但係我新黎公司未咁認識,除左Linux 之外,其他意見到係要靠阿華阿強出手。 
例如要知其他application 幾時online 幾時 batch ,connection 係點,只有佢地答到。 

如是者,一個鐘到,係大公司第一次開會就咁完左,都叫獲益良多! 

當我番埋位之際,見到哨牙妹cherry 坐住我張櫈同阿文傾緊野。 

佢見我番埋位,佢就企起身,讓番個位俾我,再同我講。 

cherry﹕「犀利呀,有份同人造人開會喎 ! 有冇吸你d 能源呀! 」 





我﹕「傾少少野姐,又唔係咩特別野。你有野傾就繼續坐下啦 ! 」 

我係比較gentlement,雖然心諗其實唔多想見佢個哨牙樣。 

cherry﹕「唔使啦,傾完啦。 喂﹐你成日食公司頽飯,聽日同我地出去食下晏啦。」 

我﹕「好呀,出下去到好嘅,成日係公司好似監獄咁 ...... 」 

唔小心咁樣講左話似監獄,阿文聽到係度笑。 





阿文﹕「阿 2250,同我坐低...... 哈哈....... 你呢家覺得似監獄啦,係咪好悶.......」 

好明顯 2250 係我個員工編號,阿文依然朦住眼咁講,都唔明佢同cherry 傾計都可以釣魚。 

阿文﹕「好啦,阿sir 今次俾你出去食飯啦,但記住番黎 "dum" 石仔架喎.... 哈哈。」 

我都唔曉反應,不過見到佢地開口埋口都咁識講笑,番呢度雖然悶,但都開心過以前好多。 

到晏晝食飯,又一行人成隊兵咁落樓。 





阿 Cherry 又係行最頭,幾條麻甩佬後面旁住佢咁,唔識我地嘅人一定以為我地係Cherry 嘅觀音兵! 

而實際上,街上亦有好多人有著岐視眼光咁望住我地,我真係有衝動想走埋去佢地身邊講,「我地唔係佢嘅觀音兵呀!」 

Cherry ﹕「喂,Jackie ,我有得同你玩啦喎,哈哈。」 

坐低冇耐,Cherry 就撩我講野,仲話同我玩! 聽到我差d 噴左口啖茶出黎 ! 

我﹕「下,大姐,玩咩呀?」 

Cherry ﹕「你新個個project 呀,我都有份做下window uat 個part 。哈哈,當堂冇咁悶啦 !」 

我﹕「哈,咁真係恭喜你有野做 !」 





Cherry﹕「唉,終於破處啦,有野做啦 !」 

嘩! 我聽到佢咁講又想噴啖茶出黎! 好難想像一個女仔講d 咁嘅野呀,大佬! 

不過可能 Cherry 由大學到呢家都近埋d 麻甩佬,講野都有帶埋d 咸咸地口吻。 

Steve ﹕「嘻嘻,睇你個樣都成世破唔到啦.....嘻嘻.....」 

Cherry﹕「我頂你咩,唔知幾多人想媾我呀。 係喎,Man 同 Steve 都有份搞喎。」 

Man ﹕「車,單野好少野做,起番個table ,都唔使幾分鐘, set 番d 以前用過 parameter....真係三個字搞完。 我都唔明做乜要我地兩個人做啦。」 

Cherry﹕「算啦,有野做仲想點,唔係呢單野嘅話有排你悶呀。」 

Man﹕「車,冇野做冇野煩唔好咩,可以自己讀下書,讀下野。趁呢d 時間考下d cert 嘛 ......」 





阿Man 唔知係咪做開gym 關係,坐到直一直,用雄糾糾聲線一本正經咁講。 聽到佢嘅語氣講野你一定覺得好有說服力。 

Cherry﹕「妖,我MCSE 個d 都考晒啦,我都未知仲要考乜。 有D cert 又三年就 expire ,你呢度都做一年,姐係下份工兩年到又要 renew 或考過。唉......」 

