[外傳] Golden Heroes Universe :黑翼天使卡羅 作者：少林一包莖: （二）
專業驅魔：噬魔師
「血師先生你好,歡迎使用驅魔快遞服務」
嘭!
一部七人車停泊喺路邊,車內有三個人,講錯,係三個死人。
「第十個。」
一個西裝友正離開七人車,手上拎住一枝純銀色既Desert Eagle(沙漠之鷹)。
古老既神殿,雖然已經殘破不堪,但係好少人知道,神殿下仲有一個秘密空間,傳說係羅馬人收藏寶物既地方,而家只剩低兩個身穿黑色斗篷既人,一名老人,一名少女。
一名獵人裝束既男人走入秘室,佢每走一步,風衣內都發出金屬既撞擊聲,而最顯眼就佢腰間既一對手槍,係黑暗依然發出暗紅既光芒。
「巫妖」
黑色老人聽到呼喚,揭開斗篷,露出一頭銀髮,同一對閃爍藍光既雙眼。
「魔眼,我想話你遲到,但你已經係最早到嗰位。」
「咁樣既話,代表十三元老唔會齊人。」
魔眼脫下風衣,露出一身純黑既鏈甲,胸前、腰間、背上裝備咗各樣兵器。
巫妖身後既少女不自覺瞳孔張開。
魔眼留意到少女。
「佢就係你個小徒弟?你仲害人唔夠呀?你對上收嗰個先自爆死咗喎?」
魔眼講完都忍唔住笑咗出來,但係少女就聽到面青青。
「唔好嚇阿雷得唔得?玩魔法玩到自爆好正常。」
秘室外,一名身穿紅色皮衣既少年,一直緊閉雙眼,好似感應緊某d野。
「但丁?」
一把溫柔既聲音令但丁清醒過來。
一個同佢年紀相若既女仔正望住佢,微卷既紅髮,灰色既瞳孔。
「魔眼老師叫我來搵你,佢哋開緊會,我叫阿雷,阿雷斯塔。」
但丁唔知點樣回答,自有記憶以來,佢一直跟住魔眼東奔西跑,未同其他同齡人溝通過。
「點解你無武器?魔眼老師就………」
阿雷總算問到但丁最在意既事。
「師傅話我遲早有….我最想要刀。」
「刀有咩好?導師話女仔唔玩刀玩槍,搞到成身血好肉酸,血跡又難洗,到時又要買新衫………..」但丁開始諗,唔通女仔鐘意講人哋唔想知既野?
「十三元老,就係得兩位出席?」
一個黑髮女人拍枱怒罵。身後企住一名巨漢,背後插住一把等身高既巨斧。
「代言人,十三元老一直都好盡責,今次咁多人缺席,好可能出咗事。」
巫妖繼續講。
「十三元老其實早已意見一致,要求歐洲總部遷移。」
代言人繼續大罵。
「遷移總部?我哋好辛苦先建立到而家既規模,而家你話搬就搬?大規模搬遷會引起梵帝岡注意,到時係你負責?」
「代言人,最近實在太和平,區域內連一個神職人員都無,而且有情報話梵蒂岡搵緊一種藍色既晶體,就連對付我哋既人都調走埋,我好懷疑我哋既處境係咪安全。」
魔眼對巫妖睇法表示讚同。
突然,全場氣氛肅靜落嚟。
「有人入侵。」
「天使級。」魔眼準備拔劍。
「魔眼,區區一個天使,交比部隊對付,最重要係完成會談。」
代言人同時示意巨漢開始警戒。
「但丁,你感唔感覺到?」阿雷握緊銀杖。
但丁無回答。
「痛…」但丁捉實自己隻右手,痛楚令但丁全身震抖。
但丁感覺好似有野係手背不斷擴大,好似想撐開佢隻手。
