《情困之時，我遇上了自稱情性的情聖》: [Case 14－我的米奇] PART 01
我一個女仔，坐喺一間以黑色為主既咖啡店裏面...係我一個舊朋友所開既咖啡店～
呢間店名寫住“Whirling Coffee”既咖啡店～
Whirling～
真係好巧合～
不過我會認為係命中注定多D～
由細到大，我都相信命中注定～
命中注定要我遇上一隻叫做Whirling米奇～
命中注定喺我去日本留學既時候又遇到一個叫做Whirling既男仔～
Whirling呢個名唔常見...但就俾我遇到兩個男仔用上呢個特別既名字～
係唔係好命中注定呢？
咁都未算～更命中注定既係嗰個自稱情性既情聖竟然約我黎呢道見面...
邊個情性？
講起上黎...就真係奇妙～
是咁的～
就喺尋晚沖完個靚涼之後，我瞓喺張大床上睇下個私家偵探幫我影返黎既相同資料之時...
『哎呀～陳飛揚丫陳飛揚～究竟我點先可以埋到你身丫？』我拎住部iPad喺床上碌下碌下...
睇住飛揚BB同佢個港女女朋友一齊D相...
飛揚BB既女朋友叫乜名話？
好似係叫Aslhyn...Ashyln...Ayhihen...Ashly...
唔鬼記得喇！總之就係八婆死港女啦！
點八婆死港女法？
就係睇D相知啦！
你睇你睇...張張相都影住我既飛揚BB跟喺條港女八婆Ashly身後...
做乜姐而家？佢係你男朋友黎架嘛…你當佢狗咩？
個死人樣仲要得得戚戚不可一世咁...
做乜姐做乜姐？你唔係真係以為自己好靚女丫化？！
再靚女咁又點姐？你咪又係一條死港女！
真係唔明點解飛揚BB會同呢D港女一齊...
仲要一直都唔識得反抗！
你係唔係好男人到咁既地步丫？
就算係好男人丫...都要睇對象架嘛…
呢個Aslhyn...Ashyln...Ayhihen...Ashly...根本就唔值得你對佢咁好！
佢根本就係當你係工人...當你係奴隸...當你係阿四咁點你點你再點你...
唔止咁...仲當你係ATM咁撳撳撳撳撳...
你喺我姑丈間爛鬼公司道打工已經夠晒辛苦...人工又少...
辛苦搵返黎D錢就進貢晒俾條八婆死港女...
樣樣都係俾最好既野佢...自己就連食多餐都唔捨得...
見到你咁...我真係心都痛埋...
『你丫～正一係笨蛋黎架～』我篤一篤飛揚BB塊面～
唉～究竟我點先可以帶你出苦海呢～
我趴喺張床道，繼續睇下飛揚BB D相～
但每當我見到嗰個...Ashlynn！係喇！條港女係叫做Ashlynn！（改個名都鬼死咁難記！扮晒野咁！）
每當我見到嗰個Ashlynn個死人囂張樣我就扯火！
『囂張得你...囂張得你...好！等我畫花你塊面，睇你囂張得去邊！』我就開一開個畫圖App～
我逐張逐張咁開出黎畫～
喺嗰條港女Ashlynn面上係咁畫下畫下～
畫到成隻花面貓咁～
『哈哈～畫到你花面貓～畫到你成隻花面貓咁～睇你囂張得去邊～』我繼續好開心咁畫畫畫畫畫～
畫畫下...部iPad突然閃左一閃...
『嗯？彈App？呢個App又會咁唔穩定既？唔緊要啦～再開過～』我就想開一開返個畫圖App出黎～
但就喺神推鬼擁之下，我撳左落去個Facebook App道喎！
趴喺道撳果然係會手殘～
不過唔緊要啦～反正今日都無乜點開個Facebook～就開黎睇下啦～
我睇一睇個Facebook...嗰九百幾萬個通知...如果要我逐個睇...真係唔知要睇幾耐～
所以我都係隨便撳一撳開佢就唔理佢～
我碌下碌下個Facebook...隨便睇一睇D相...
喺我個Facebook裏面既“朋友”...唔計“HI～做個Friend～”嗰D無聊人之外，大多數都係D富二代...
佢地Post親D相唔係買左第幾架Ferrari...Lambo...Pagani...Bugatti...Koenigsegg...就係買左第幾架遊艇...飛機...大炮...坦克車...
個個就係識得耀富...
