銀包…有!

現金…有!

八達通…有!

EPS…有!

手錶...有!



打火機…有!

送俾阿雪既生日禮物...有!

我仲喺屋企帶埋個無線電話添~

今日...就係阿雪既生日...

亦係我人生中,最總要既一日...



『我要向阿雪表白!』雖然我對住塊鏡講得相當堅定!

但喺心底裏,我真係好淆底呀大佬...

大佬呀大佬...活左喺呢個世界上都十六年人,唔計幼稚園既時候同隔離嗰個B女講“我鍾意你”丫...今次真係第一次表白咋!

我暗戀過既女仔就得一個,表白仲要未試過!

真心淆撚晒底架大佬...



雖然個個都話“博一博,單車變摩托”,博唔到呢?摩托變飯殼架喇喎...

我唔想咁就一世...但唔咁樣...又有可能後悔大半世...

唉...所以話,人係幾咁矛盾呢...

喺呢種咁忐忑既心情之下,又點會好樣?

所以我都一早執正個人,襯好晒衫,Set好晒頭,務求以最佳狀態向阿雪表白!

而且,我已經對住塊鏡講左九百幾次“阿雪,其實我暗戀左你五年...我真係好愛你。”!

不斷練習...不斷做好最後既準備!

我望住鏡中既自己,雙眼充滿真誠...充滿愛意!



莫講話阿雪,真係睇到連我自己都被感動!

“等不到想等愛侶 便已擁抱到熟睡 經不起錯對 但已找到樂趣”

當我正要對住塊鏡,練習第一千次“阿雪,其實我暗戀左你五年...我真係好愛你。”之時,電話就響喇...

『喂?』我接過Cyrus既電話...

「喂!你行得未架?我而家喺你樓下等緊你一齊買野過去架!」Cyrus把巨聲由耳筒傳過黎...

『OKOK而家落黎!』係時候喇...係時候出發喇...

成王敗寇,就睇今晚!



『喂喂喂…點解要買咁多野,都只係得我同你架...其他人呢?你唔係話有成十五、六個一齊燒架咩?』我同Cyrus入左超市左搵搵,右揀揀...

「係丫~佢地幫你Set梗野~仲有D要分散阿雪既注意力!確保你今次表白既行動係萬無一失!」Cyrus行左去凍肉嗰邊。

『大家都為左我...太滾動喇~』實在太滾動喇~

估唔到...喺呢個世界上...竟然有咁多人...為左我...為左我既幸福...一齊努力梗~

人間有愛呀~

「梗係啦!你知唔知丫?“毒撚能否溝到女神”呢個盤,早喺學期初就已經開左!買你溝到女神一賠九十九喎!我地一知道你要表白姐,就重鎚出擊!瞓身買你溝到!我地仲唔出盡力幫你溝阿雪丫?」Cyrus雙眼發光咁望住我...

『果然係好兄弟!不過...屌你呀?!點解有咁既盤我都唔知架?!你條仆街仲話要重鎚出擊?!』我立即扯住Cyrus衫領!

「你冷靜D先...你冷靜D先...早喺上年年尾,好多人都察覺到你視姦阿雪啦~班仆街咪開個盤黎賭囉~佢地賭你今個學期之內溝唔溝到阿雪喎~個盤一面倒買你溝唔到架!差D就要封盤添!好彩你話要表白,我一知道,立即叫佢地十幾個落重注!買你溝到!你睇下我地!幾咁睇好你!」Cyrus掃一掃我胸口...



屌鳩你...真係唔知應唔應該多謝你...

「你咪撚衰俾我地睇丫!為你做咁多野仲累我地輸錢既話,你真係洗乾淨個屎忽,琼乾水,等俾人輪啦!」Cyrus拍一拍我胸口...

『唔撚係丫化…』家陣係你地班仆街自己話要賭咋喎...

有無聽過“有強姦無焗賭”呀?

「嗱~你一陣真係要醒醒定定丫~」Cyrus拍一拍我胸口後,繼續揀凍肉...

望住Cyrus既背影...點解我硬係覺得...好似俾人...迫左入局咁既?

講真嗰句...而家既情況...真係都幾…迫上絕路...



而家既情況,唔單止要面對假如俾阿雪拒絕之後點算...

仲要諗埋俾班爛賭鬼輪大米...

唉...

真係仆你個街,你而家叫我情何以堪呢?

「喂!知唔知阿雪鍾意食D乜丫?」Cyrus揀左十幾塊豬扒...

