[真人真事]那些年錯過的愛情: 中三２０

我地三個係巴士站等車果陣，思蓓就拖住個豆丁同我講發生咩事 

思蓓：「因為我親戚佢地兩公婆要去旅行。表妹咪去我屋企住幾日先囉」 
我：「咁點送佢返學？好遠喎」 
思蓓：「我媽咪返工調左時間，可以車埋佢出去返學。放學就我接佢」 
我：「辛苦你啦大小姐。記住請我食糖水就得」我講笑咁講 
思蓓：「得啦，搵日請你食」佢啤一啤我先講 

　　回程果陣，我地就坐巴士去左第二到轉小巴直返屋企。上到小巴後，思蓓就拎住我袋野坐左係最後既雙人位入面，我就抱住佢表妹坐出面。由於車程都幾耐，上到小巴果陣我抱住個豆丁訓左個教。訓訓下突然感覺到右邊膊頭好似重重地，我就張開眼睇一睇。當我一望，就見到思蓓個頭挨住我膊頭訓左教。 





　　我望住佢訓教個樣，唔知點解自己又係到傻笑。近距離果陣望佢，發覺原來佢皮膚同個樣都幾好。由於佢訓著左，我就大膽咁望住佢。我都唔知望左幾耐，但今次係我咁望一個女仔望到咁入迷。我望向街外，見到有排都未到佢屋企。我就輕輕挨落思蓓個頭到訓。 

　　當我準備訓著果陣，我就感覺到佢掂我隻手。而且，思蓓仲慢慢咁捉住我抱住佢表妹個隻右手。我望一望佢，見到佢仲係合埋眼訓著左。應該都係無心捉住我。但當架車行多幾分鐘，佢就愈捉愈緊，唔通佢發惡夢？如果一陣起身咪好尷尬？但又無理由因為佢拖住我而叫醒佢。算了，一切隨機應變。 

　　當我同思蓓一齊我就會好開心。佢比我感覺好似係我好朋友，但有時又會似女朋友。識到佢之後我成個人都開心左。由佢向我表白果一日起，我有時會望住條手鏈諗。三個月後會唔會一切都變了？變左既話，我以後仲搵唔搵到好似思蓓咁既女仔...？雖然我依家口中未答應思蓓...但其實我心目中已經有了答案。但係，之後既事又有邊個會諗到... 

落車後，思蓓就抱住個訓著左既豆丁，我就拎返袋重野行去佢屋企。 

思蓓：「架車都幾快返到黎屋企」佢一邊行一邊講 
我：「係囉...岩岩你有冇訓教？」 




思蓓：「緊係有啦！你地兩個訓左我咪跟住訓囉」 
我：「哦..差唔多落車先醒？」 
思蓓：「係呀。問黎做咩？」 
我：「無野呀，問下姐」 

　　原來思蓓岩岩係車上真係訓著左教，我拎左袋野入佢屋企之後都差唔多要返屋企食飯。我係屋企同佢講我走先，出左門口果陣佢追出黎同我講 

思蓓：「啊傑，放聖誕假黎搵我！比份聖誕禮物你」 
我：「又要你洗錢？唔好啦不如」 
思蓓：「下年我走左你就無架啦，咁你要唔要呀？」佢笑住同我講 




我：「咁...好啦我都會向你回禮」我對佢笑返 
思蓓：「好啦，你自己返屋企小心Ｄ」 
我：「得啦，我走啦」我向佢揮手 

　　離開佢屋企之後，佢係屋企門口睇住我唔見左先返入屋，而我都回頭望住佢，望到唔見佢先繼續向前行。呢日之後，我就一直係到諗送咩聖誕禮物比思蓓好。買野比佢好似又太貴太普通。究竟買咩先會又平又有用？　 

　　衫？褲？對於我呢個平時唔行街既人黎講，真係諗到頭都大埋。