阿雷抱住但丁,發覺但丁震得好厲害,正想帶但丁搵魔眼,先留意到有個人企係身邊。
一個穿西裝既人。
「你哋兩個喺度做咩?」西裝人問,而佢隻手一直係度轉筆,與其話佢轉筆,不如話枝筆係佢手上自轉。
阿雷無答佢,因為佢已經被一股強大既殺氣壓到講唔到野。
「雖然我見過惡魔做咁變態既野,但真係未見過…..咁有情調。」
西裝人手中既筆,突然變長,再變成刀刃,伸到阿雷條頸。
「人類？」
西裝人好驚奇咁望住佢哋。
阿雷無出聲，因為佢知道沉默係唯一活路。
「你兩個完全無惡魔氣息⋯唔通係祭品？」
突然西裝人面色一變，刀刃又變翻一枝鋼筆。
「唔想死就唔好走。」
西裝人往秘室方向走去。
秘室內，魔眼、巫妖面色一沉。
「點解？點解個天使級突然變咗天使長級別？」
即使情況兇險，代言人依然面不改容。「地面部隊會全滅，菲、魔眼、巫妖，上去應戰，戰鬥結束後立即轉移總部。」
「你哋三個聯手，佢可能連一分鐘都捱唔到。」
西裝人緩緩走入秘室，手中依舊轉緊筆。
代言人終於面露難色。
「噬魔師。」
「好耐無見，代言人。」
手上既銀筆，轉得愈來愈快。
「你知唔知我追得你好苦？」
噬魔師面露笑意，但手中銀筆已經兩邊伸長，變成「S」形既回力刀。
代言人嘆一口氣。
「你殺咗我又點？我死過無數次，但我依然企喺度。」
「係，你哋係咁返嚟，係咪要我食咗你哋先安樂？」噬魔師手一揚，銀刃直取代言人。
持斧巨人.菲擋在代言人身前，巨斧一下斜劈，雖然無打中銀刃，但巨斧強勁既氣流令銀刃偏離，直插秘室牆上既大理石。
「上！」
魔眼、巫妖同時向噬魔師發動攻勢，魔眼拔出背後既黑劍，劍上散發著螺旋既黑氣，直劈噬魔師。
而同時，噬魔師左右後方出現兩個巫妖，手持長矛直指噬魔師。
三面攻勢幾乎同步，但噬魔師毫無反應，突然地面裂開，三面銀色盾牌係地上冒出，同時擋住魔眼、巫妖既連攜攻擊。
「插喺牆上既銀刃，幾秒間已經自己穿過地下返嚟防禦⋯」雖然巫妖暗地分析噬魔師，但身體既攻勢並無停止，兩個「巫妖」掉低長槍，爬上盾牌，口同雙眼變成三個大窿，噴出綠色既火焰，魔眼迅速跳起，拔出腥紅既雙槍。
「咆哮！刻耳柏洛斯！」
雙槍聽到召喚，暗紅既槍管發出紅光，子彈穿過紅光激射而出，陪隨而來既係來自地獄既嚎叫，一種凡間無既聲音，令人體驗地獄既聲音。
子彈從盾牌上方穿過，觸碰到妖綠既火炎，立刻引發爆炸，衝擊波被盾牌不斷反彈，令威力倍增。雙槍不停既咆哮，盾牌內不斷既爆炸，持續近十秒。
銀盾慢慢陷入地下，而裏面，只剩低一具燒焦既屍體。
經過多次爆炸，屍體已經不似人形，
但四人並無放鬆，因為佢哋又聽到皮鞋撞擊地面既聲音。
「血師既無縫戰術，連我都睇到呆咗。」噬魔師一邊走入秘室，一邊轉動銀筆。
雖然魔眼唔敢相信，但依然保持鎮定，準備發動下一次攻勢。
「可惜，如果血師仲未死，應該已經訂做咗一套戰術殺死我。」
噬魔師一邊甩銀筆，好似想喺筆尖甩出墨水。
「所以我搵咗佢先係正確既。」
銀筆終於甩出一滴墨水，惡魔都感覺到，果滴係血師既血。