『阿雪鍾意食雞翼...雞全翼喎...仲要係燒到蜜汁雞全翼咁...仲有腸仔啦...要廚師腸喎!因為阿雪話過廚師腸先夠彈牙...仲有既係綿花糖...阿雪話綿花糖可以燒到外脆內軟好得意~不過阿雪自己唔識燒...等等等我幫佢燒先~』我記得好似仲有既...

Cyrus眼定定咁望住我...

『做乜鬼咁望住我?唔係愛上左我丫嘛?』我送返對冷眼俾Cyrus。

「話晒我都同左阿雪同一班都有五年,但自問真係唔知佢鍾意食雞全翼…Gary...你都真係幾了解阿雪架喎...」Cyrus好認真咁望住我...

『ER…或者愛一個人,你總會將所有既注意力都放晒喺佢身上...自自然然...你就會好了解佢既一切...』雖然我都唔係好明乜野叫做愛...但我既第一個感覺就係咁...

「唔...你真係好愛阿雪呢~」Cyrus點一點頭後,繼續揀雞全翼…

我...

我真係好愛阿雪...

真係…

由第一眼見到阿雪,我就已經註定要愛上佢...

我唔知點解...我亦都解釋唔到...

點解會愛上一個人?又點解嗰個人一定係阿雪?

我只係知道...無時無刻,我都想見到阿雪笑...見到阿雪開心咁笑...見到阿雪幸福咁笑...

我唔知自己可唔可以令到阿雪開心幸福咁笑...

但可以既話,我都會盡力去做!

「你一定可以既。」Cyrus點一點頭。

『下?』我望住Cyrus既背影...

「一個全心全意愛一個人...一定會成功抱得美人歸既。」Cyrus繼續揀凍肉...

一定會成功...抱得美人歸...

聽日係唔係真係會好天?無人會知...

問天文台既話,佢只會答今晚會考慮改掛八號風球。

希望都只係一個正能量...

如果痴心真係可以打動到女神既話,呢個世界就唔會有咁多毒撚...

「喂喂!快D去截的士啦!」Cyrus左手一扎叉,右手兩包炭咁跑下跑下...

『哦哦哦...的士!!!』我又左手幾大包,右手幾大包咁跑去截的士...

我同Cyrus坐上的士後:「咖啡灣丫唔該~」

的士佬一俾油,逢彎過彎!有燈衝燈!好快就黎到咖啡灣。

而黎到咖啡灣之時,都差唔多已經到左黃昏。

黃昏既美景,當然醉人...

但我既心境,本來就已經醉醉地...

好快就會見到阿雪...

我深愛既黃雪美...

距離表白既時間越黎越接近…(講真句,我都唔知係幾時...Cyrus只係話俾我聽會喺夜晚進行...到時就會通知我...)

究竟結局會係點呢?

會唔會真係好似CCTVB既劇情咁,BBQ大團圓呢?

好撚緊張呀屌你!!!

「HI~Gary~你黎左喇~」當我仲痴痴迷迷之時,原來已經不知不覺間行到黎阿雪面前!

阿雪仲要同我揮揮手,打個招呼!

『HI…HI…係丫…係丫…』我都黎唔切反應!

因為...我既靈魂...已經俾眼前既阿雪魅惑左喇...

阿雪今日放左把頭髮落黎,髮長過肩...

中間分界既造型真係好似...謝安琪BB...

再加上阿雪今日著左件白色雪紡無袖衫,配上一條黑色熱褲...

喺微風吹送下,件白色雪紡無袖衫就飄下飄下...顯得阿雪有一種優雅成熟美...

「你唔覺得重架咩?」阿雪帶住微笑咁問我...

『下下?』我仲喺俾阿雪既美麗吸引...

「你拎住咁多野~快D放低佢先啦~」阿雪拖一拖住我...

『哦哦...』阿雪拖我呀...阿雪拖我呀!!!

阿雪隻手...好滑...

滑到好似...豆腐花咁滑…

而我既內心...好想可以再拖耐D...但又怕自己粗糙既手會整花阿雪對纖纖玉手...

呢種感覺...真係矛盾...

「放晒喺道先~」阿雪拖到我去張長檯前...

『哦哦...』我仲係痴痴呆呆咁既樣...

而望一望四周,已經有幾個三姑六婆坐住喺道望實我,掩住半邊嘴偷偷咁笑...

我認得出,呢幾個三姑六婆都喺阿雪嗰班既...

有兩三個仲係女子排球隊!

