[真人真事]那些年錯過的愛情: 中二２４

升左上中二之後，入左呢一班之後好似無上過堂咁。每日返學就係為左放學打波同上堂訓教。買左返黎上堂用既書一本都無用過。有時上堂訓唔著就會同啊單傾下計，掉位同其他同學捉下象棋咁。學業成績當然咩進步都無，考試呢樣野漸漸成為我地班用黎鬥低分既遊戲。 

「派數學卷啦，叫名出黎拎啦！」數學老師說 

　　考完測驗之後，我同啊單加上幾位男同學決定係數學科鬥低分，最高分既人要請晒玩既人落樓下小食部食野。大家拎到份卷之後都好緊張，等齊人就決定一齊開。 

Peter：「仆街！！１００分拎６分！」佢係班上叫著 
河童：「全份卷既答案填１，咁都有３分！」 
我：「我唔洗請，２分」 





　　我地三個人同其他人講完自己既分數之後，發現啊單坐左去第二到。我地叫佢果陣，佢先知最高分係６分。 

啊單：「唔撚係呀！姐係拎７分就要請？」佢好驚咁講 
我：「係呀，開黎見人啦」 

　　啊單慢慢揭開佢份卷，當佢望到自己既分數，即刻係班房周圍跑 

啊單：「YEAH！！五分！！」 
Peter：「屌！點解係我呀！！」佢好痛苦地叫著 





　　小息果陣，Peter就好唔開心咁請左六個人落去小食部食野。食完野之後有Ｄ人上返去，有Ｄ就落左去球場打波，我就決定去個廁所先再搵啊單打波，行去廁所途中，見到啊魚渣住本書係我前面行個 

啊魚：「岩岩你地個層咁嘈既，搞咩呀？」 
我：「我地岩岩....」我將鬥低分既事講左比佢聽 

啊魚：「痴線架你地！趁仲有個半月大考，不如我教你數學啦！」

我：「但係..我得個位分數昨喎」 
啊魚：「得啦，應該夠時間教到你合格」 
我：「我小學Ｄ野都唔識喎...」 




啊魚：「得啦！總之聽日開始我放學搵你」 

　　我應承左啊魚之後，一直猶疑緊去唔去。我當時睇死自己讀唔到書，啊魚教我都係晒時間。不如留返Ｄ時間比佢自己溫書仲好。但係唔去我又驚會後悔，到時又比屋企罵，又話唔知送我去邊到讀書。直到第二日放學我都決定唔到。 

　　放學果陣，聽到鐘聲我就諗住快Ｄ行走，等佢搵唔到我，點知啊魚一早企定門口截住我 

啊魚：「咁急走去邊呀？」佢笑住講 
我：「去搵你囉！我驚你唔黎」 
啊魚：「得啦，跟我上四樓」佢拉住我書包條帶 

　　我放學終於決定要離開學校果陣，啊魚就出現係我面前，捉住我條書包帶拖左我上去。而我都無任何反抗，見佢咁有心我就決定試下先。去到四樓之後，我地就去左其中一個空左既班房。放低晒Ｄ野，我地就開始。 

啊魚：「好啦，依家比Ｄ野你做先」 

啊魚：「你計呢題「1 - (-5)比我睇」 




我：「等於－４」 
啊魚：「得啦...我由中一教起」佢一副認真又有小小嬲既樣子 

　　其實，當時我真係唔識呢Ｄ野。數學份野有分都係撞返黎。啊魚比左第一題見我錯左就有Ｄ嬲嬲地，後尾就愈黎愈用心教我，直至教到五六點左右，啊魚仲不斷教我，完全無理過時間。我識左佢咁耐，從未見過佢個樣咁認真。 

我：「六點啦，四樓唔鎖門架咩？」 
啊魚：「高中唔鎖門架啦，要留比人溫書，你留到七點啦！」 
我：「收到啦魚姐！」我繼續專注係佢教我Ｄ野到 

　　呢幾個鍾，就係羅子傑係中學入面第一次認真學習既時候，唔知點解我覺得有啊魚係到，佢好似比啊SIR教得更加好。可能啊魚成績名列前茅，經常做小老師教人做功課既關係吧。 

　　就係咁，直到大考既日子，啊魚每日都會搵我溫習，無論晴天陰天雨天，從不間斷。