銀筆慢慢伸長變成長刀，噬魔師一個箭步向魔眼劈去，魔眼一劍擋開，但銀刃瞬間縮短，避開魔眼既格擋，然後再瞬間伸長，銀刃在魔眼身上劃低一刀。
魔眼硬食一刀，刀傷已斬斷肋骨，但依然奮力後退，避免再受一刀。
巫妖兩手碰地，噬魔師腳下爆出一對石手捉住噬魔師持刀隻手，銀色長刀既刀柄又伸出一把銀色電鋸，好似有生命咁鋸開石手。同時魔眼拔出雙槍向噬魔師急速射擊，電鋸再瞬間形成一個盾牌抵擋子彈，數十發子彈，全部射喺銀盾上。魔眼唔敢相信，竟然會有死唔去既人，無敵既筆。
突然,一陣強烈既氣流直迫噬魔師,一把巨斧正橫掃過去,銀刀收回電鋸同盾牌,
變成一枝長棍,長棍再變伸出各種兵器格擋,企圖分散巨斧威力。
「你唔應該擋。」
沉默既巨人總算開口。
數十把銀兵器卡住巨斧,但巨斧完全無減速,反而手持銀棍既噬魔師被巨斧連人帶刀推至牆邊,銀棍不斷分裂兵器卸力,但依然無阻巨斧,
最後噬魔師被壓喺牆上,身體抵受唔到強大既壓力,噬魔師隨即口噴鮮血。
巨斧收起後,噬魔師勉強企穩,恐怕胸骨已斷幾條。
「嗄...好痛呀...而家殺我好易喎...殺我呀...嗄...」
「殺咗你,你只係會繼續復活,無病無痛咁返嚟殺我哋,反而而家你受重傷,對我哋輕鬆好多。」
代言人露出笑容,彷彿恥笑緊噬魔師。
而噬魔師都諗唔到,原來自己有弱點。
銀筆變成手槍,向代言人連開幾槍,但因為傷勢而射失。
代言人雙眼變紅,地面同牆身既大理石開始變成燃燒緊既岩石。
「魔眼老師!!但丁佢....!!!」
亞雷抱住但丁走到秘室,但係秘室一個人都無,只剩低戰鬥過既痕跡。
地獄，原本係天使囚禁惡魔既監獄，直到撒旦帶領墮天使、惡魔重奪地獄，地獄先真正成為魔族既據點。
牆上既烈炎開始消退，隨之而來係一陣陣既寒風。
噬魔師發現已經唔係身處喺秘室，而係喺一個幽暗既世界，自己企喺一條黑河既河邊，河水完全無水既光澤，而係無盡既黑暗，河邊有幾棵柳樹，死寂既風吹擺柳葉，無任何既情感，只有一片死寂。
「估唔到仲有命返嚟⋯⋯」
巫妖不禁感慨，當年一齊出戰既戰友，早就已經死去變成亡靈，只剩低魔眼同佢。
「凡間形容地獄係一片火海，其實地獄只係一個蒼涼既世界，不過，知道既人都返唔到去講。」
代言人一邊向噬魔師走去，一邊把玩手中既銀筆。
「歡迎嚟到地獄，驅魔人。」
噬魔師無回答。
黑河裏面伸出無數隻毫無血色既死手，捉住噬魔師。
「我哋惡魔都係會死，死咗之後靈魂就返嚟地獄，成為呢條冥河既一部分，等待重生。」
噬魔師被死手抬起，但噬魔師依然毫無反應。
「可惜，比你殺既惡魔，一個都無返過嚟。」
代言人將銀筆指向冥河，銀筆既筆尖放出一個個灰色既靈魂,其中一個特別鮮紅。
「血師，歡迎你返嚟。」
代言人接住鮮紅既靈魂，放入冥河。
「你唔會死，你會永遠埋喺冥河既深處，噬魔師。」
死手慢慢將噬魔師拉入冥河。
我係噬魔師，上帝選中既驅魔人。
我比其他驅魔人、甚至比天使更高級，我係上帝既發言人。
每當我殺一隻魔鬼，佢既生命就會變成我既營養，我會變得更強，然後再去殺更多既魔鬼。
