[真人真事]那些年錯過的愛情: 中三４０
五月的第一個星期的某一天早上收到一個電話，令我從睡夢中醒來
啊俊：「喂，啊傑出唔出黎打波？」
我：「下...我頂...六點九昨喎！你係咪打錯呀？」我吞吞吐吐地說著
啊俊：「我諗得你會放假出黎打波姐..出唔出呀咁，我到左球場啦」
我：「屌你咩...打咁早...唉我依家出啦，你打住先」
啊俊：「好，一陣見」
收左線之後我就收拾一切準備出門，出門前順便扶埋老豆係床上起身先出門口。去到球場之後就見到啊俊自己一個係到苦練射波。烈日當空之下，我去同啊俊射左一陣就坐左係樹陰下傾計。
我：「話時話，做咩咁早出黎偷操？你又唔係籃球隊」我向啊俊說著
啊俊：「你唔知咩？中三有老師搞班籃呀...難得有機會係全校面前贏返次一定要打好Ｄ先得啦」佢奸笑左一下
我：「係喎你果班好多人識打波...車，我仲以為你想係自己班Ｄ女面前威風下tim」我笑著說
啊俊：「我唔係呢Ｄ人呀屌你！我班有我，豬皮，湯尼，啊力，啊威，仲有一個好勁既大陸仔，而且仲有幾個田徑隊。好大機會羸」
我：「睇我同啊單打殘你地啦，仲有江夏高比。你地大撚獲啦」我笑著說
啊俊：「聽日四班會抽籤，到時先知打邊班」
我：「唔好抽到特別輔導班就得啦，唔想比黑社會當波打」
啊俊：「屌，我出去練射波先！你慢慢坐啦」佢慢慢企起身
我：「你個仆街，拉埋我起身啦！」我笑著說
啊俊拉左我起身後，我倆就再次係球場上揮霍汗水，為各自既目標奮鬥著。
第二日放學前的十五分鐘，我同啊單就落左去學生會抽籤。啊單係負責老師手上抽籤後，深呼吸一口氣後便把籤掉在卓上。
啊單：「屌你開呀！！....A喎...有邊班抽到A？」佢向中三代表的同學問著
啊俊：「我抽到B呀」
啊單：「我地總決賽見啦，柒頭」啊單淫笑了一下
我地打算上返班房時，特別輔導班其中一個同學從後拉著啊俊
同學A：「喂肥仔，你抽到A定B？」
啊俊：「...B囉..」
同學A：「大撚獲啦！我地第一場就打精英班！」佢向第二個特別輔導班同學說著
同學B：「佢地好似好勁喎，打交踢波我地就識姐，打籃球咪囉黎柒？！」佢在學生會內大聲地說著
我同啊單見到啊俊比岩岩個黑社會拉住左就急步離開左，上班房期間啊單就約左我放學打波，順便練下默契之類。雖然第一場對手係毒撚班，而且仲有一星期先開波。但係啊單已經議訂左出場陣容，仲諗定拎左第一之後係FACEBOOK上打Ｄ咩出黎。我真不得不佩服他那來的自信。雖然我們二人組合很強，但比賽那有一定贏的？
我同啊單返到班房後，坐了一會便收到啊螢的訊息
啊螢：「好耶...班籃有得睇你打波...」
我腦海立即浮現了一句說話「做咩姐你！？」
我：「哦...係呀，到時黎睇囉」
啊螢：「你幫唔到我地班贏，我就叫珍姐咀你一啖」
我收到訊息後便向啊螢的位置望了一望，只見她奸笑地指著珍姐。大家睇電視都知道，叫親珍姐樣貌都唔好得去邊，我班上面既珍姐都唔例外，而且呢個珍姐性格同樣貌上都係極品級，佢係我眼中只係女板豬皮。比啊螢講一講，睇黎呢場比賽一定要贏。如果唔係...後果將會不堪設想。放學鐘聲響了，我找了啊單便離開班房，順便向啊螢回了一個訊息
我：「...你留返比啊單啦，走先」
我同啊單到左球場之後就一邊傾計一邊射波，後來豬皮同啊俊都黎左之後，啊單就向我下戰書
啊單：「啊傑，同我一打一啦」
我：「二打二咪得囉，咁岩有四個人」
啊單：「我地打十分啦，你開波先」
啊單傳左個波比我就擺了一個防守的姿勢，我見啊單咁認真就決定同佢打。但每次當啊單入波果陣，佢身邊隻狗－豬皮就會幫佢製造歡呼聲，令到啊單入完波後個樣都好囂張。最後一向口臭既啊單每入完波之後就開始語無倫次
啊單：「輕鬆啦！睇我羸啦豬皮！」佢一臉得意地說
我：「贏到先算啦，繼續」
聽到啊單話贏我好輕鬆之後，我就開始認真打。最後我都以一兩分之微贏左啊單，佢輸左之後就開始拎書包走，面上仲有不屑神情
啊俊：「喂，做咩拎袋走呀？好早昨喎」佢向啊單說著
啊單：「屌！仆街仔，你贏我屈高昨！」佢望著我說
豬皮：「等埋我呀，啊單」豬皮開始追著啊單
啊單同豬皮走之後，球場上就得返我同啊俊兩個人
我：「做咩？我有做錯野咩？」我看著啊俊說
啊俊：「你無做錯，不過好明顯你落佢面啦，佢都唔輸得」
我：「佢唔會嬲我掛...」
啊俊：「係就好啦！你地內訌我地先有機會贏！」啊俊講完就係到大笑
我：「屌你咩，快幫手諗方法啦」
啊俊：「打波啦，男人今日嬲，聽日就無野架啦」
當晚我返到屋企開MSN見唔到啊單有上線，我諗住同啊單講句對唔住都好，但等左好耐佢都無上線。去到第二日返學，平時大家見到面都會叫我先既啊單，今日見到我就直行直過，好明顯佢仲為左琴日件事嬲我。睇來面子同輸贏對佢黎講真係好重要。最後我都無向佢道歉，於是大家就這樣冷戰了一陣子，直到班籃比賽前夕，我們都沒有說過一句話。