一早起身梳洗好~

隨便食個早餐~

隨便換左套衫~

今日飛揚BB請左假陪佢細妹嘛~無飛揚BB喺道,我就隨隨便便啦~

係咁架喇~係咁架喇~總會有懶惰既時候架嘛~





扮得咁靚都係為左俾自己最深愛既人睇姐~唔通真係扮黎俾街外人睇咩~

只要齊齊整整就得啦~

丫!仲有一樣係唔可以唔記得既!就係打電話搵姑丈!

我拎一拎起部電話,打一打俾姑丈...

「嘟...嘟嘟...嘟嘟嘟...嘟嘟嘟嘟...喂…」姑丈死聲死氣咁...好似仲係熟睡緊咁...





『姑丈...起醒喇...唔好掛住瞓喇...』我冷冷淡淡咁叫一叫姑丈起身...

「咁早打黎咩事丫...」姑丈仲係死聲死氣咁問...

『起身開門丫...』打俾你就梗係為工事啦...唔係我都唔會無啦啦打俾你啦...

「開咩門丫…你上左黎咩...」姑丈仲係死聲死氣咁九唔搭八…

『上咩黎丫?我講公司道門呀!』你又諗左去邊呀?!





「咩公司道門丫...公司道門不嬲都係飛揚開架啦...」姑丈仲係語無倫次咁既樣...

『飛揚B...飛揚今日請左假丫嘛!你唔記得丫?』差D口快快噏左“BB”出黎添...

「飛揚請左假咩?幾時話請架?我有話批咩?」姑丈好似唔認數咁既口吻...

『係你自己親口話批架!我都在場架!我都聽到架!你快D返去幫我開定門啦!』我真係唔想同你講咁多!

「咁...咁...咁咁你都請埋假啦...反正你返去都無野做架啦...」姑丈仲係好唔願幫我開門...

『邊個話無野做架?!我唔理你呀!你而家快D返去同我開定門等我返黎!唔好要我等!係咁多!』講完之後我就立即Cut線!

同你呢D人講多都嘥我時間!

本來有D唔舒服...心情已經唔係咁好...(尋晚裸睡完今朝起身先發現差唔多到嗰D日子...)





而家仲要俾個懶過隻豬既姑丈激一激...

心情真係差到一個點丫!

唉...等等返到去...仲要見唔到飛揚BB...

今日睇黎真係唔多吉利呢...

我就帶住灰灰既心情揸車返工...

一路上我都開得好慢...

一波咁行晒成程路咁制...





無黎心機咁泊好架車...又無黎心機咁行到返黎公司...

「Emma返黎喇~」姑丈就烚熟狗頭咁開門歡迎我...

『嗯...』好彩姑丈都聽聽話話真係返左黎開定門等我...

唔係既話?我實發佢脾氣!

「Emma丫~唔知你仲有乜野吩咐呢?」姑丈扮晒好似等緊俾我點咁...

『無喇...無你既事喇...你放低條鎖匙就返去啦...』我就真係唔想見到你囉...

「真係無用得著我既地方喇嘛?」姑丈仲要繼續扮晒熱心咁...

『你係唔係想留低幫手做晒飛揚D野先走丫?』我冷眼望一望姑丈...





「唔係唔係~佢唔喺道咯…我就無謂搞亂晒佢D工作啦~」姑丈仲要講到飛揚BB好似死左咁...

『咁你仲唔走?』我繼續冷眼咁望住姑丈...

「好好好~我而家就走丫下~有乜需要就Call我啦~我會立即過黎幫你架喇~拜拜~」姑丈放低條鎖匙之後就急急腳行出公司門口...

我坐一坐喺張凳...挨一挨…伸長對腳仔:『唉~得我一個人既公司喔...』

我搖下搖下...擺下擺下...懶洋洋咁...望住個天花...

一個人喺間細細既Office裏面...一D生氣都無...人聲都無...就係得D冷氣聲...好悶...

返左黎五分鐘都唔夠...就已經覺得好悶...好悶...好鬼悶...





究竟之前飛揚BB係點捱架呢?

飛揚BB...飛揚BB...我又諗起你喇飛揚BB...

我真係無時無刻都會諗起你呢...

