當我帶住疲憊既身軀,照平時既時間返到公司...

遊遊魂魂咁行到埋自己個位之後...

手軟軟咁輕輕手,放好手袋仔...

無黎精神咁掃一掃條黑色套裝西褲...

坐喺差唔多日日都會坐好幾個鐘既凳上...





我望住鏡裏面殘到核爆既自己...

拍一拍塊面...

自言自語咁講左一句:『醒下喇...傅愷盈…』

就算世界崩塌,我都仲要生活...

即使如此...世界依然美麗!





工作工作!

當我打開電腦,準備開始迎接新一天既工作之時...

我聽到整個Office...

「喂喂…你知唔知丫...」

「喂喂…你有無聽過丫...」





「喂喂…你有無去到丫...」

「喂喂…你尋晚在唔在場丫...」

整間公司既同事,無論係其他部門既主管又好,定係茶水間既阿姐都好,都好似喺道竊竊私語,談論梗國家大事...

今期又有乜八掛新聞呢?

又有D乜野會吸引到呢班八公八婆既嘴巴呢?

我唔係一個八婆仔。

平日唔關自己事既,都唔會去八掛~

我諗今次...都係一樣,唔關自己事架喇~





唉...都係唔好理咁多…

我已經夠晒心煩架喇...

「喂喂…唔好講住!我頭先見到佢入左?!上梗黎喇!」

突然間,整個Office變得出奇地寧靜...

每個人都返埋自己個位,好似正喺道埋頭苦幹,忙梗自己手頭上既工作...

“咯...咯...咯...咯...”未幾,我聽有腳步聲,正要由Reception行入黎我地Office...

呢種腳步聲...





無理由架…

無理由係佢架…

但更無理由…我會認錯架...

呢種腳步聲...我都已經聽左有兩年...

一定唔會認錯...

好奇心之下,令我探頭望一望出去...

我托一托副黑色粗框眼鏡,離遠望一望,一個熟悉又期待既身影,由Reception行左入黎...

係我地既主管,亦都係我既男神-歐陽皓。





雖然只係大我四年,但已經係我地部門主管既歐陽皓如平日一樣,帶住和藹既笑容,行入自己間房...

當我望住我既男神行左入房之後,我心裏就覺得更加奇怪...

佢唔係因為結婚...請左兩個星期大假架咩?

我一定無記錯,尋晚係佢結婚既大日子...

我尋晚仲因為佢要結婚,獨自攬住個枕頭,瞓左喺張床道喊左一整晚...

喊到我對眼都腫埋...又無黎精神...今朝過馬路仲差D俾車撞...

但點解...佢今日會...會返黎架呢?





「喂喂…你睇佢又好似無乜野咁咋喎...」

「喂喂…咁激都好似無野咁既...」

「喂喂…我就真係唔信佢會無野喇...」

「喂喂…我睇佢都係死頂多架姐...」

成個Office又再次喺道竊竊私語...

究竟發生咩事呢?

我靈敏既第六感話俾我聽,佢地講梗既野,一定關佢事既...

「喂~Carol~你知唔知丫?」坐喺我隔離既阿Ling企左喺道,雙手撳住塊Partition,探頭過黎古古惑惑咁望住我。

中文名叫鄺婉玲既阿Ling,係同我一齊入職既同事。

喺呢間咁大間既室內設計公司中,我同阿Ling都算係最好感情。

可能係因為大家都咁上下年齡,都係一畢業就喺呢間公司工作。

而最重要既都係,阿Ling八掛得黎,又唔會係D聽少少就老作多多既是非精。

『知道D乜野丫?』我抬頭望一望阿Ling。

「關於你既Chris架~」阿Ling鬼鬼祟祟細細聲咁講。

阿Ling除左係我最好感情既同事之外,亦係唯一一個知我暗戀Chris既同事。(好似係)

『關於Chris既?』果然...我既第六感係無錯...

「唔好咁大聲啦~俾人聽到唔好架嘛~黎黎黎,埋D埋D~」阿Ling招一招手,示意要我企起身...

俾邊個聽到唔好呢?

好明顯,而家成間公司都喺道講梗Chris啦...

『Chris發生咩事丫?』我企一企起身,貼一貼埋阿Ling面前。

「好大件事丫~你尋晚無去到咋!尋晚現場都不知幾精彩丫~」阿Ling細細聲講,又故弄玄虛一下...

