負能量回收員

我叫蕭凌風, 標準既高登仔 姐係身高180, 會考30分, 徒手擋冰雹暴, 徒手游出公海 果d呢... 你懂的...
先講下我既職業啦,我係一個負能量回收員, 主要工作呢 就係聆聽客人日常抱怨仲有比客人攝時間, 所以我地必須有良好聆聽技能,能夠令客人開心既口才. 
當然啦, 我地既主要客人係女性 所以冇錯... 我地既工作內容係 安慰女性, 服侍女性, 擔心女性 同替女性高興.
 
我地既工作時間係全天候24小時一星期7日, 當客人有需要 傳黎信息既時候,我地會係5分鐘內回覆, 如果係上門回收的話就要係1小時內出現係客人既面前.
 
咁點解我會有得休息呢, 其實只要冇客人搵我吐苦水同攝時間 我就有得休息 做自己想做既野 ,就好似同朋友出街咁 但可笑地 小弟為左呢份工 已經冇哂朋友...
 
有時為左業績, 我會係休息時間 主動搵客人 關心客人, 因為如果我唔咁做 當客人有負能量要回收既時候 就未必會搵我 所以跑數其實都係我工作既一部份.
 


今日... 我突然唔想跑數 我唔想再主動搵客, 好想有客會主動搵我 就算係叫我返工. 我就等下睇下有冇人搵我啦, 答案係咩?! 你知架....
 
就係呢個時候, 突然我聽到電話既震動聲, 之後拎起部電話一睇, 我笑左... 頂~我唔記得左FF都係高登仔既技能.
 
係我衰, 係我犯賤, 拎起左部電話就不知覺咁打左句野比個客, 唉~ 咁就開始左我呢個故事...
 
 
果日我冇啦啦 send左個信息比一個客, 呢個客係我係大學識既一個女仔叫上官月, 女神級, 身邊大把厹所以蕭凌風都唔明點解會搵我做回收員.  但呢個始總係佢既工作, 唔方便有太多想法既.
 
個信息內容大致上係咁既『你最近上堂都好似唔係好留心喎,有心事呀?』作為一個出色既回收員,當然就連日常生活都會留意.


 
過左15分鍾信息既下方出現左一個閱字 但冇收到上官月既回覆.
『唉~今日睇黎又跑數失敗啦』蕭凌風嘆了一句
 
就係呢個時候,電話震動了, 今次唔係FF啦 真係震左. 我一睇,嘩左一聲 字海喎.
『咁你都留意到,做咩咁做留意我呀. 係呀 最近我男朋友話要同我分手, 但係我仲係好愛佢,我唔知佢點解要咁對我, 我真係好唔開心呀, 搵佢又唔覆, 我有朋友仲同我講見佢拖 住一個女仔行街呀, 我唔明呀! 我係咪真係咁差! 我好需要有一個人可以聽我講佢d衰野, 比我發下脾氣, 可以既話我想報復. 我知你幫到我既, 我都知你一定會幫我既, 係咪?』
 
 
我心諗, 聽佢講故事唔係問題呀, 我專長黎架喎, 但係點幫佢報復呀.
我都唔理咁多就覆月『好! 冇問題, 你想睇面傾定係點?』


今次唔係等左好耐就收到『我今日放4點, 一陣你黎接我呀.』
 
話哂都係見客, 唔可以著得咁難睇既, 就換左一套我認為好睇既衫就出左去.
3點45分 我就到左上官月既學校, 我唔鍾意遲到, 因為我覺得不論我係咪見客都好啦, 約左人就一定要唔可以遲到, 所以我會選擇不準時地早到.
 
可能係因為上官月係一個女神級既女仔, 所以我有小小期待見到佢,同佢去咖啡室傾計, 但係我知我係咩身份, 跟本連FF既資格都冇, 諗到呢到, 自己都對自己冷笑左一下, 其實係冷笑定苦笑 我都分唔到.
 
話咁快咁4點啦, 但係仲未見到佢出黎喎, 係既~女神又點會咁準時出現. 又過多30分鍾, 我開始擔心月, 會唔會出左事架, 但當我諗到, 呢個時間其實我係咪應該嬲緊而唔係擔心佢呢, 我搖一搖頭同苦笑, 自嘆一句『我果然係一個好人, 哈』
『邊個係好人呀? 你呀? 我又睇唔到你有幾好喎.』
我嚇左一跳, 冇啦啦有人係我耳邊講野, 再望下後邊, 原來係上官月.
『你想嚇死我咩, 好啦, 唔好咁多費話啦, 去果邊間咖啡室先再傾』我唔想係學校比太多人見到, 因為同呢d女神級既女仔見面同傾計, 會比葡萄砸死, 所以我先帶佢去一間咖啡室座低再傾.
 