Vendor Cert 真係好鬼煩,當你考到的話,下個 version 又會好快兩三年內出新野,又或者三年 expire 係好正常。 

唔講 Vendor Cert 的話,其他專業認可又係會 expire。 

仲要講緊係某一 D cert ,有等級咁上,要考左一級再一級咁去,姐係三年expire 期內逼你考。 

你諗番你細個玩琴,考八級,可能要你樂理五級先,但都起碼跟一世。IT Cert 就唔係,要成日update 、update 再update! 

如果你要追嘅話真係有排追,唔追你又怕落後於其他人,的確兩難。仲要咁多類型 Cert。 





Vendor 就真係發死,個個都咁考貢獻唔少銀兩俾佢。 

乘住man 講讀書嘅野,大家就討論下考過乜,想考乜咁。原來佢地都係 Cert 嘅達人!唔同佢地傾我都唔知呢個世界咁多 Cert ! 

就係呢度簡單講講,好似呢三類Support 人,DB team 阿Man 、Steve , window 嘅Cherry ,Unix 嘅 Gary 佢地各自考左唔同cert。 

先講DB admin,阿man 、steve ,前者有Oracle OCA ,想考IBM db2, 後者相反有DB2 但而家諗住考Oracle 嘅 Cert。 

作為一個DB admin 冇份cert 係手一定好難被請,但DB 都好多隻,Oracle、DB2、sybase、MSSQL 算係最常見。 

而Oracle 都越來越多公司用,初哥入行都多數考Oracle的 cert。 

不過,好似呢間中資銀行,都用IBM 野,DB2 變成必要。因此,因應公司要求,各有各需要。 
好似 Man 咁熟Oracle 冇乜db2 經驗都會照請,皆因要學不難,db 一樣都係差不多原理。 





Cherry 就考晒MCSE ,都曉MSSQL。 

當年佢考嘅係2003 版, 到下次我諗佢要考2008 吧 (當時仲未2008 ......)。 

Gary 就係Linux / Unix OS 系列的強人了,佢考左的cert 有Lunix 的 LPI,Unix 就有IBM 的 AIX ,SUn Solaris (當年不是Oracle), HP 的 HPUX。 

Lunix 的 LPI比較簡單,相對 RHCE 黎講,唔使做 Lab 考,都少左一樣難野考。而我都係中小企個時考左 LPI 。 

點解考Lab 難一d? 因為題目冇乜得背答案,所謂Brain dump 即網上其他人考完記得的答案放出黎,一定時間內其他人考都會遇到一樣嘅問題。 

好似IBM ,Solaris ,HPUX, mcsa 之類皆有 Brain Dump。 

當然除左佢地範圍嘅 Cert ,仲有一d 比如 email 的 lotus Domino,network CCNA (大概唔去Network 方向,佢地冇再考CCNP 吧。),IBM 嘅TSM .....各式各樣.....佢地都有 

而Cherry 講自己會去讀下 PMP 之類,再搵下Master 黎讀,佢話佢唔多再想做一個 support 。 (當然報 PMP 之要求佢夠唔夠就唔討論啦。) 

Steve 就話想考下Security 個邊d Cert ,好似 CISSP 、SSCP 呢類。 

俾佢地講兩講,我好似冇乜Cert 係手,似乎都係學Gary 咁,趁呢家得閒考 d system cert 保住keep 到有個interview 機會先。 

好彩有呢班 contractor 食下飯、收下料,唔係嘅話,頽一年唔學下野讀下書又會浪費晒。 

以上只係IT 界 system 範圍裏面比較多人學嘅野。System 都未講 mainframe 、middleware 、OS2 、 AS400 個類。 

更加未計programming、project 、sales、 pre-sales、 consult、 operation、datacenter site preparation ...... 

