去。咁岩門口有個好似女老師既人，我就諗住叫佢開門比我入。 

我：「唔該Miss，幫我開門得唔得呀？我係新黎既中一學生呀。」 
女老師：「唔好意思呀，我地學校講到明遲到就唔比學生入黎架啦，同學你快去第二間入學啦。」 

　　聽到呢條八婆咁講，心入面已經不知所措，更加唔知應該點做。 

我：「但係我遲左一分鍾昨喎...九點零一分姐...」 
女老師：「請回啦！」 





　　聽到呢條八婆咁講，唯有返去搵屋企人幫手。返到屋企之後，屋企人打左電話去問，但校方話遲到就唔收，叫我地去簡左第二志願既中學面試。 

我媽：「依家去啦，拎齊野就行」 
我：「個間咩學校黎架？」 
我媽：「咪你堂家姐個間囉，行啦，一陣又冇學校收。」 

　　聽到　「咪堂家姐個間囉」　成個人冇晒心情。 

　　估唔到呢一分鍾可以令我由一間普普通通中上既中學變到讀一間全區最差既BAND 3學校。 

　　估唔到呢一分鍾令我由失去啊靜...到依家啊君呢個好朋友都失去埋...

　　到左呢間Band3中學之後，同我之前見到既完全唔同。五月左右我黎呢間學校第一輪面試，男女同學都好有禮貌，品貌端正。依家竟然...男學生頭髮長到仆街，女學生條裙又短到仆街。最令我驚訝係呢班中學生竟然可以染晒頭髮。我屌，咩向左走向右走野學校黎架！ 

「羅子傑　請入面試室」 





　　入到面試室之後，分別有兩個老師接見我，一男一女。男既係一個訓導主任，女既係一個普通老師。由於我真係唔想入呢間中學，所以我決定，一陣佢問我既問題，我一概都要話唔識。 

男老師：「羅同學，我地睇完你張成績表架啦，恭喜你成為我地一份子」 
我：「下...」 
女老師：「係呀，之前你第一輪面試表現良好。依家你肯讀我地中學，我地都決定取錄你！」 

　　聽完呢句，真係完全冇開心既感覺... 

男老師伸隻手出黎：「提提你，聽日我地學校有迎新日，一定要出席呀。歡迎你！」 

　　見佢盛意拳拳，我唯有伸手同佢握手。 

　　於是，我正式成為呢間學校既學生。返到屋企當晚，一開MSN啊君就搵我。 





啊君：「今日唔見你既，去左邊呀？」 

　　於是我就成件事一五一十講晒比啊君聽，啊君知道左件事之後就好似好唔開心。因為個一分鍾，搞到我好內疚。 

啊君：「我地咪以後唔可以日日見...？」 
我：「放學可以出黎架，聽日要返中學啊。我訓先啦。」 
啊君：「我都要返呀，洗唔洗打電話叫你起身？」 
我：「唔洗啦，早抖啦。」 

　　一係張床就諗聽日自己一個咁內向，要點面對呢個陌生又黑暗既環境。諗諗下又諗到啊靜對我既一年之約，遲到一分鍾令我同唔到啊君做同一間既中學同學。愈諗愈多野，愈諗愈訓唔著。轉眼間又天光。 

　　我穿上一身運動服出門口，慢慢行去呢間我唔想入既中學。到左之後，我企左係門口唔敢入去。但當我睇到好多人同我一樣，都係自己一個入去。我就決定要大膽啲。唔可以再做以前膽小內向既羅子傑。 

　　我踏入校門一步，四周打量學校環境... 





　　「中學，我黎啦！」　 

　　一段新既故事...正式開始...