阿雪望一望我地:「係呢~你地應該唔識架呵?等我介紹下...」

「唔駛介紹啦~我地識佢架喇~Gary丫嘛~佢咁出名點會唔識丫~嘻嘻嘻...你叫我地做靚女得架喇~」其中一個肥肥地既女仔打斷左阿雪既說話...

靚女...唔撚係丫化...稱乎你地做“人”都叫俾面啦下話?

『哦~靚女你地好~』唉...算~鬼叫我要睇你地頭咩...

寄人籬下就係咁身不由己~

「乜你好出名架咩?」阿雪笑得好燦爛咁望住我。

『邊...邊係呢...肯定係Cyrus啦...肯定係Cyrus成日講我壞話~係唔係丫靚女們?』我同幾個三姑六婆打一打眼色...

「係咯係咯~Cyrus把口唔收架嘛~嘻嘻嘻...」幾個三姑六婆都好合作。

「哈哈~你地真係好兄弟~」阿雪拍一拍我膊頭。

『OK咁啦...哈哈...』好兄弟...好多人都係死喺好兄弟手中...

「唔阻你地喇~我地去監督班男仔起爐喇~你地慢慢...啦~」幾個三姑六婆俾左個Likes我之後,行左去爐嗰邊...

「唔駛理佢地架~佢地好鍾意亂噏野~」阿雪怕怕羞羞咁...

『哦哦...佢地都幾得意丫...哈哈...』我都尷尷尬尬咁笑一笑…

「得意丫?追佢地囉~」阿雪向我打左個眼色...

『唔係唔係!我唔係咁既意思!』我立即否認!

唔可以俾阿雪誤會架!

「講下笑咋嘛~咁緊張~你仲得意啦~」阿雪笑一笑…

呼...嚇死人咩...個心離一離丫...

俾自己鍾意既人誤會鍾意D豬扒...我既眼光邊有咁差?

定係阿雪覺得,我既Level只係襯得起D豬扒呢?

「喂喂~做乜又眼甘甘咁望住人?」阿雪喺我面前揮揮手...

『無無...丫!係丫...』我喺個袋道拎出盒禮物,『送俾你架~生日快樂~』

襯無乜人,呢個時候送禮物就最岩喇!

「多謝丫~咩黎架?我拆唔拆得黎睇架?」阿雪好開心咁接過我份禮物。

『嗯~當然可以啦~』我點一點頭。

阿雪好細心咁...好溫柔咁慢慢拆開張花紙...

「係…係支MICRO鏡!你點知我想要支MICRO鏡架?」阿雪碌大對眼,望住我送俾佢份禮物。

『其實...我都唔知架~我...我覺得MICRO鏡可以影到平時我地唔多為意既微細事物...覺得好得意...所以就買黎送俾你囉...哈哈...』我摸一摸自己個頭,尷尷尬尬咁笑一笑…

「你...你好細心...」阿雪眼定定咁望住我笑一笑…

『邊...邊係呢...』俾阿雪咁樣望住...總係好唔自然...

我亦都感覺得到,我塊面...有D熱熱地...

我...應該面紅起黎喇...

「但係…支鏡太貴重喇…我唔可以要架~」阿雪擰一擰頭,遞返支鏡俾我...

『其實都唔係咩貴重野~我平時返Part Time賺返黎既錢都無地方用既~而且你教我影相架嘛~第時我地再一齊出去影相,咪又多D野玩囉~係咪先~』講就係咁講姐...

事實上我係問阿哥借錢買返黎,每個月要分期還俾阿哥...

不過...我話第時同阿雪出去影相...會唔會令到阿雪有一種打蛇隨棍上既感覺呢?

又會唔會太過強人所難呢?

只見阿雪帶住真誠既笑容點點頭:「嗯~咁到時我約你出黎影相,你唔准話唔得閒架!」

『嗯!一定!』可以同阿雪出街影相,兄弟叫救命都可以無視!

呢D咪正宗重色輕友囉~

「咁勾個手指先啦~」阿雪向我伸出手指尾...

『嗯嗯!』我勾一勾阿雪隻手指尾...

阿雪用佢既手指公掂一掂我隻手指公...

「無得食言架喇~」阿雪向我打左個眼色~

『唔會食言~』

承諾,好似好容易講出口,但又好似好難兌現...

尤其係經過時間既洗禮,承諾就會好似衣物上既顏料咁,越沖越淡...

你好似永遠都無辦法捉得緊,留得住...

直到最後,所有承諾都好似並未存在過一樣...

但我可以肯定,對你既承諾,一世都唔會改變...

因為你永遠都係我心裏既你...我最愛既黃雪美...