IT 界真係博大精深,範圍之廣,窮一世都唔會學完。 睇到呢度你都知我完全唔係醒,只係靠 IT 呢行,寄生住、維持生命。 

係呢間公司叫係脫苦左海,但好明顯我都只剛起步,學下大公司做嘅野,有番d 眼界,唔好咁井底先。 

仲要趁冇咁忙,裝備自己學野,除左考下Cert 、更加要諗下係咪要番番大學讀番個 Master。 

我當時冇女友就最好了,搵埋多左d 錢去讀下書,填下時間好過諗太多野。 

我份人都算幾吹得水,又唔會得罪人,時而係老臣子面前吹水,時而係後生幾個contractor 面前收料,得著都好多。 

某日,同20 號、8 號人造人食下晏。 

冇錯,除左 system 佬,同埋 programe 佬傾計了解下佢地個思維,又係可以學唔少野。 

Wilson﹕「講Master 呀,咁你有乜有興趣呀。」 

我﹕「以前我老細都話, IT 呢一行,其實要 Master 都係買份 cert 咁,唔係 MBA 都冇乜用。」 

Wilson﹕「咁都係呀,好多 taught master 都係上埋堂俾錢就 ok,由其是IT 個D。不過你舊老細話 MBA 就太貴啦,主要都係去識人。你冇咁上下 post 位,都冇乜人想識人喎,哈哈。」 

我﹕「嗯......」 

Wilson ﹕「我就讀緊 Finance 、又考緊 CFA,諗住轉行啦。」 

我﹕「轉行? 」 

又要諗轉行? IT 真係咁差? 我岩岩先黎到呢度見到有d 曙光,有d 起色 ! 

Wilson ﹕「無錯啦,你諗下,打IT 工可以搵到幾多? 去到 manager level 都係四皮到,之後就好難升架啦,因為 banking 黎講,高層一定係 finance 個班人架嘛。」 

我﹕「咁都係,不過做到 manager 夠啦掛。」 

Wilson﹕「但係如果你去埋d Vendor 或者 SI 都可以升到好高級,但係個d 公司係咁捽,你都明幾辛苦啦。」 

佢咁講又諗起 manager Joe 講過嘅野了。 

Wilson﹕「就算係個d Vendor 公司,人地都唔會升一d technical 人,出去請個 business 、finance 人做。好多IT 人好天真,以為自己曉 IT management 就做到高位,但人地做高位一定搵個business 佬去管多架。」 

我﹕「唔......」 

Wilson﹕「我就對 Finance 有興趣先,起碼唔想再鬥 code 啦。同埋 finance 先有機會十幾個月 bouns 、有機會做manager 都八九萬月薪。 IT 佬? 邊會俾咁多你!」 

嘩,原來Wilson 呢個肥仔野心咁大,朦珠眼但眼光好大,要十幾萬月薪先係佢目標!! 

Wilson﹕「係香港打 IT 工唔會有好多錢架啦,夠食夠住架咋,想富貴就死心啦。」 

跟住佢講例子了。 

Wilson﹕「我有個舊同事,大我十年到啦,由IT 轉左行四年到,發晒啦,久唔久仲上電視講股。 以前好煤咋,assistant manager 人工兩皮都唔夠架!」 

我﹕「嘩,咁勁? 落差咁大?」 

Wilson﹕「不過佢都會大壓力嘅,佢要幫埋大客炒股睇基金。 我就想 handle 下 project 或者做 risk management d 野算啦。 個d 都搵得多又冇咁辛苦先啦。」 