我成日都好擔心，如果魔鬼死哂，咁我點算？殺人？將異教徒肅清？殺天使？殺哂班曲解上帝既天使？
「你點可以殺哂班魔鬼？要留幾個活口繁殖，到時再殺。」
消滅邪惡係上帝賦予我既職責。
「你真係講極都唔明！」
⋯⋯
「你知唔知咩係惡魔？邪惡？敵人？」
係。
「你都痴X線！係有腳既美食呀！」
⋯⋯
「你記唔記得殺死佢哋既快感？當我穿過佢哋身體，我都會飲佢哋既血，真係好好味，除咗活生生既血細胞，仲有殘留既魔力，每飲一啖就精神百倍。如果我有口，我會連肉一齊吞落去。」
⋯⋯⋯我試過。
「我緊係知你試過啦巴打！你仲試過戒咗佢添！而家有人怪你咩？你又唔係食狗肉,你食魔鬼喎!食完仲有力量維護正義,幾好呀!」
好口乾….我想飲血
「係呀….我都好餓,食得飯未呀…..噬魔師」
食得啦,噬魔師。
銀筆擺脫代言人，一梭銀光，插入噬魔師體內。
銀筆進入噬魔師體內，變成液態將斷開既骨頭連接，同時銀色液體係傷口流出，迅速包住噬魔師全身。
銀色液體開始變成裝甲，頭部只剩低口係外露，右手變成長矛，左手五指變成刀刃。
噬魔師左手一揮，無數隻死手被斬落。 右手既長矛插入冥河，冥河既靈魂開始嚎叫，只見到靈魂不斷被長矛吸收，而左手既刀刃就愈來愈長。
「竟敢打擾冥河既英靈!!!」
巫妖兩腳陷入泥土,高舉右手,露出佈滿符文既手臂。
「冥河中沉睡的利維坦(備注1)!!我為魔族最強之巫者!召喚汝於冥河中蘇醒!!!譴責此等褻瀆冥河之人!!」
魔眼前去阻止巫妖,但被代言人阻止。
「呢個係最後既辦法….」
巫妖手上既符文發紅光,同滲出血液。
而冥河亦出現強烈既震動,死靈發出刺耳既叫喊。
「放肆。」
噬魔師左手向巫妖一揮,一陣強烈既氣流直飛巫妖,魔眼轉身儲力劈向氣流,氣流直接粉碎魔眼既黑劍,繼續飛向巫妖,一擊斬去巫妖既右手。
被斬斷既右手,手上既符文亦變得暗淡。巫妖立即用左手對準傷口噴火,避免繼續出血,但已經因為痛楚而開始企唔穩。
備注1: 傳說中，上帝在創世的第六天創造了一雌一雄的兩頭巨大怪獸，其中一隻就係盤踞大海的利維坦。
利維坦是一頭巨大的生物。牠暢泳於大海之時，波濤亦為之逆流。牠口中噴著火燄，鼻子冒出煙霧，擁有銳利的牙齒，身體好像包裹著鎧甲般堅固。性格冷酷無情，暴戾好殺，牠在海洋之中尋找獵物，令四周生物聞之色變。
因為冥河既騷動，驚動到冥河衛隊到場。
「閣下！」
其中一名身穿黑甲既兵士向代言人敬禮。
「係我既失誤⋯⋯竟然以為冥河可以囚禁呢隻怪物⋯⋯」
「閣下！聯合地獄各部隊絕對可以封印佢！我即刻去聖殿同寒界⋯⋯」
「唔可以！」
代言人打斷士兵說話。
「太大代價，時空錯位即將降臨，地獄要保留最大戰力。」
代言人雙眼變紅。
「只好難為你哋，陪我走最後一趟！冥河見！」
「冥河見！」
兵士立正敬禮。
「各小隊！展開陣形！」
代言人係冥河衛隊保護下開始進行傳送。
============================================================================================