其實有乜咁好耀？
D錢又唔係用你自己雙手搵返黎...
D錢仲要係人地既血汗錢...
人地辛辛苦苦搵返黎，你就當係你自己既才幹...
不知所謂...
不過講真嗰句...如果唔係陳飛揚一句叫我唔可以咁任性...又如果唔係去到日本留學，識到岳飛揚呢個自力更生既富二代...我諗我而家都只不過係一個不可一世既大小姐～
講起上黎...呢兩個飛揚真係...影響得我好深呢～
嗱！深還深丫！我對岳飛揚係無野架！我只係鍾情於陳飛揚一個架咋！
我只係當岳飛揚係我既啟蒙老師架咋！
我係一個好專一同長情既女仔黎架！
不過講開又講...兩個飛揚都係叫Whirling...真係巧合～
或者...呢D就叫命中注定啦～
我繼續趴喺張大床上，對腳踢下踢下咁碌下個Facebook...
碌下碌下...我好似見到有句說話好似係乜乜情困...
我立刻碌返上去...睇一睇清楚...
我見到有個叫做...情性既Page俾個Friend Like左...（當然我就唔記得呢個Friend係唔係真係Friend黎啦...）
情性？個名咁搞笑既？
有情有性丫？
咩情咩性都好，都唔係重點...
重點係當我撳一撳入去呢個叫情性既專頁之時...
『只要你不是師生戀，所有情困我也可以為你一一解開？』我望住個置頂Post...
所有情困...也可以...一一解開？！
情困？
我而家又算唔算得上係有情困呢...
想埋一直深愛既男人身...但一直都無咁既機會...
或者...話唔定呢一個人...呢個自稱情性既人...可以幫我諗諗計架喎...
『唔...好啦～就試試佢啦～』
我喺個Facebook Messenger隨便打左幾隻字：“我有情困”
唔駛幾秒就有回覆～
我睇一睇個Message Box...係一個日期、時間、地點...
係要約出黎見面嘛？
我再睇一睇個地址...
『呢個地址咁熟口熟面咁既...』
唔...我諗都無乜問題既～老老實實，再難應付既人我都有辦法應付既～
就應承左佢先啦～
“OK”
“到時見。”
夠爽快～我鍾意～
所以我就喺今日，黎到岳飛揚開設既咖啡店－Whirling Coffee，等一個自稱情性既情聖～
坐喺張白色梳化上，飲住我最深愛既男人唯一接受得到既啡咖－拿鐵咖啡～
成間咖啡店就只得一個女仔打理～
岳飛去左邊呢？
點解自己唔黎幫下手呢？
仲諗住可以聚聚舊添～
不過講真，我都係岩岩上到黎見到D相先知呢間Coffee就係佢之前同我講開黎賣下相搵食既Coffee～
你話係唔係真係好巧合呢～
而點解岳飛會咁放心交間Coffee俾呢個女仔打理呢？
係因為...呢個女仔就係佢之前所講既一直都喺道等梗既嗰一隻青鳥？
唔...睇起上黎又唔似…
我仲好記得岳飛話過，嗰個女仔係同佢小學時候同班一年...好似係五年班？定係六年班？
應該係六年班...
之後就係因為岳飛全家要搬去日本搞生意，所以就同佢隻青鳥分隔兩地...從此仲要音訊全無添...
而睇眼前呢個女仔...好似都仲細過我...
我諗都係應該岩岩中學畢業咁上下～
而且...岳飛好強調咁話佢隻青鳥係好聰明～好獨立～細細個就已經好識得照顧自己～
而喺眼前呢個女仔...總好似有D手忙腳亂咁～
所以...我諗唔係佢～
講開又講，佢返黎香港之前都有同我講過話係要返黎搵佢既青鳥～就連屋企既生意都唔理～（由識佢嗰日開始都知佢係唔理生意架啦～）
咁唔知岳飛搵返佢隻青鳥未呢？
反正我都返左黎香港～搵日約下岳飛出黎聚下都好～
之前喺日本留學既時候，岳飛一直都咁照顧我～
返到黎香港，又睇下有乜幫到佢都好喎～
當我拎住杯拿鐵咖啡飲下飲下，又諗下諗下之時...
「Sor...Sorry...我...我遲左…」一把成熟既聲音出現...
我望一望返前面，見到有一個貌似古天樂咁既人坐喺面前～
睇黎...呢一個人...就係我要搵既...情性...