8 號人造人 Martin,呢刻先出聲。 

Martin﹕「唉,係我就做番 IT 鬥下 code 算,唔好煩。對 finance 野一d 都唔明。 同埋起碼有一技之長先。」 

Wilson﹕「咁個人興趣姐,冇人迫你,但你過多幾年見番舊同事發圍得咁勁,你就會諗究竟幾年黎做緊乜啦。你話一技之長,你諗下你呢d 技都唔係乜特別野。」 

一睇 Martin 都係安於現狀,唔想偏離現況太多嘅人,應咳係怕一轉就冇後著。 

而我當然好 buy Wilson 嘅說法,雖然佢仲未轉行,但佢充滿信心,冇信心一定改變唔到現狀先。 

Wilson﹕「其實你呢,就算再做 IT 都未必要讀番 IT 嘅 master ,人地 HR 都係過下目知你有master 就算。 鬼理你讀乜讀成點。如果唔太大興趣,咪搵d 想學又未學過嘅野好過啦。 唔好死牛一邊頸要讀番 IT 呀,好多知識其實有用又有趣。」 

其實Wilson 大我唔係好多,至多兩三年,但佢講d 野就好似 Manager Joe 咁老練,經驗之談特別多咁。 


俾 Wilson 講完一輪,又點醒我唔少野。仲係IT 界打滾,你至多賺到幾多呢? 去到乜位呢。 如果要好似佢咁轉行,又有冇咁大決心同興趣呢? 

不過唔理條Path 點走,讀個 master 都係必要,而我都採取 Wilson 嘅講法,唔去搵 IT 野讀好了。 

Wilson﹕「我覺你了解下 Business 野最好啦,會易d 了解任何公司運作,唔好埋頭只係睇住 IT 野呀。」 

Wilson 最後補充呢句,我又望8 號人造人。心諗係咪講緊你同事冇 business mind? 

雖然我話辦公室似監獄,但另一方面,班同事其實久唔久都出位走黎走去傾計,唔係點捱成日! 

班老臣子,吹水話題不外乎講湊仔經、講車、講股、講層樓。 
而我地呢後生嘅,就真係會交流下 IT 技術野。 

唔知點解 Cherry 成日都走過黎我同阿文個 partition ,又或者係partition 外淫笑! 

今次佢又走黎我地個 partition。 

Cherry ﹕「喂,Jackie,今日又點呀,悶唔悶呀,班人造人又有冇吸下你能源呀!」 

阿文﹕「嘻,你個Cherry 做乜鬼成日走過黎呀又,冇野做都唔使成日走過黎架。」 

雖然我有d 抗拒佢,由其見到佢磞哨牙。但係始終叫有個同事主動同我吹水都唔錯,我都俾d 反應同佢傾下。 

Cherry ﹕「嘻!吹下水姐,你都冇野做架啦!況且我又唔係撩你講野!」 

阿文﹕「快d 讀你個書野啦,又話考cert !」 

Cherry﹕「你定啦,我掂硬呀。Jackie 哥,你個 project 點呀?」 

Cherry 冇再理阿文轉頭同我講。 

我﹕「冇呀,都係差唔多咋。都冇乜特別野做。」 

Cherry ﹕「係? 咁你今晚係咪陪我要留低 set 野呀? 」 

我﹕「set 野 ? set 乜野?」 

Cherry﹕「下,今晚預左要同 programmer 做 performance test 喎,你唔使,即係阿華強做? 但佢地都唔會留喎。」 

我心諗,唔係掛,冇人話我知嘅。 

我地走埋去阿華度,問多問,原來真係要留低搞。 

呢兩條友掛住炒股,都冇理要做d 野,唉...... 

結果我都捱義氣,留低幫手啦。 

Cherry﹕「嘻,你睇下你team d 同事...... 幾有責任感。」 

非常無奈,結果我要同 Cherry 留低做野。 

幾個月以黎都未試過要 OT,我已經開始唔記得雞工時代 OT 嘅生活了。 

而係呢個 office 六點後就會空晒,得番我同 Cherry。 同一個女同事 OT 都係未試過的。 

而 performance test 好易,只不過係一段時間,入一d 不同類型 request 去試個server 受到幾多。 

人造人今日下晝已用左前人留落嘅 script,俾我地係 server 行就 ok 。我都係撳一個制,等個幾鐘 generate 個 data 做 report ,非常簡單。 

