[真人真事]那些年錯過的愛情: 中一１４
啊焯：「對面和尚寺黎喎，睇落好勁」
肥仔：「專心Ｄ熱身啦，唔好理對面！」
身為隊長既肥仔就帶領我地熱身，但係大家始終無咩比賽經驗，所以熱身果時大家波都接唔實，有一種怯場既感覺。只有肥仔，啊水，兩個人係發揮到水準，進入左作戰狀態。隨著球證吹響既雞聲，示意兩隊出黎分別熱身同握手。比賽開始之後，竟然發生左樣柒野令大家放鬆落黎。
開始左之後，對面隊好快就得左分。佢地得左分之後，就六個人係場入面圍係到慶祝。粒波係我地果個場，所以我地要比返個粒對面開波。
啊水：「屌，一比零都值得慶祝咩...」細細聲講
肥仔：「啊傑，你比Ｄ返個波比對面開波。」
我：「OK」
我應左肥仔之後，係籃球本能之下，我就用手將個波長傳去對面場，就好似打籃球既快攻咁。排球係網頂上面飛個，「砰」一聲，擲中左對面其中一個光頭球員既頭。隨住個波爆左人地個頭，球證亦都響起哨子警告。
比我擲中果位人兄，就係到摸住個頭比我打中既地方，係到怒啤過黎。
我既隊友：「你做咩呀啊傑」講完佢地係到大笑
佢地笑完之後就向我解釋返，原來人地拎到分，比返個波人要係網底碌過去，唔可以係網頂上面飛個波去對面。
我心諗：「屌，我撚知咩，又無人同我講過」
比人警告完之後，比賽就繼續進行。經過我無心擲中左人地個頭之後，全隊即刻無咁緊張，大家亦都好有士氣咁打落去，打出平時係學校同師兄練波既表現。最後，我地以２：１ 嬴左我地第一場既排球學界。打完之後，肥仔提返我地應該點打得好Ｄ，就叫我地解散。
我拎電話用SMS搵啊君，將呢個好消息逐個逐個字咁傳比啊君。等佢起身果時可以睇到，分享我既喜悅。
「我嬴左第一場啦，都話我得架啦！：）」
傳左個信息出去唔夠三分鐘，已經收到佢既回覆。
「我知啦，你仲擲中人地個頭喎！」
我拎起電話覆佢 「下，你係到睇緊咩？」
「嗯，我自己黎架。可唔可以同你一齊走？我係正門」
「好呀，我依家出黎，你等我一陣」
我：「喂，我走先，約左人，你地慢慢睇波啦」
肥仔：「屌你啊傑，你一定約左女啦」
我：「頂，我邊會有，走先啦」
去完廁所換左件衫，出到去比賽場地既正門搵佢，點知比我見到同平時不一樣既啊君。
我：「哇...你配左隱形眼鏡啦？頭髮又電直左既？」
啊君：「我話過我會改變自己架喎...你咁無記性架咩」
我：「緊係記得啦...」我仍然係到望佢新造型
啊君：「點呀？你覺得我呢個新形象得唔得先？」
我：「一百分啦，識你咁耐未見過你咁靚」
啊君：「頂你。去食野啦，行啦」
我同啊君行左一陣，就聽到後面有班仆街大叫
「記住帶套呀！」
當我望去後面，就見到肥仔，啊水，啊焯係到笑到仆街，唔洗估都知係佢三個講。講完之後周圍Ｄ人仲要望過黎。於是我就拉住啊君，求其行左上一個商場搵野食。
中一仔食野無咩新意，係唔熟悉既地方同經濟能力下，食既野永遠只有M記。我同啊君買左野食之後，就搵左一個位置坐。食食下既時候，見到岩岩對面隊果班光頭仔行入黎買野食，啊君望到佢地就笑到食唔到野。
我：「你笑人地無頭髮？」
啊君：「我係笑你岩岩擲中人地個頭囉，打咁耐波規則都唔識」講完又係到笑
原來岩岩成場比賽比啊君目擊晒，佢睇到我嬴左波之外，更加睇到我出醜既一面。今次呢單柒野比啊君同肥仔班人睇到，真係有排比人笑，比啊君咁講都無得還擊，唯有以笑遮醜同扯開話題。
我：「係喎，點解你會係到？你又知我今日比賽？」
啊君：「有得上網睇賽程架，洗問你咩」
我：「...洗唔洗下下窒住晒」
啊君：「咁讚下你啦，第一場黎講你岩岩打得好好架啦。」
我：「唉，你敷衍我」講完搶左佢舊雞食
啊君：「唉，又拎我Ｄ野食既」佢又搶返我Ｄ暑條食
我地搶下搶下，好快將枱上面既野食晒。食完之後，我地就係到商討之後有咩活動可以做下，傾左一陣，我地就決定兩個人一齊去玩籃球機。
搵到一間唔知咩野樂園之後，我同啊君就一人一部機係到鬥高分。有時啊君射果陣，我就會多手封走佢粒波，等佢感受下打籃球射波比人封阻既滋味。
啊君：「你打籃球果樣，其實好吸引」
我：「玩籃球機都話人吸引，發姣呀你？」
啊君：「我講緊你比賽呀！我有冇得以後都睇你比賽架？」
我：「點解唔得先？咁由依家開始，你就係我羅子傑第一個FANS。」
啊君：「好啦，勾手指尾先啦偶像。」
我：「咁幼稚既你」 我伸隻尾指同佢勾
我地兩個係到玩到無晒錢先走，離開果時已經係下午五，六點左右。於是我就送啊君去搭車，等緊巴士果陣，啊君又提返岩岩既野。
啊君：「講過就唔好走數呀」
我：「點會走數姐...勾左手指尾架啦」
我：「車黎啦，上車啦」
啊君：「好啦，你都早Ｄ返屋企啦」
我：「啊君...」
啊君：「做咩呀？」
我：「冇野啦，你走啦，拜」
啊君：「古古怪怪，我走啦」講完佢就上左車
當時既我想同啊君講一聲「你今日真係好靚」 果陣既我怕羞既關係，始終無講出口。當時既我，一定以為好快有機會同啊君出街玩過，再有機會讚佢。
但係，現實既野，往往都無咁美好。當你想得到一樣野，佢好快會消失係你眼前。當你失去一樣野，上天好快會比另一樣野你。