我望一望住眼前呢名男子，佢既年紀應該都係同飛揚差唔多大～
都係大我兩三年左右～
兩三年左右就可以幫我解開情困？
唔...我就唔係幾信...
話晒我睇人都幾準～
之但係...睇呢個男仔既眼神...又好似...幾看破紅塵咁既樣...
難道真係有返咁上下經歷？
「你要既Espresso...」女店員手震震咁拎住杯咖啡...
「唔該…」情性接過咖啡後，眼甘甘咁望住我...「你...係...Lilian？Lilian Kan？」
『唔係…我唔係Lilian Kan…雖然之前已經有好多人將我認錯...但我始終都係我...我係Emma Lee！』已經唔係第一次...
之前去到邊都有人誤認我係Lilian Kan…
又有好多人都覺得我好似Lilian Kan…
之但係其實我就唔係咁鍾意...
「哦哦...Emma你好...唔好意思...我係估唔到呢個世界上竟然會有咁相似既人...呃...我係情性...」情性面紅紅咁講...
『你夠好似古天樂啦...』情性係怕羞嘛？
或者啦～
或者眼前呢個情性係Lilian D Fans啦～
「哈哈～都有好多人咁講過～之不過...我始終都係我...我係情性！」情性好堅定咁望住我。
做乜學我講野都可以好似咁理直氣壯咁架呢？
呢個情性...睇黎都係一個怪人...
「係呢...唔知你有乜野情困需要解決呢？」情性飲一飲啖咖啡，皺一皺眉...
『我...』情性突然咁樣問一問...我就唔兜圈喇！『我鍾意左一個男仔好多好多年！』
「哦...咁你同佢講咪得囉...你靚女成咁...有邊個男仔唔第一時間Say Yes？」情性冷眼咁望住我...
『有咁易就唔駛搵你啦...』我谷起塊面豬登，回返對冷眼俾情性...
「可以有幾難丫？」情性諗左一諗，「你講講你同佢係點識黎聽下先～」
『我同佢係點識架...講起上黎就一匹布咁長喇...是咁的～喺我十五歲嗰年，我同爺爺去迪士尼玩～我本來想同米奇影合照，但因為已經過左時間，所以無得影...嗰陣時既我，其實好任性...我大吵大鬧話要爺爺買左成個迪士尼，鏟平佢！等以後都無人可以再同米奇合照！』我都仲未講完...
「咳咳！咳咳咳！Excuse Me…」情性連咖啡都噴埋出黎...
人地講梗故仔...你就同我噴咖啡...算點...
「你話咩話？買起成個迪士尼鏟平佢？哈哈～」情性仲要笑起上黎...
『好好笑？我係李氏家族既千金小姐...有乜買唔到？』我帶住微笑望住情性...
「哈哈～哈...李氏家族…千金小姐…」情性呆左咁望住我…
『咁我可以繼續講落去喇嘛？』我再帶住微笑望住情性...
「請...請繼續...」情性乖乖地咁坐定定。
『喺我爺爺要打俾香港迪士尼既主席之時，米奇突然喺我眼前出現！米奇話可以同我合照～原因唔係因為我霸道～原因係因為我既堅持～一份對愛既執著～佢話同佢合照都得～不過就有一個條件...就係...“要應承我，以後都唔可以再咁任性。”～』我一口氣講晒成個故事出黎～
呢個故事...我每識到一個新朋友，都會同佢講一次～
我最愛將我既故事同我既新朋友分享～
「而呢隻米奇...就係你一直愛既人。」情性好認真咁打量住我。
『嗯～就係佢～咁多年黎我一直都有搵人去查佢～去搜集有關佢既資料～屋企有咩人～喺邊道讀書～咩成績～有咩朋友～拍過幾多次拖～打過咩工我都一清二楚～我就係等...等一個機會...等一個機會而做好準備...』我諗下諗下飛揚BB...點下點下頭...
「嗯...你都做好晒準備...咁仲有乜問題？」情性又飲一飲啖咖啡...
『我就係唔知點樣走近佢...一直都只係識得喺遠處望住佢...』一直都係...一直都係...
「直接行過去Say句Hi咪得囉～最重要都係你肯行出第一步。」情性點一點頭。
『但佢而家身邊有個女朋友喺道！』就好似有幅牆一樣...