好，停一停，我又講個故仔。
劊子手
係小說、動漫、電影裏面，劊子手係形容殺人如麻既人，通常都武功高強、心狠手辣既人先有呢個稱呼。
但係，真實既劊子手，只係一個工作。而日本，都有一種叫「介錯」既身份，詳細就唔講啦，但介錯的確同劊子手好相似。
劊子手並唔擅長戰鬥，佢只係負責斬去人哋既頭，一個技藝高超既劊子手，可以一刀將頭斬下，令犯人受最少既痛苦。
而呢一擊，係神聖既、不可阻擋既。
============================================================================================
噬魔師四周環顧，視線停留係持斧巨人.菲身上。
「你。」
噬魔師指向菲。
「我欠你一斧，而家還你。」
全身銀甲既噬魔師衝向菲，菲雙手巨斧，準備迎面劈開噬魔師。
但噬魔師速度快咗好多，巨斧未劈落嚟，噬魔師已經繞到身後。
「我的確接唔到呢一擊。」
噬魔師右手拉弓，長矛對準菲既背後。
「但世上唔可以有噬魔師接唔到既招。」
矛尖係菲既心口穿出。
噬魔師拔出長矛，菲反身捉住噬魔師，雙手箍緊噬魔師！
「你永遠接唔到！」
「啊啊啊啊！！！！」
菲一邊怒吼，一邊用頭撞噬魔師個頭。
「渣滓！！！！」
噬魔師雙手變成烏茲，向菲腹部狂射！
菲無倒下，繼續用頭撞擊，撞至噬魔師既銀色頭盔破碎，再狠狠撞落噬魔師個鼻。
見到噬魔師鼻血如流，菲露出一絲笑意，慢慢跪下。
菲帶住微笑咁死去，但雙手依然緊緊捉住噬魔師。
「渣滓！」
噬魔師雙手變成闊刃，將菲既雙手斬飛。
長矛帶著銀光，直插心臟，一下拉扯，菲既心臟被長矛扯咗出嚟。
噬魔師凝視剛剛死去既心臟，左手掌心變成一個圓形既口腔，有同人類一樣既牙齒，左手慢慢伸去心臟。
在場既魔族都感覺到一陣心寒，望到自己既同族被虐殺，甚至變成食物，戰士們按耐不住憤怒，衝向噬魔師。
噬魔師露出滿意既笑容，一邊慢步走向代言人。
魔族戰士十二人，有人手執長刀，有人使用弩箭，槍矛行先，多個角度直攻噬魔師。
噬魔師無停止步伐，只見一陣銀光閃過，手執槍矛既兩位戰士，心口已被刺穿，但戰士並無倒下，咬緊牙關向前進攻，又一陣銀光，戰士被攔腰斬開。
噬魔師無停止步伐，一面既笑容，令人覺得身邊既殺戮與佢無關。
「邊個做導遊帶我行地獄，我可以考慮放過佢。」同時又有幾個魔族戰士被貫穿。
持弩戰士向噬魔師射出一箭，弩箭被凌空斬斷，接住幾十枝銀箭射向持弩戰士，頭、頸、心臟，每箭都直取要害。
終於，衛隊全部人都倒下。
只剩低代言人，同受重傷既巫妖同魔眼。
「今次，我要吞噬你，靈魂連同你既血肉。」
噬魔師收起長矛，兩手變成銀爪。
「然後再將成個魔族連根拔起！」
噬魔師腳下既土地開始裂開，裂縫中發出紅色既光芒。
「你唔會有機會！」
代言人浮係半空，傳送已經開始。
「毀滅咗魔族，基督都要睇我面色！」
噬魔師一下跳躍，如流星般直取代言人。