唔知你而家做緊乜呢?

唔知你係唔係同緊你細妹玩得好開心呢?

唔知你又有無諗起我呢...

諗起我地尋日喺迪士尼一齊玩得好開心既美好時刻...

美好時刻...幸福時刻...

我一個人...挨喺道諗下諗下...頹下頹下咁...

頹左好一陣子...頹左都有差唔多成個鐘...

『唔可以咁頹架~唔可以咁頹架李家敏~飛揚BB一個人都可以完成到好多艱辛既工作~我都可以!我都可以!』我就坐返直個人!

開一開機!

等到登入左桌面之後就開一開E-mail!

Check下有乜野要做!

然候就努力工作!專心工作!等到飛揚BB返黎唔使咁多野做!可以有多D時候陪我傾計!

『好!做野!』

我好俾心機咁畫畫畫畫畫~

畫起一份就Send俾個客~

不停畫又不停Send~

好彩既係個個客都收貨喎~唔使再花時間去改~

一做就做左差唔多一個上午~

『呼~搞掂晒~』我拍一拍對手~挨一挨喺張凳上面~

真係勁多野做丫~

飛揚BB實在太多野做喇~

我只係做左一個上午,都覺得就快要攰死喇~

究竟飛揚BB平日係點捱得到架?

日日都要Keep住呢種戰鬥狀態...個人真係會好攰架喎...

好攰好攰...好攰好攰...

『死喇死喇!唔知有無殘到添架!』我立即喺個手袋仔裏面拎出把鏡仔照一照...

我照下照下...好仔細咁左照照...右照照...

『死喇死喇!好似真係多左兩條細紋丫...』睇黎今晚要去美容院做返個深層Facial先得喇!

我緊緊張張咁照下照下...又偷偷望下望下飛揚BB個位...

照下照下…又偷偷望下望下...

偷偷望下望下...

望下望下...

而家公司都無人喺道...我好唔好...好唔好偷偷咁...偷偷咁坐下飛揚BB個位好呢?

我咬下咬下唇...眼定定望住飛揚BB個位...諗下諗下...

偷偷咁坐下飛揚BB個位...會唔會好...好奇怪呢...

無啦啦走去坐人地個位喎...好似好奇怪咁喎...

奇怪?有乜咁奇怪姐?中學既時候都會不時走去同學個位道坐下架啦~

之但係...中學就話無乜所謂姐...

咁而家又有乜所謂呢?

唔係喎…而家我係趁住飛揚BB唔喺道...偷偷坐佢個位喎...

咁中學既時候好多時都係個同學行開左先坐佢個位同其他同學傾計架啦~

但而家係無啦啦走去過坐喎...

咁我係女仔黎架嘛~八卦下同事個位係點都好正常姐~

係咯係咯~我係女仔黎架嘛~點都會有D八卦之心架嘛~

坐一陣姐...滿足一下好奇心姐...都唔係好奇怪姐...

一陣姐~一陣姐~好啦好啦就一陣啦~

我就鬼鬼祟祟咁彈下彈下咁彈到去飛揚BB個位道~

輕輕咁坐一坐喺飛揚BB張凳道~

『哦?原來飛揚BB張凳係咁...咁淋架...』我輕輕UN下UN下~

睇黎已經坐到無晒彈性...

搞到個屁股唔係咁舒服咁...

坐到咁唔舒服...點解飛揚BB唔換左張凳去呢?

唔...

我再望望飛揚BB既檯頭,總係有D亂咁~

『飛揚BB真係好多野做呢~』見到張檯咁亂,本來想幫佢執執~

但如果幫佢執既話,咪知我坐過佢個位囉?

都係唔好…都係唔好…做鬼祟野唔可以俾人知~

我就再坐喺飛揚BB張凳道望下望下~

望下門既方向~原來道門會俾檯頭個Mon岩岩好遮住左架喎~

要望出去就要探一探頭~

我又再坐喺飛揚BB張凳道望下望下~

望返過去自己個位...原來可以好清楚咁望到我坐既位置...而且仲...仲可以好清楚咁望到下面...望到對腳...

坐喺呢個位置...原來係可以咁清楚咁睇到...我對腳...好似連裙邊都睇得到...