「唔...係搶人男友...你本身已經夠晒屈機～就算人地有女朋友，你都一定可以搶到過黎～之不過...我並唔建議拆散人～“不可貪戀別人的妻子”喔～」情性擰一擰頭…
『之不過個女仔對佢都唔好！』直頭係衰添！
「唔...點先叫唔好？情侶之間...如果話唔好到背叛既話...先叫得上唔好...」情性點一點頭...
『背...背叛...』係...係背叛...
「至於點先可以試得出人地個女朋友會唔會背叛你最愛既男人...你係聰明女...你一定會諗得到...你既辦法出黎既...」情性奸險咁笑一笑…
『我...我既辦法...之但係...咁樣會唔會好任性？』我應承過飛揚BB唔可以再咁任性...
「會唔會好任性？難道你覺得你對佢所做過既一切...就唔算得上係任性喇嘛？」情性放下一句之後，就起身離開...
我望住再無咖啡喺裏面既咖啡杯...
我對飛揚BB所做過既一切...就唔算得上係任性喇嘛？
我對飛揚BB所做過既一切...都係為佢好姐～
我都只不過係想關心佢多D～了解佢多D～睇下有乜野可以幫到佢姐～
一直都係～從來都係～打後既日子都會係～
咁都唔可以算係任性架～
我只係做好事姐～
而如果飛揚BB個女朋友真係咁衰...衰到會背叛飛揚BB既話...我都只係幫佢早D認清佢女朋友既真面目...等佢可以及早脫離苦海～
無錯喇～我做既都只係好事～
做好事就唔算係任性啦～
至於要點樣先可以試到飛揚BB個女朋友會唔會背叛佢...
我打一打開個Facebook...開一開嗰個Ashlynn既Facebook睇一睇...
我之前都有講過...我手上係有齊晒有關飛揚BB既所有資料～當然就唔少得佢女朋友既Facebook啦～
我碌下碌下...碌下呢個港女既Facebook...
呢個港女既Facebook入面有好多相...不過全部都係影自己食梗好西～買左貴西～
擺又擺埋晒好似Model咁既Pose...真係以為自己好靚咁...
而喺D炫耀相之中，從來都唔會有飛揚BB既出現...
就算係飛揚BB揸機做攝影師幫佢影靚相，個Ashlynn都係提都唔提下飛揚BB...
好似好失禮佢咁…
有飛揚BB咁好既男朋友你仲想點丫死港女！
真係越睇越眼火爆！
越睇就越唔明點解飛揚BB會對佢咁好...
『傻瓜！』
碌下碌下...碌到我就快無眼睇之時...我見到一張相...
我碌一碌返轉頭...再睇真D...
我睇到Ashlynn Like左一張相...
張相入面係一對男女...挨住喺架銀色既Porsche影合照...
對男女都笑到四萬咁既口...
而張相上面仲寫住“又有男朋友車我去食Lunch～勁幸福～”...
情侶曬恩愛？呢樣野都唔係好出奇...
奇就奇在個男既睇起上黎都係D花花公子...而個女既睇起上黎又係一條死港女...
我再睇睇D留言...最上嗰個就係Ashlynn留既“好姊妹就幸福啦 葡萄死我牙”...
好姊妹...
港女識埋D咩姊妹？咪又係港女囉～我明既～
而更令我留意既係...一睇呢對情侶都知係D超級貪錢既人...
超級貪錢...咁就岩晒...
我好快手咁Add一Add呢個叫Amy既人...再留一句說話俾佢...“我有生意想同你傾 Message我”...
過左唔使一陣就有回覆...
“Amy：你係邊個？”
“我係李氏家族既Emma Lee 我有一單大生意想同你...仲有你男朋友傾下...喺Facebook裏面傾唔多方便 我俾我個電話你 用Whatsapp聯絡 如果你係有懷疑既話 可以睇下我Facebook裏面D相 有我同我Daddy既合照 你唔認得我 都應該認得我Daddy”
當我將我既電話號碼俾埋Amy之後...再過多五分鐘左右...
*噹* Whatsapp既鈴聲響起...
我開一開個Whatsapp...
“852 921...：你真係李氏家族既Emma Lee？我好似唔識你架喎...”
我將個電話號碼改返個名之後...
“識唔識唔重要 重要既係你地有野幫到我 我亦都有你地想要既野”
生意人...就緊係用生意口吻啦～爺爺教既～
*噹* “Amy：之但係我地都未見過面 你又點知我地可以幫到你...”
睇黎呢個Amy都好似唔係幾信我咁...
