[真人真事]那些年錯過的愛情: 中三４９

「上次教過既有咩唔識？」 

　　今天放學後，啊魚照常一星期抽兩日返學校教我數學。雖然啊魚仍然穿著校服，但她留長了一把頭髮，顯得她好像比以前美麗了一點。搵左一個空既課室之後，佢就打開我本數學書教我考試既野 

我：「無架啦，你教第二課啦」 
啊魚：「嗯...咁我依家教你第二Ｄ野啦...」 

　　啊魚開始左教我之後，我就專心聽佢講野，直到佢比左幾題數我做，我就趁機同佢傾下計 

我：「魚姐，你地畢左業咁得閒有Ｄ咩野做？」 




啊魚：「正常人咪拎呢段時間返下工囉...不過拎黎進修同做自己鍾意既野都得！」 
我：「唉，我對前途好迷茫...我讀唔到書架啦」我嘆著氣說 
啊魚：「做咩咁講呀？簡科出左問題？」 
我：「簡科？其實我...」 

　　我由比天SIR留低果日到選科果日既野全部講返比啊魚知。佢聽到之後就話左我幾句 

啊魚：「英文唔識可以學姐...不過你連選科都玩玩下既...唉」 
我：「我無得救架啦，天SIR都睇死我」 
啊魚：「...從來無人可以睇得死你，只有你自己睇死你自己」

啊魚講左呢句後我就無再寫野望住佢，佢知道我望住佢之後就低著頭望左去第二邊 

啊魚：「ER...你當讀書係打籃球啦...可能你會上心D」佢笑著說 
我：「嗯...」我還在思考啊魚那句話 

　　「從來無人可以睇得死你，只有你自己睇死你自己」 

　　在籃球場上，我開頭只係以減肥為目標，但不知從何時起籃球變成我的興趣，更愈打愈出色。呢幾年入面，中一學界輸到仆街後到傳波打中人地塊面，再到甲組入左兩球罰球，然後練成今天的三分射術。雖然路上有好多人批評我，但我仍然堅持，一直都無放棄。 





　　啊魚呢句令我明白...其實讀書同打籃球都一樣。只要你唔放棄，堅持落去你就係最後贏家。 

我：「魚姐不愧係魚姐」 
啊魚：「做咩自言自語...哈...望住本書啦」 
我：「收到啦，其實你講到邊？」我笑著說 
啊魚：「搞錯呀...我講多次啦...」佢邊笑邊說

某日上學的早晨，我如常六點半起身準備返學。當我踏出房門，就見到老豆企左係廁所入面，呆滯地望向鏡中反射既自己。我觀察左佢十幾秒之後，見佢無反應就叫一叫佢 

我：「啊爹，做咩咁早起左身？」 
老豆：「傑仔你起左身啦？...無，望下自己姐」佢仍然望著鏡子 
我：「訓唔訓到教呀？洗唔洗煮野比你食？」 
老豆：「唔洗啦，你可唔可以拎個磅比我磅重？唔該」 

　　聽到啊爹咁有禮貌問我，我就立即拎個磅出黎，佢上左磅之後就不斷望返塊鏡 





老豆：「唉...幾個月間瘦左六十幾磅...」佢無奈地笑左一笑 
我：「做完手術係咁架啦...你又無咩點食野...」 
老豆：「我已經介晒Ｄ壞習慣架啦...連個天都唔比機會我...唉...」 

　　聽到老豆咁講，眼淚又開始想湧出 

老豆：「你返學喎，比返個廁所你用」佢慢慢行返出黎 
我：「爹，我會考好個試架」 
老豆：「得架啦，我信你。我訓多陣先」 

　　老豆入返房之後我就開始梳洗，諗返老豆岩岩望住塊鏡果個樣，我個心又開始心酸....