唔怪得飛揚BB成日都偷望我對腳啦~

坐喺呢個角度...又真係幾…真係幾好望既~

呢個飛揚BB真係丫~

我就繼續坐喺飛揚BB個位道轉下轉下~望下望下~

感受一下飛揚BB坐喺道工作既感受~

又望下飛揚BB坐喺道會望到D乜~

呢種感覺...好似同飛揚BB好親近~好親密~

我望下望下...望到檯頭上個Mon...

唔...飛揚BB日日就係對住呢個Mon專心工作...

呢個Mon...呢部電腦...

我好唔好...開一開部電腦...體驗一下...睇一下...

睇...體驗一下姐...體驗一下飛揚BB平時用黎工作既電腦姐...

都係公司野黎姐...應該無乜野...無乜唔見得人既野既...

就喺我手震震咁隊隻手指落到去粒Power掣道之時...

“And you don't seem to understand”

『嘩呀!無丫無丫!我唔係想偷睇你部電腦架!』我嚇到花容失色咁既樣!

“A shame you seemed an honest man”

等陣先…

“And all the fears you hold so dear”

係我既電話響喎...

“Will turn to whisper in your ear”

係丫…係我用左“Duvet”黎做鈴聲...

“And you know what they say might hurt you”

差D連自己都唔記得...真係嚇親~

都係快D聽電話先~

我急步咁行返埋自己個位~喺檯面上拎一拎起部電話一睇...

『私家偵探?』我好自然咁滑動解鎖,『喂?』

「李小姐...我岩岩發現到D重要野要同你匯報...」私家偵探有D緊張咁...

『哦...你講啦...』我就輕輕坐一坐低...

平時都係月尾先會打黎匯報一下,又或者Send D E-mail俾我睇下咁...

今次有乜事咁重要要咁突然打黎搵我呢?

「喺電話道傾唔係咁方便...我諗約一約出黎傾會好D...」私家偵探仲好緊張咁...

『哦...』仲要約出黎傾添...

「咁你而家方唔方便?」私家偵探好心急咁問一問...

『方便既…』仲要係而家添?

「咁邊道近你丫?」

『唔...半個鐘後朗豪坊間Starbucks等...』

「嗯...咁就半個鐘後朗豪坊間Starbucks等...到時見...」

唔...究竟係乜野咁大件事...要約出黎匯報呢?

唔...算啦~反正都要食Lunch~就去Starbucks一邊聽佢匯報~一邊食少少野啦~(尋日食左咁多…今日要食少D先得喇...)

我就執一執好D野~

確保Save好晒所有文件~

熄一熄燈~鎖一鎖門~就向朗豪坊出發~

輕輕鬆鬆咁行到過黎朗豪間Starbucks~

我買左杯拿鐵咖啡再加多碟芝腿脆多之後,就坐喺落地玻璃窗旁D梳化位道等私家偵探黎~

嘆住杯咖啡~切下切下件芝腿脆多~細細塊細細塊咁食~

輕輕鬆鬆咁等左一陣...

「Sorry…Sorry…要李小姐等我真係唔好意思...」私家偵探就滿頭大汗咁走到黎我面前...

『係我早到左姐~坐丫~抹下汗先啦~』我望一望呢個滿頭大汗...著住恤衫西褲大約五十幾歲既男人...

呢個中年男人...就係我一直用開既私家偵探...張生...

呢個張生既私家偵探社好有規模~

之前一直都有幫我跟住飛揚BB...

我見佢地一直都幫我跟得好好...所以而家亦都有搵佢地幫我跟住姑丈...

正確黎講係幫我查姑丈外面D女人...

「咁急請你出黎真係唔好意思...因為呢件事都幾…幾重要下...」張生一邊抹面上既汗...一邊講...

『唔緊要~反正我得閒~咁究竟係乜野事咁重要?』我飲一飲啖咖啡~

「係關於...」張生諗左一諗,「你姑丈出面個女人既事...」

『我姑丈出面個女人既事好重要咩?重要到要我出黎聽你匯報?』我冷眼望住張生...

「唔係唔係…」張生好驚咁Fing晒手...擰晒頭,「唔係咁簡單...」

『哦?咁你繼續講啦...』我再飲一飲啖咖啡...

