[真人真事]那些年錯過的愛情: 中一０５

開學過左兩個月左右，排球隊已經開始練波準備打學界。排球隊無高中既排球姐姐一齊練習，得大大隻隻既大哥哥教我地打。雖然呢項運動我好快就上左手，但我個心都係想打籃球隊。所以當班上有體育堂既時候，我都會坐埋一二邊睇班上既同學係籃球場三打三。 

　　呢一日，上緊體育堂既時候，突然之間有個籃球彈過黎，聽到一個男仔講　「傳返比我呀大佬」 

　　我執起左個波之後，傳返比佢之後就繼續睇佢打波。點知呢個人撩我傾計。 

　　「今日無人打，出黎同我一打一啦羅子傑」 

　　叫我同佢打既係籃球隊既人，佢叫啊單，係我同班同學之一。啊單生得細細粒粒，打波成日唔輸得。我經常係場外睇得出佢成日以好既控球技術恰一啲唔識打波既人。當然佢緊係係中一未輸個，先夠膽叫我打。既然佢主動叫我打，我就出去同佢打下，反正我未同人打個一打一，於是我就答應左佢。 



　　啊單讓左我開波之後，我一拎波就射，每射一球籃球就應聲入網。由於我小六開始放學日日打籃球，所以當時已經可以係唔同位置射波，命中率都相當高。啊單見到我接近球球入之後，佢都用佢比較強既控球同上籃技巧入返我波。我地就係咁鬥下鬥下，成為左好朋友。 

啊單：「大佬，你幾勁喎，有打開籃球？」 
我：「有啊，小學開始自己打。」 
啊單：「不如你入埋籃球隊啦，我地比賽唔夠人，好需要你呀！」 
我：「下，但係我冇報名WO...」 
啊單：「今日校隊練波，我幫你問下教練啦。係呢，你叫咩名？」 
我：「我叫啊傑。」 
啊單：「我叫啊單，係籃球隊既隊長，記得放學準時到呀」 



　　就係咁，因為今次既體育堂，令我之後有一個不平凡既中學生活...

同啊單打完波之後，就比佢拉左入籃球隊。佢教練好快就應承比我入隊，於是我當日就去左第一次練習。籃球隊教練姓陳，對啲想打好波既人會對佢好好，如果有人練習唔上心佢就會用非常手段同粗口對付個啲人。 

「屌，傳咩撚野啊！」 

　　由於我既隊友唔太識打波，而且我表現又幾好。所以第一日開始我就好似啊單咁。比教練睇起，之後仲成日私底下教野比我地兩個。其他人就唔太理。 

　　入左籃球隊之後，一星期有三日練籃球，兩日練排球。呢段日子做盡我鍾意做既事之餘，仲減少我對啊靜既掛念。偶然夜晚練完波自己一個人返屋企會諗起佢，我就會返屋企開返個校網出黎，睇下我同啊靜畢業禮果張合照。只要望返張相，就諗返好多小六既往事。 



「唉...」　係我諗緊往事既時候，啊君無啦啦搵我。 

啊君：「下個月返唔返小學探老師呀？」 
我：「哦...有邊個會返？」 
啊君：「我依家只係搵左你昨」 
我：「你靜係約我返得唔得？」 
啊君：「好...好呀，咁再約啦！」 

　　開左學見左一兩次面之後，就無見過啊君。於是我就約定左啊君，下個月一齊返小學探老師。順便同啊君聚下舊。