到左咖啡室, 我地揀左一張最入既檯, 講秘密都係安全d好既.
『我需要做d咩?』我直接問呢個問題既原因係我單純地覺得咁做好似專業d, 型d.
『冇, 你咩都唔需要做, 你只要配合我講既野就可以架啦.』


月見到我一個”唔係呀, 咁簡單”既樣, 就唔等我講出口, 就話
『冇錯,就係咁簡單, 下星期一開始.』
『哦.』我都唔知點答佢好, 佢都講到咁,我仲可以答咩.
『喂, 我有d野做, 走先啦, bye.』等都唔等我講句再見就消失左.
 
咁我見叫左杯野又未飲哂, 都係飲埋先走啦, 我突然發現, 我面前張檯, 有一個因為充滿正能量所以擁有一個正能樣既人等緊人.
『唉~想自自在在飲杯野都唔得,都係走先, 費事一陣比人用閃光彈炸死.』
 
一行出門口就收到信息, 當然係月send黎架啦.
『我改變主意, 由今日開始, 我地要培養默契, 咁先可以係佢面前做得自然d.』
『我地可以先由曖昧既信息開始, 你當我係你女朋友咁就得架啦, 你應該識架啦.』
我心中一嘆, 唉~ 我鬼識咩, 拖都未拍過, 真係當我高登仔大哂呀. 不過咁, 只要我有鍵盤係手,曖昧信息算得咩, 最可惜星期一見面唔可以用鍵盤, 如果唔係, 我用鍵盤打死十個男朋友都得呀.
『當然冇問題啦,BB~ 你叫到, 我就算要我去死都冇所謂啦』我先發動第一級既攻勢.
『我點會捨得要你死姐, 風BB, 你星期一想食咩呀? 我買比你食呀~』我睇完想死...不解釋... 我決定唔玩啦, 我認輸.
『不如... 我地正常返小小啦, 我地d信息都唔會比其他人見到架啦.咁樣對我地既默契冇咩幫助喎.』


 
『呀~ 又係喎, 我kai左, sorry. 咁你星期一想食咩呀, 未答我喎, 我要係佢面前比你架.』
『咁呀~ 是但啦, 你買咩,我食咩啦.』
之後, 我地一直都冇聯絡, 直到星期一...
 
我未入課室就已經聞到好勁既葡萄味, 我心諗, 死得啦今次, 入到去都係坐係後邊好d.
入到去, 成千上萬隻眼望住我, 眼神中仲要帶點殺氣, 冇計啦, 係你地迫我架, 我發動霸王色霸氣, 3秒後, 全場唔敢再望我, 咁我就坐低啦.
有一個人行緊過黎, 我心諗點解佢唔怕我既霸氣既, 佢開口就話
『你就係果日同月去飲野果個呀, 哈, 不外如是, 月既眼光做咩變得咁差架.』
唔通佢就係月既前男友, 我仔細望一望佢, 佢的確有資格咁講, 形容下佢啦.
我身高180, 佢就185, 我徒手擋冰雹, 佢念力擋冰雹, 我已經等級封頂,佢就做埋GM, 咁上下啦, 總之佢就剛剛好可以屈我機, 輸到咁, 我仲可以點, 我冇理佢, 點知佢加多句.
『好似你呢d咁既人, 好心就留返係屋企, 上高登算啦, 死毒男.』
 
『山僧不解數甲子，一葉落知天下秋. 』
我唔發火你真係當我係毒男, 高登乃天才學術交流地, 我不出門就能知天下事, 邊係你呢d死MK仔可以明白.


的確, 呢句野的確唔係好關事既,不過, 佢又點會明呢, 傻豬.
 
就係呢個時候, 一對玉手從我身後抱住我, 無視左個MK仔.
『你既早餐呀, 我特登整比你架, 一定要食哂佢呀.』
『你整既一定好好味, 我一定食哂佢.』
月既呢個行為打破左我所發出既霸氣, 再一次成千上萬隻眼望過黎.
 
早餐食完, 開始上堂了, 月坐係我身邊, 而個MK仔就坐係我地既之後邊, 表面上一切都好似好正常咁上堂聽書, 但其實呢個課室一早已經係地球上最危險既地方, 我以一人之力對抗班上幾十個毒男加個MK仔既力量, 我地既魔力早已經好似粵語長片咁係課室空中飛來飛去.
 