Cherry 見 set 好晒都冇野做,又淫笑咁走過黎。 

Cherry﹕「喂,我終於有野做啦!!! 」 

Cherry 求其坐左係阿文張櫈,用對腳「印」幾下移過黎。 

佢今日又係著裙,裙邊仲係有少少喱士好似蘿莉feel,但移過黎個幾下好粗魯咁,格格不入咁。 

我﹕「哈,有野做就咁開心,不如你快d 轉份好忙嘅工啦! 好似我以前咁個d 雞工岩你呀。」 

Cherry﹕「嘻,咁又唔好,話晒都要學到野先得架嘛。係喎,講起學野,你會唔會報 master 讀下。」 

我﹕「或者啦,我仲諗緊。」 

Cherry﹕「我諗住讀番個 IT managment 咋,有冇興趣一齊報 ?」 

我﹕「下,我都唔想再讀 IT 啦,唉。」 

Cherry﹕「唔? 點解? 冇乜興趣?」 

我﹕「一黎啦,二黎讀書學個d 野,都好少應用到啦,你諗下你以前讀 IT 點會唔知呀?」 

Cherry﹕「下? 我以前唔係讀 IT 架喎......」 

我﹕「唔係讀 IT ? 咁你讀乜呢?」 

Cherry﹕「我讀 chem 架 .......」 

估唔到IT 呢行個個都入到黎做,唔使一定讀 IT 先得。除左一大堆冇 degree 都做到之外,仲有好多好似 Cherry 咁讀 pure science 個d 都入到行。 

我以前個老細 manager joe 又係讀電子,你話 IT 呢行唔多人爭崩頭都唔得啦!!! 

我﹕「讀Chem? 唔怪之你個樣咁化學咁啦! 哈哈!」 

Cherry﹕「你條仆街呀,我唔知幾多仔媾我呀。你又好好呀 ? 國字面成舊石咁! 一定冇囡吼你啦! 抵你一世做 IT ,一世 OT 、on call 冇老婆仔女呀! 」 

我﹕「嘻,頂你呀! 使唔使咁惡毒呀,講下笑姐! 」 

Cherry 呢下勁粗魯,一路講一路用手指篤我太陽穴,條友傻架,當我係佢個仔咩! 

回歸正題....... 

我﹕「Okay ,咁你讀下 IT 有番個IT degree 都正路嘅。有朝一日你做我阿頭都唔出奇呀,哈哈。」 

Cherry﹕「講笑咩,冇野岩我讀姐,排隊都有排升唔到manager 啦!」 

我﹕「哈,咁你讀呢個目標都係 manager 先架啦。」 

Cherry﹕「你個 Jackie 都幾天真,有幾多人可以後生升到 manager 呀! 大把排隊排十年都未升到,由其是呢度D 位,有都係空降架啦。」 

我﹕「唔係喎,你阿頭 Carrie 都好後生喎,睇落廿到尾都冇喎。唔通有某D 方法上位? ….... 嘿嘿......」 

Cherry﹕「下,梗係唔係啦。佢三十六架啦.......」 

我﹕「下! 唔係掛!....... 」 

Cherry﹕「反而DB 阿姐仲後生,三十二到咋........」 

我﹕「下!!....... 真係出奇!」 

Cherry﹕「所以呢,你咪以為咁容易........唉,我都係嫁左佢算啦....... 嫁個好老公。」 

我聽到狂笑! 

我﹕「哈哈哈! 呢樣好似仲難喎!!!」 

Cherry﹕「我大把人媾,唔同你呢D 一般見識。」 

真係無言...... 

如是者我地吹下其他讀書歷程,做野歷程,等搞完就收工。 

望住Cherry 背影,其實都幾正,佢話有人媾都有D 道理........ 
已有 0 人追稿