「你姑丈出面個女人...係同另外嗰個目標人物...陳飛揚有關...」

『同陳飛...唔!』我嚇左一嚇!差D連咖啡都噴埋出黎!

係同飛揚BB...同飛揚BB有關?!

點解會係同飛揚BB有關?

所指既有關...又係關於D乜?

「正當我地查到你姑丈喺呢一個月黎同一個叫做羅海月既女仔有關係...我地再深入D去調查一下呢個女仔既資料之時...我地發現到...呢個女仔係識得另一個目標人物...陳飛揚...」張生拎左部MacBook Air出黎...

個Mon裏面有D相...

有個女仔同我姑丈一齊既相...

D相唔可以話好清楚...因為大部份係夜晚既街道上影...

容貌唔係咁清晰...身形就好似...好似比較嬌小...

羅海月...

呢一個名叫羅海月...同我姑丈有關係既女仔...係識得...飛揚BB...

「我地好奇之下就留意下陳飛揚個Facebook同羅海月Facebook既動向...發現雖然陳飛揚無喺羅海月既Facebook留過言...但就經常喺凌晨時分上去睇一睇...」張生開左個圖表俾我睇...

係飛揚BB瀏覽羅海月個Facebook既圖表...

經常喺凌晨時分上去睇一睇...

「之不過...其實佢地已經好耐都無聯絡過...」張生好認真咁望住我...

『好耐都無聯絡過?』我追問一下...

「嗯...佢地都差唔多有十年無見過一面...無通過電話...就只有...喺大時大節又或者喺羅海月生日之日,陳飛揚先會Send一個Message俾羅海月...之不過就只有陳飛揚Send俾羅海月...羅海月從來都無回覆過...」張生好認真咁點點頭...

只有飛揚BB Send Message俾羅海月...

『咁飛…陳飛揚同羅海月係乜野關係?』點解好似...咁奇怪咁架呢?

「佢地兩個...喺表面睇黎係乜野關係都無...最多都只可以話係...舊情人...」張生點下點下頭...

『舊情人?』呢個羅海月...係飛揚BB既舊情人?

「嗯...我地查過喺佢地中學時代係同學黎...陳飛揚一直都暗戀住羅海月...之後佢地有喺埋一齊過...仲要係陳飛揚既初戀...不過時間唔長...好似都只係得三個月咁上下...而當期時羅海月係同緊一個叫程勝既人一齊...因為陳飛揚係第三者...係唔見得光...所有有關佢地兩個一齊既資料都唔係好詳細...」張生打一打開個文件檔...

我睇一睇個文件檔...裏面有好多資料...又有D羅海月中學時期既相...

呢個羅海月...總係好似...好似...笑面裏帶著點點哀愁...

總係好似...好似...

『裏面有佢既地址喇嘛?』我望住羅海月張學生相...問一問張生...

「嗯...有...有...喺呢道...」張生碌一碌...

『嗯...你將所有既資料都Send晒俾我...我會慢慢睇...』呢一個羅海月...

「嗯嗯...我已經Send晒俾你...仲有乜野吩咐?」

『繼續幫我查多D有關呢個羅海月既資料...所有所有...乜野都要...』一D都唔簡單...

「嗯...一定...我地一有乜野新發現就立即通知你...咁我走先...」

『嗯...』

張生離開之後...我就一直喺道諗...

飛揚BB既初戀情人...

總係令我覺得...覺得...覺得佢對飛揚BB黎講係好重要...

話唔定...

「或者遇到...不過已經飛走左...」

我要搵一搵佢...

我要親自搵一搵呢個女仔...

搵一搵飛揚BB既初戀情人...羅海月...

“吼~吼~吼~吼!”揸住LP 700-4 Roadster向住羅海月既住址衝...

我無諗過佢會唔會喺屋企...

我亦無諗過要用乜野開場白...

我一心就只想...只想親口問問佢同飛揚BB之間既事...

“吼~吼~吼~吼!”LP 700-4 Roadster喺屯門公路飛馳...好快就黎到羅海月既住所...

當我望住手機上所顯示既住址...行到黎鐵閘前...

『係呢道喇...』我毫不猶豫咁撳一撳個門鐘...