突然一股好強既力量亂入係我地之中, 雙比之下, 佢既魔力比我更有大將之風,  我以為我要敗陣了, 但係佢原來係黎幫我架, 佢吸引哂所有既目光之後, 再用霸王色霸氣將所有人都停止哂攻擊, 原來除左我之外仲有人識霸王色霸氣, 呢個人一定唔簡單, 氣氛依然奇怪, 佢到底係邊個, 點解要幫我.
 
就係咁, 我安全咁上完呢一堂, 我就諗住搵佢同佢講聲唔該, 點知佢主動行過黎.
『月,呢個就係你新男朋友呀? 佢幾勁呀, 唔錯呀.』
月好似好嬲咁講『關你咩事呀, 走開啦.』
之後佢望住我『你好, 我係冷翔天.』


『你好, 我叫蕭凌風, 啱啱唔該哂.』
個MK仔就走過黎細細聲咁同冷翔天講
『佢係月既新男朋友喎, 你唔嬲架咩.』
冷翔天眼神發出殺氣望著個MK仔.『邊個叫你帶頭搞事架.』
MK仔嚇一嚇之後講左句對唔住就走左.
原來冷翔天先係月既前男朋友.
連跟佢搵食既人都可以係外表上屈我機, 更何況冷翔天...
我心內突然葡萄起上黎, 月好似睇得出我諗咩
『唔洗理佢.』
我發覺呢份工都唔易做, 如果冇返咁上下, 我啱啱應該已經氣絕身亡.
『嗯,咁我仲要做d咩? 送你返屋企? 』我已經攰到唔知要做d咩.
『唔好住, 陪我行下街先啦, 時間仲早』月應該唔知我地d男仔啱啱發生咩事.
『下, 但係我啱啱發功發到好攰喎.』 我真係好攰.
『咁好啦, 屋企都唔洗你送我返去啦, 我自己返去!』月發脾氣了.
『咁又唔係真係攰到陪唔到你行街既.』我見到月呢個發脾氣樣, 突然覺得佢好可愛, 我心軟了.
『拿, 你話架, 我冇迫你架.』月光速變臉, 笑了.
 
我地出到學校門口, 月行行下停低左, 我就問佢
『做咩呀? 你冇事呀嘛?』
『冇事, 係啦, 你唔洗陪我啦, 啱啱我講下架咋, 做比冷翔天睇, 多謝你既配合.』
月又冇講再見同等我講再見就走左, 老實講呀, 心情有d 失落, 但係因為係我真係好攰所以冇諗太多就返左屋企. 

返到屋企, 就好似其他人放工返到屋企一樣, 攰到咩都唔想做, 沖左個涼就上左床訓你到, 心裡有個念頭, 就係不如send個信息比月睇下佢做緊咩都好.
『我返到屋企啦, 你呢? 今日好似好唔開心咁喎, 有咩唔怕同我講呀.』
我send完就放低左部電話諗住訓, 因為覺得月唔會咁快覆.電話震醒左我, 我突然個頭好痛, 可能係因為訓到一半就醒左,我再睇下部電話, 原來係月覆我, 我再睇下個時間, 只係過左5分鐘, 咁唔怪得會頭痛, 剛入眠就比人叫醒, 姐係冇訓過.
『其實冇咩, 不如一陣一齊食飯呀?』
我比佢嚇親, 第一次有女仔會主動搵我食飯, 唔知點解精神哂,咩頭痛都冇哂, 唔洗一秒已經諗好著咩好.

『冇事就好, 好呀, 想食d咩呀? 我一陣黎接你呀.』
『咁就食日本野啦, 清淡d, 我最近要減肥呀.』
睇到佢咁覆我真係O左, 減肥喎, 唔好玩啦, 真係聽完就得啖笑, 你有冇見過...下刪幾千萬字...,  刪一刪佢先, 唔想一陣有人睇完, 我又收到d減肥無罪既格命信息.
『你仲要減呀, 唔係呀, 我真心覺得你已經好瘦啦喎, 不過食日本野都好呀, 我都鍾意食.』 
『你唔好氹我啦, 你睇下香港d女仔幾瘦呀, 比較下我不知幾肥呀.』
我真係唔明做咩要用瘦到好似非洲d兒童咁既香港女仔黎比較, 重點係, 香港女仔冇既野你有喎... 你懂的... 係咪覺得段對話好熟唔知係邊睇過呢, 你睇返你電話就睇得返架啦, 我相信所有男性都會講過差唔多既野, 可憐的男性呀... 再刪幾千萬字... 好, move on. 
『做咩要比較呢, 做人開心快樂咪得lo, 咁你想幾點去食?』 
『咁我貪靚呀嘛, 不如7點啦, 食完仲可以去睇埋戲先返屋企, 最近有套野我好想睇呀.』
嘩, 仲想埋睇戲呀, 唔知點解, 有d興奮.
『好呀, 咁一陣我去接你呀, 一陣見.』

