香港戰場: 城大篇‧17.分岔口

17.分岔口

團隊：林志剛、李顯明、周偉峰、何明發、李佩欣、黎德文、伍少國、龍子維、余日明、沈多聞、張藍、陳明德、鄭麗嫻、王子計、唐蔭聰、鄧四海、田子龍、金韋昭、古越明

這是一條大型天橋，被上下兩條大路夾在中間。下方是連翔道，上方是西九龍快速公路。
遠離水警崗位，眾人沿海輝道向前走，無驚無險，走到海輝道與海帆道交界。
「前面轉右直行就係水警基地。」鄧四海停下來，「我建議去睇睇有無水警輪可以用。」
伍少國說：「剛才水警向其他人通報我地係度，而家去水警基地，會唔會畀人包抄?」
鄧四海自信的說：「唔會，佢地暫時無咩惡意，相信唔會引嚟軍隊。」
伍少國搖搖頭：「我唔係怕水警有惡意，我係怕有人收到佢地消息，會派軍隊過嚟啫。軍隊過嚟，如果要攞武器裝備，水警總部係好地點。」




「明白，但我覺得短時間未必嚟到，而且海輝道無遮無擋，萬一有軍車嚟就只有駁火，所以去水警基地博一博。」
「但如果博唔到呢?」林志剛說，「照你頭先所講，軍方短時間未必趕到，但我地去水警基地後發現無船，要再經海輝道落避風塘，時間未必足夠。」
「我就覺得值博，如果趕得及上船，可以係天黑之前去到上環，甚至上埋港大。」古越明走過來說。
「但如果無船，要掉頭再去避風塘嘅話，可能已經天黑。」林志剛接着說。
「你地信下警察啦!」鄭麗嫻叫道，「佢地話咁咪咁囉，當咗幾十年差，唔通會害你咩!細路就咪咁多野講啦!」
王子計亦說：「你地咁拗無用喎，天黑啦!一係分開行，好唔好?」
沈多聞望望眾人：「我地再拖落去都唔係辦法，不過即刻投票，睇下去水警基地定係避風塘多人，少人個邊再決定跟唔跟大隊。」
「好。」「就咁話。」

眾人分開兩邊，城大學生林志剛、李顯明、周偉峰、何明發、李佩欣，市民龍子維、余日明、唐蔭聰，沈多聞老師及張藍、陳明德等五個學生，以及伍少國等五個警員站在一邊，共有19人去避風塘。




市民鄭麗嫻、王子計，四個龍岡學生，鄧四海、古越明等8個警察，合共16人選擇去水警基地。
「你地點揀?」鄧四海問站在兩者中間的警察田子龍、金韋昭。
「可以點揀?」田子龍走到城大學生一邊，「總要有幾個警察保護市民掛。」金韋昭亦崇崇肩，跟着過去。
21比16，鄧四海等走水警基地的人，要選擇堅持還是放棄。
鄧四海問：「人數上係少過佢地，你地想行定係留?」
眾人你眼望我眼，古越明說：「鄧sir，你決定啦。」
「我地立即出發，去水警基地。」鄧四海環視眾人，「大家係度分開，你地要小心，伙記要睇住市民。」
「你地都係，」田子龍說，「無事嘅話港大見。」