“叮噹”

唔使幾耐...木門打開...

我隔住道鐵閘...望住呢個長有黑色既頭髮髮長過肩...平陰...嬌小既身段...雪白既肌膚有如夜空明月照人...

仲有...一對帶著點點哀愁既眼神...總令人心裏有一份無名既悲悽...

就好似...岳飛...

呢個女仔...就係...飛揚BB既初戀情人...羅海月...

而家眼前既羅海月...相比起相片中既羅海月...動人...

唔知點解...我總係俾佢...俾佢吸引住...

「請問?」羅海月開口問一問...

『丫...我叫李家敏...Emma...』我俾羅海月吸引到唔知自己要講乜...

「姓李...Emma...」羅海月諗左一諗,「如果你係上黎問有關你姑丈同我之間既事既話,你可以走喇...因為我同佢好快就無拖無欠...各走各路...」

正當羅海月想閂返道木門之時...

『我今次黎係想問有關飛揚...陳飛揚既事!』我大聲咁講一講我今次黎既目的...

羅海月停左一停…諗左一諗後:「入黎先講...」

羅海月打一打開鐵閘...

走入羅海月既家...一個以白色為主既空間...

整個開放式既住所並無任何牆身間開,只有矮櫃、衣架作分間...

可以好清楚咁睇晒成個廳、睡床、工作空間、廚房...

整間屋既佈置都好簡約...

白色既牆身、白色既地毯、白色既皮梳化、白色既睡床、白色既窗簾布、白色既家具,有D似我間房...

唯一唔同既係牆上掛左唔少相,櫃檯上亦都放左幾張...黑白相?

「你係陳飛揚既...女朋友?」羅海月行左埋去個開放式廚房...

『唔係唔係!我...我係佢既同事...』又會咁...直接既...

「同事?真係咁簡單嘛?」羅海月斟左杯水,遞到我面前...

『唔...唔該…我...我...』我唔知點開口添...

「係佢叫你黎搵我?」羅海月見我唔知點答,又問一問...

『唔係唔係!佢唔知我黎搵你架!你都唔好話俾佢知!』唔可以俾飛揚BB知...

「你貿貿然黎搵我問有關飛揚既事...然後又叫我唔好講佢知...你知我實應承架喇?」羅海月對我莞爾一笑…

『我...』死喇...一心就係諗住黎問問...都無諗過呢一點...

「咁你又放心~我唔係小人~唔會做埋D無聊野既~」羅海月又莞爾一笑…

呼...嚇得我丫...

「咁你想知D乜?」羅海月打量一下我...

『我...其實我想知你同飛揚係乜野關係?』我都係直接問好D...

「我同飛揚...已經乜關係都無...」羅海月眼定定咁望住...牆上既...黑白相...

我又跟住羅海月既視線望過去...望向牆上一幅...黑白星空...

黑白星空總係散發住...散發住點點既哀愁...

呢種哀愁係...Whirling?!

我望住右下角個署名...正正就係Whirling!

原來係出自岳飛之手既~唔怪得個Feel咁熟悉啦~

我再橫視一下四周...一幅又一幅,有大有小,有車、有街、有動物、有植物、有生果、有天空...都係岳飛既作品...

睇黎…羅海月係岳飛既Fans喎...

「之不過...我知道佢仲係放唔低我...」羅海月眼定定咁望住幅黑白星空...

佢係...係知道?

羅海月係知道飛揚BB仲未放低佢?

「就算我有心唔覆佢...唔留意佢...從佢既世界消失差唔多十年...佢都仲係一直喺我背後守護住我...」羅海月雙眼就好似有好多影像咁...

一直都喺背後...一直都喺背後...

『咁你係唔係唔會再愛佢?』我又好直接咁問...

羅海月諗左一諗...但無答到出口...

『如果你係唔再愛佢既話...點解唔同佢講清講楚?』我又再直接D...

羅海月仍然無答出口...

『如果你真係唔再愛佢既話...開個價!要幾多先肯令佢對你死左條心?』我直接到要羅海月開個價好喇!

「我唔會應承幫你做事...我只係想...想得到一個...終結...」羅海月擰擰頭後莞爾一笑…

一個...終結?