不過有一點可以肯定既係...佢係好貪心～
如果唔係...係唔信我既話就唔會再理我～
人就係衰貪心，先咁容易俾人呃～
貪婪喔～七罪宗～
“如果你想見面既話我都可以 我而家就喺一間叫做Whirling Coffee既咖啡店嘆梗咖啡 你地有興趣既話可以黎搵我 不過我只會再坐多三個鐘 三個鐘之後我就會走 到時你地想搵我 我都未必有興趣 大生意黎架 好好地諗諗”
我再將呢道既地址Send埋俾Amy之後...Lock一Lock部機...放鬆個人嘆下咖啡～
其實喺情性話“你係聰明女...你一定會諗得到...你既辦法出黎既...”我就諗到要點做...
或者我都真係...幾“聰明”既～
我就繼續喺岳飛間Coffee道睇下佢D作品～嘆下咖啡～
等左一陣...再等左一陣...等左差唔多有一個鐘...
我並唔心急～亦都無諗過佢地會唔會黎～
因為我知道佢地一定會黎～
貪心既人係唔會放過有得貪心既機會～
貪婪喔～七罪宗～
呢句說話真係可以成日掛喺嘴邊～
尤其係我地呢D生意人～哈哈～
“叮噹噹”掛係木門上既鈴鈴響起～
鈴鈴響得既…一定係佢兩個～
我坐左喺道咁耐...呢道都仲係無客人上黎～
唔係佢地…仲會有邊個？
我保持平靜咁繼續坐喺張梳化上～
等梗門口嗰對男女行過黎～
一對男女望一望住我，疑疑惑惑咁行過黎...行到我面前：「你...你就係Emma Lee？」
『嗯～我就係Emma Lee～請坐～』我帶住微笑望住對男女點點頭～
一對男女就坐到我對面張梳化上。
我隨便咁打量一眼個男既...一睇佢對鹹濕眼就知係一個專呃蝦條既賤男～
而個女既呢？好明顯就係為左錢可以出賣男友既死港女～
天造地設既一對呢～
「唔知李小姐想同我地傾乜野生意呢？」個女既單刀直入。
『Amy丫呵？夠爽快～我鍾意～我想你同你男朋友幫我做場戲～』我最鍾意就係爽快既人～
Amy同佢男朋友對望一眼...好似唔係好Get到我想點。
『我想你男朋友去偷食～偷食你個好姊妹...Ashlynn～』我望一望住Amy個男朋友笑一笑～
「下？！要James去食Ashlynn？！」Amy好大反應咁～
哦～眼前呢個賤男叫James～
都幾襯～
『係丫～我要你個James去食Ashlynn～仲要背住你～明食Ashlynn～』我再三強調～
「唔得！我點可以要我男朋友去食我既好姊妹架？」Amy堅決Say No。
「係囉！就算我女朋友肯丫，我都唔會做D對唔住我女朋友既事啦！」James扮晒野咁。
我睇死你平日都有出去偷食開架啦～
由你一入黎就掃視晒我全身都知啦～
仲扮乜野丫？
我豎起一隻手指：『一千萬～』
Amy立即回應：「一千萬？一千萬就想買起我同James既良心？一千萬就想買起我同Ashlynn既感情？便宜左D喎～」
良心？良心價幾多錢丫？你有得賣，我都會買～
唔記得左之前喺邊套戲聽過呢句對白添～
『每人一千萬～每人一千萬已經做到好多野～最起埋夠你供完你架爛鬼Porsche～買多兩層樓再買多架Ferrari都仲得～』我係唔會叫你地買Lambo既～因為Lambo只係襯得起我個飛揚BB～
Amy同James又對望左一眼...諗左一諗...
『唔好同我討價還價～更唔好浪費我既寶貴時間～我份人一就一，二就二～兩個人加埋都成二千萬…機會難得...唔好諗咁耐～』我好認真咁望住眼前呢對狗男女～
「嗯...之但係...點解你要我地...咁做呢？」Amy問左D唔應該問既野。
『好奇害死貓～有D野唔好知得咁清楚會比較好～你只要知道你要點做就足夠～』知得越多會越危險～
Amy同James對望一下之後點點頭：「嗯嗯...明白...明白...咁你想我地點樣...進行？」
『嘿嘿...咁你地就要留心咁聽我講喇喎...』我古古惑惑咁望住Amy同James～
奪取飛揚BB大作戰正式開始！（呢個行動代號會唔會好似有D唔貼題呢？）