到左月屋企樓下, 緊張到心跳以500下一秒既速度等待月既出現, 不過都係果句啦, 女神又點會準時出現呀.
我身邊既一個管理員已經攞起左部電話準備幫我打電話叫白車, 就黎心臟病發既我見到月既出現, 我真係覺得自己已經死左, 手心出哂汗.
雖然係半工作既見面, 但係月又冇講想傾d咩就約我食飯, 會緊張都正常呀, 話哂都同女神食飯喎.
呀唔係, 係女神級既女仔.
 
月今日著左一條白色既連身長裙加對皮膚色既紅底高跟鞋, 個感覺真係好女神, 白色裙親返月既完美白膚色, 再加上皮膚色既高跟鞋, 顯得月對腳好白,比例好好, 真係好完美.
『Sorry呀, 我又遲到, 你知啦, 我地女仔出街要搞好耐架嘛.』月著住高跟鞋都急急腳行過黎.
我指一指佢對鞋『唔緊要, 你咁樣就唔好行咁快啦, 小心呀.』
我諗唔到講咩好就諗住快d到下一個行程.『咁我地行啦, 呢到日本野都係得一間架姐, 你知係邊架何?』
『喂~ 你唔覺得我今日咁著好靚架咩?』月有小小扁嘴咁講.
見到月呢個扁嘴既表情, 我心諗, 我輸了, 我投降了.『靚呀, 我覺得好靚呀, 好有女神feel呀,不過我唔好意思講出黎咋.』
月聽到之後嘴角向上『算你啦. 』
之後月就好似小朋友咁行係我前面, 佢去到一個紅綠燈位就回頭對我笑同我講『我地快d行啦, 我好肚餓呀.』
我冇答佢,只係微笑, 果一刻我第一次感受到咩叫幸福.

你可能會話回眸一笑姐,咁就覺得幸福架啦, 但係對我黎講呢個笑容,呢個比人約既機會, 已經係我一生人最大幸福, 可能都係我最後既幸福.到左日本餐廳, 我地十分好彩唔洗排隊, 咁我地就面對面坐啦, 上次係咖啡室都冇認真咁望月既五官, 原來真係好靚, 大眼鼻高小嘴尖面, 再加上一把長髮, 望住月,我終於明白咩叫完美,咩叫女神.

 月見我太留心望住佢就同我講 :『喂, 你咁望住人, 我都係女仔,我都會怕醜架.』
『你咁靚, 如果唔望多兩眼, 我怕我會後悔.』我都唔知我邊到黎既勇氣講d咁野,不過講完之後, 見到月微笑,我就知道咁講佢係開心既.
一個可以叫女神既女仔已經係好靚, 再加上一個微笑, 仲要係對住你笑, 我諗我可以見到呢個情景, 已經真係用哂我一生既幸運.
『你夠啦, 仲望, 再望唔洗食野啦.』月扮嬲咁同我講.
呢句明顯係口不對心既表演啦... 我係呢個時候係咪應該再氹下佢,講真心話呢...
好! 今次黎句勁d既, 『望住你...』

『兩位諗到食咩未呢? 洗唔洗幫你地叫左野飲先?』 一位專業既服務員打斷左我.
突然咁問, 我又真係未諗到食咩喎, 我連飲咩都未決定. 
『唔該我要一個鰻魚飯同一杯綠茶呀.』原來月已經諗好要食咩, 咁我咪冇得叫佢等一陣先再叫, 咁呀...
『一樣呀,唔該.』我只好咁做, 同埋好彩我都鍾意食鰻魚飯. 

最衰比個服務員打斷左我, 冇啦啦講返又好怪, 冇計啦, 總有機會既.
我心裡面突然諗一樣好恐怖既野, 就係月會唔會等d野食黎哂先話想轉架, 我會唔會成為果位男主角架, 會唔會搞到我好唔好意思架.
好彩我心裡面都有一個天使, 佢同我講
『冇事既, 佢都冇扮可愛, 佢本身就可愛啦, 仲有佢講野都唔低B... 冇事既.』
唔知點解, 呢個天使由一開始既白色慢慢變左做綠色... 
野食終於黎啦, 緊張既時刻到啦...