巫妖用剩低既手施展法術，死去戰士既兵器浮起,箭一般射向噬魔師。
噬魔師瞬速擊落兵器，衝刺既速度減緩少少。
「對唔住，代言人。」
巫妖心帶不甘。
「已經足夠。」
噬魔師貫穿代言人瞬間，地獄又變回秘室。
一陣紅光閃耀,光芒強到亞雷同但丁都無法直視。
當亞雷睜開眼,望到既已經係一個修羅場。
沉默既巨人, 不屈既戰士,都已經倒在血泊中。巫妖-亞雷既導師,都失去咗一隻手。
魔眼都身受重傷。
一個身穿銀甲既男人,一手貫穿咗代言人。
亞雷認得,呢個人就係剛才想殺佢同但丁既男人。
「渣滓!」
噬魔師左手變成大刀,一擊將代言人斬首。
「就憑你哋幾隻惡魔想愚弄我!!」
噬魔師已經憤怒到極點。
面對如此恐怖既敵人,亞雷無意識下發動體內被隱藏既力量。
巫妖先察覺到亞雷同但丁係佢身後。
「你哋走!」
但亞雷既力量已經吸引噬魔師既注意。
「細路!原來你先係大獎!」
巫妖單手唸咒,數十塊石碑困住噬魔師。
「亞雷!走!」
亞雷終於知道發生咩事,但依然無離開既念頭。
但丁想跑去救魔眼,被魔眼阻止。
「但丁!保護好亞雷!帶佢離開呢度!」
突然,一陣無形既刀鋒,將石碑轟開。刀鋒貼近地面,
飛向巫妖膝頭,削走巫師雙腳。
噬魔師係石碑中飛出,直衝亞雷,亞雷一時反應唔嚟。
噬魔師雙手合十,化作大銀劍,一擊劈向亞雷!
但丁擋到亞雷身前,企圖用雙手擋刀。
係噬魔師眼中,呢位用徒手擋佢刀既細路,絕對比佢痴線。
但係但丁已經無任何方法,佢想怪魔眼,點解一把武器都無留比佢,或者佢想咁樣去責怪魔眼,話比魔眼聽,佢係因為咁死咗。
但丁。
......?
你想死呀?
我死...都要救佢。
咁你死咗,咪又係到佢死。
......
死唔好受,我啱啱死完。
......
你召喚我,我救你。
你係邊個...?
你知我係邊個。
死亡天使....
我生前係呢個名,但你要叫我另一個名。
......
「輪迴!!!」
一把被紫色妖氣包圍既太刀,係但丁手上出現。
紫氣漫延既太刀,與銀劍交鋒,紫氣流動變得怪異,慢慢集中在交鋒處,好似想爬到銀劍身上。銀劍對紫氣非常抗拒,發生空氣被割開既尖刺聲。
噬魔師急退到十米外,似乎唔相信,一個細路、一把爛刀,竟然將佢迫退。
而但丁抵擋唔到刀劍相交帶嚟既震盪,成隻右手麻痺,無法握刀再戰。
「用亡靈既意志化做武器...所以我一直唔想你有武器.....」
此刻魔眼自言自語,佢勉強起身,擋在噬魔師同但丁之間。
巫師失去雙腳,雖然清醒但已經無力再作戰。
望到照顧佢多年恩師如此狼狽,亞雷依然忍住眼淚,走去捉住但丁隻手。
「老師,我走啦。」
巫妖勉強露出笑容。
「走啦衰女,唔好返轉頭。」
噬魔師單膝跪地,雙手變化成一個銀色既底座。
但丁想掙脫亞雷,但係亞雷隻手變得異常有力,亞雷扯住但丁往秘室出口跑去。
但丁不停止拉扯,但依然無法阻止亞雷既腳步。
「師傅!!師傅!!」但丁聲嘶力竭咁叫,但離佢師傅愈遠。
魔眼無回頭,無回答,只係拔出雙槍,正面對決噬魔師。
