[真人真事]那些年錯過的愛情: 中三２３

自從上次件事之後，我仍然會去思蓓屋企睇下戲傾下計。雖然思蓓好似扮到無事發生過一樣，不過我對住佢就自然會好尷尬。而且聖誕假後就係學校考試，為左有得簡人同我坐就令我開始溫書，更令我係呢個聖誕假少左搵思蓓。倒數當日，籃球隊幾個毒撚就約埋出黎打波。呢一日，四個籃球場上面得我，北仔，啊格同一個隊友啊昇係到打波。我地呢Ｄ無人約既毒撚打完波仲坐係籃球場倒數，倒數完就大家傾下計咁就一日。 

　　第二日，新既一年第一日我就收到思蓓打黎既電話 

思蓓：「喂羅子傑，新年快樂！」 
我：「新年快樂」 
思蓓：「你琴晚有冇出去倒數呀？」 
我：「有...係籃球場倒數」 

　　思蓓聽到呢個答案後就係笑我，最後得悉佢去左親戚屋企倒數。傾多一陣之後，大家就收線準備溫書。啊竹佢地為左呢個前十名，不斷係面書傳訊息黎叫我溫書。而同班既啊螢亦成日係SMS叫我同佢坐，當然我每次都會敷衍佢了事。 





　　考試過左幾日之後，仍然有幾科要溫，所以我同啊竹呢個前十名大計唔可以有所放鬆。有一日我溫書期間，啊單無啦啦SMS我 

啊單：「有新聞睇，快Ｄ上ＦＢ」 
我：「做咩尻呀？有咩睇先」 
啊單：「啊希呀，交住中變返單身」 

　　我望住啊單呢個訊息，心想「咁撚快？啊希同張權好似半個月都無」

我上左FB睇，一入就見到啊希由交住中轉為單身既近況。今次既讚好人數比平時更加多，應該係好多狗公唔抵得張權溝左學校女神。見到有幾個留言，我就禁入去睇下。雖然有好多人關心佢發生咩事，但我見啊希無回應過Ｄ人，我就SMS搵佢。 





我：「做咩呀？分左手？」 

　　傳左個訊息想拎起本書溫果陣，我電話就震左一振震 
啊希：「係」 
我：「發生左咩事？」 
啊希：「冇」 

　　睇到啊希唔尋常既單字回答，我就開始擔心佢 





我：「你有野其實可以同我講，唔好收收埋埋」我在SMS回應佢 
啊希：「算啦..其實都係小事黎」 
我：「小事？係小事先好呀。唔開心就搵我傾計啦，我地始終都係好朋友」 

　　傳左呢個訊息後我就開始溫書，直到當晚啊希先係SMS搵返我。 

啊希：「得唔得閒同我傾計？」 
我：「好呀，反正我冇野做」其實我溫緊書

我同啊希傾左一陣無聊野之後，終於開始傾正題－仆街仔張權。我追問左好耐之下，佢先肯向我透露分手原因。原來當張權把啊希溝上手後，係平安夜當日數度要求同啊希發生性關係。啊希一日入面拒絕左佢幾次，但張權仍然煩住啊希。由個一日開始起，啊希就懷疑張權一開始藉教讀書親近佢既目的。直到最近幾日，啊希終於搵到張權去第二個女仔屋企既證據。我問啊希點搵證據佢又扮神秘唔答我。有句說話講得岩，拍緊拖既女方好比得上福爾摩斯既能力。我今日終於見識到呢樣野。 

啊希：「十一點啦喎...你聽日要考試，阻唔阻你？」 
我：「唔阻，溫得熟架啦」 
啊希：「啊傑，多謝你陪我傾計！」 
我：「傻啦，失戀唔開心需要有人陪下」 





　　我同啊希傾完之後就開始溫書，當我溫到凌晨果陣就休息一陣上FB睇下。當我一上果陣就見到啊希又打左一個新近況上黎，我禁入去睇仲見到啊希TAG左幾個人，其中一個係我 

「多謝你地幾個係我唔開心果陣陪住我，我唔會再諗架啦」 

　　見到啊希好似冇咩事咁我就放心晒，我溫多陣書就訓教，養足精神準備聽日既考試。第二日當我起身果陣，見到六點幾果陣有人傳訊息比我，呢個人仲要係啊嘉。唔通佢有緊要野？我禁左入去睇之後，就見到 

啊嘉：「哦...你同啊希好熟咁喎...安慰人黎呀？」