「點會比你哋走!」
銀色既基座形成兩枝戰機級既火神機槍。
亞雷拖住但丁跑出秘室,巫妖即刻用剩低既左手施法,巨大既石碑頂住出口,將秘室密封。
「你哋死咗就到佢地死!!根本無用!!」
火神炮橫掃整個秘室,槍管既光芒照耀整個房間,魔眼不斷往火神炮射擊,銀彈如雨水般打在魔眼身體,
左手被打斷,右手繼續射,直到彈道瞄準到頭部,魔眼先失去平衡,被銀彈既衝擊彈開,釘在牆上。
神殿既廣場佈滿屍體，想必剛才進行完一場惡戰，噬魔師先記得，佢搵過一個「天使」引開咗地面既惡魔，自己就去奇襲代言人。而「天使」早已經不見蹤影，只有一個白色雨衣既少女，凝視噬魔師。
少女眼神無任何光澤，白色既雨衣一直滴水，但外面只有強烈既寒風，從未落過雨。
噬魔師感覺到佢唔係惡魔，但又唔係人類，當然唔會係天使。白衣少女既氣息十分自然，就好似空氣一樣，你唔會察覺到，但佢係確實存在。
噬魔師面對眼前完全未知既生物毫無興趣，佢更想追上但丁將佢殺死。正當噬魔師想準備離開時，白衣少女率先開口。
「佢兩個唔死得。」
原來白衣少女都係知情人，噬魔師停低腳步，雙手伸出長刃。
「將你所有知道既講出嚟。」
「無論咩生物都好⋯⋯都有一個靈魂，有強大靈魂既人，自然變得強大。」
白衣少女無視噬魔師既警告，低頭自言自語起來。
「我就係要收集強大既靈魂⋯⋯為咗神⋯」
白衣少女抬起頭凝視噬魔師。
「我從未同其他人講過呢d,我同你講就係希望你唔好再亂嚟。」
噬魔師露出不屑既表情。
「我亂唔亂嚟我唔知，但係⋯⋯」
「收聲！」
白衣女子既語氣更為嚴厲。
「你只係一個『容器』，我係同你主子講緊！」說罷，白衣女子指向噬魔師。
噬魔師憤怒到咬牙切齒，咬到牙齒發出「格格」聲響。手中既利刃已經蓄勢待發，但偏偏噬魔師無作出攻擊。
白衣少女無視噬魔師，繼續說話。
「係神既眼中，所有靈魂都係平等⋯但你⋯根本無靈魂⋯只係一個被製造出嚟既殺戮機器。」
憤怒既噬魔師突然靜止落嚟，雙手下垂，頭部無力咁向下望。
「神早已經消失⋯⋯當暴力變得合理，打壓被當成平常既時候，說明神已經不復存在⋯⋯」
突然一陣寒氣包圍白衣少女，白衣少女感覺到呢陣氣唔係寒風，而係一陣極為強大既殺意。
「如果你再唔收聲，就算你有幾崇高既血統，你一樣要死。」
聲音並唔係由噬魔師發出，而係從天而來。
白衣少女毫無退縮，但無人留意到，佢雙手有輕微既震抖。
「偽神，你可以控制到蒼藍既天空，但無可能控制到黃色大地既靈魂。」
神秘既聲音再無出現，隨之而來係強烈既喘息，噬魔師慢慢抬起頭，雙眼充血，口中流出唾液，全身肌肉都震抖緊。就好似一隻餓瘋既鬃狗望住獵物既眼神咁望住白衣少女。
「上帝⋯⋯我⋯⋯既真主⋯⋯殺你⋯」
噬魔師一邊喘氣，一邊勉強講出幾個單字，明顯係因為佢既身體，根本負荷唔到自己既力量。
噬魔師身上既銀甲變成肌肉既形狀，變成一個銀色既肌肉人。
噬魔師左腳向前踏出一步。
「嘭！！！！」一聲強烈既爆炸聲。
爆炸並非來自火藥，而係來自空氣，
皆因有物體比聲音更快，突破音障，形成了「音爆」現象。
噬魔師已經在白衣少女身後數十米，右手攞住一塊白衣碎布。
跑出了六、七公里，亞雷確定無人追上，終於停低腳步，雙腳一軟，坐係地上。
但丁將輪迴收起，心裹面萬分憤慨，面對自己既無力，想將一切向亞雷發泄，怪亞雷點解可以咁狠，對自己師父見死不救。
「你！！⋯⋯」但丁捉實亞雷肩膀轉過來。
月光照耀下，亞雷滿面淚光，原來佢早已經成淚人，只係為咗之後既路，一直咬緊嘴唇唔出聲。
此刻，亞雷終於忍唔住，失聲痛哭。
失去重要既人，亞雷已經唔係第一次，但偏偏呢種經歷無法習慣，每一次都如此痛。
這種傷感，連但丁都感覺到。
但丁伸出震抖既右手，撫摸亞雷的頭髮。
「我哋搵地方避一避先⋯」
但丁停一停頓。
「之後既路，由我帶你。」
在另一面，神殿秘室內，一名黑袍人越過破碎既石碑，黑袍緊貼著佢既肌膚，顯露出姣好既身段，竟是一個女人，手中抱著正睡得甘甜既嬰兒。
女人走到魔眼屍體跟前，露出惶恐既眼神，似乎唔敢相信身經百戰既魔眼，死得如此狼狽。
地面傳來陣陣既「爆炸」聲，經歷大戰既秘室，漸漸承受唔起衝擊，天花開始碎落，隨時有塌荒既危險。
黑衣女恐怕嬰兒被碎石擊中，將嬰兒抱得更緊，並急步離開秘室。想到之後何去何從，黑衣女眼淚忍不住奪眶而出，但懷抱中的生命、溫度令佢堅強起來。
生命既逝去，可能係為守護新生命的開始，魔眼如是，巫妖如是。無論係因為重要既使命，或者基於最單純既愛。
後記：
黑街既清晨，比平日更熱鬧，人民忙於湊熱鬧，警察就忙於驅散湊熱鬧既人。
因為噚晚發生一次爆炸，將黑街近郊一所古老神殿炸毀。此神殿早已被列入世界文化遺產，但政府一直疏於管理，而今次爆炸，警方向外宣布係針對宗教既恐怖襲擊。
神殿早被警方封鎖，連世遺組織並被拒絕內進，組織人員得知後氣憤到聲言要向聯合國對土耳其提出訴訟。
噬魔師昏迷係擔架上，全身被綁上，生命反應正常，傷口被銀色既金屬覆蓋，連救護員都唔敢接觸佢。
「請將呢位傷者交比我哋。」
兩名傳教士服飾既人走近擔架，警長點頭示意許可。
「我希望帶走所有調查到既資料。」
傳教士微笑咁同調查員講。
一名年輕氣盛既調查員不滿，走向前對質：「你無咁既權利干預現場！」
調查員一講完，就被調查組長狠狠打一巴掌，組長轉頭向傳教士致歉，之後將年輕調查員拉走。
「你想有命繼續生存，就要清楚邊d要求係唔可以拒絕！」
傳教士接過現場既調查報告，以及國際刑警既資料，登上直升機，而昏迷既噬魔師都被移上直升機。
傳教士打開資料夾：
檔案編號：X940765
犯人姓名：未知、給予代號<puzzle>
年齡：未知
性別：女
樣貌：多名目擊者形容均不一致，無法確定樣貌。
詳細：自1934年多起神秘謀殺案，其中死者身上某器官被切割，目擊者均表示一名身穿白色雨衣的女性於現場與死者接觸，累積案件已有164個，遍佈全球，當局推測可能屬於某宗教組織的祭祀，不排除為「超自然案件」，現「puzzle」被列入一級通緝現行犯。
外傳二：完結