『尋晚現場?你係指Chris既婚宴現場?』我扮晒猜測,但我心裏有數...

阿Ling講梗既現場,一定就係指Chris既婚宴現場。

我仲好記得當初Chris帶住幸福既微笑:「我結婚喇~」,雙手遞上一張紅色炸彈給我之時...

就好似切爾諾貝爾核電廠喺我心裏面爆炸一樣咁震撼!

嗰一刻...我又要強忍淚水…強忍心中既傷痛...帶住強顏歡笑:『恭喜晒你丫~』祝福Chris...

女人...總係口不對心既生物...無論係八歲又好,定係八十歲都好...

當然,我亦好清楚自己...

我只係一個柔弱既女孩,一定無辦法面對“愛人結婚了,新娘不是我。”既衝擊...

所以,我決定對Chris講左個大話,話自己嗰晚有要事,無法出席佢既結婚晚宴...

免得喺個會場喊到豬頭咁丫嘛...

「係丫係丫~之唔係Chris既婚宴現場囉~你知道嘛,尋晚上演左一場阿牛丫~唔係喎...用阿牛都唔係咁貼切...應該用咩黎形容先岩呢...」阿Ling眼仔碌碌,打左幾個轉...

『究竟發生左咩事姐?你唔好再賣關子啦!快D講!』我開始心急起黎...

無錯,就算我表面上睇起上黎,好似唔多著緊Chris既事...但心底裏,我無一不想知...甚至想知得徹徹底底。

「睇你既心急樣丫~呵呵呵~」阿Ling撳住半邊嘴偷笑,「好喇好喇~唔再玩你喇~尋晚丫~Chris既老婆...唔係...應該話未過門既老婆...玩悔婚丫~」

『悔...』悔婚?!

聽到阿Ling講出“悔婚”呢兩隻字之後,我心裏感到萬份迷惘...

唔係丫嘛?邊可能...咁戲劇性...

「驚訝丫呢~係唔係點都諗唔到呢?係唔係點都聯想唔到呢?係唔係好想知現場情況係點架呢~嗱嗱嗱~喺咁緊張又刺激既一刻,好彩我無呆得太耐,及時拎出手機!拍低左少少~」阿Ling拎出佢部手機,撳左幾撳,再遞埋個EarPods俾我...

我急不可待咁帶上EarPods,搶走阿Ling手上既手機...

畫面開始Play梗...我見到清晰既畫面中,有一個著住白色婚紗既女仔...企喺白色既台上...

雖然呢個新娘化左妝,但我都認得出...呢個女仔就係Chris既未婚妻...

我係唔會忘記佢既美麗...仲有由佢身上散發出黎既氣質...

新娘子拖住左一個男人...但影片中好清楚咁影到呢個男人唔係Chris...

呢個男人都係著住禮服...帶住黑框眼鏡...有D健碩...年齡亦同Chris差唔多…

而Chris就企左喺佢地兩個既側邊,面上帶住一點點錯愕...

新娘子吸左一口氣之後,開始拎起手上吱咪:「今晚既婚宴要取消...好對唔住...」

之後新娘子同身邊拖住嗰名男子向台下既新友鞠個躬後,跑左落台下...鏡頭跟住佢地轉到後方,直至佢地既身影消失喺宴會廳門外...

『喂!究竟發生左乜野事呀?嗰個男仔係邊個黎架?Chris又有乜野反應呀?點解你條片得咁鬼短架?』我急忙捉住阿Ling,搖左佢幾下!

「你冷靜D先~你冷靜D先~乜野叫短丫?喺咁震撼既情況下,仲識得拎部手機出黎拍低佢,已經算叻叻豬啦~」阿Ling捉一捉住我對手...

『咁...究竟發生左乜野事?點解Chris既女朋友會拖左第二個男仔走既?』我稍微冷靜一下自己既情緒...

「嗰陣時既情況...唔...是咁的~當Chris同佢未婚妻正要喺律師見證下簽紙成為合法夫妻之時,佢未婚妻突然話有D野想搞清楚...之後就行左埋去伴郎身邊...呢~就喺呢個男仔喇~」阿Ling指一指住芒入面嗰個男仔...

就係新娘子拖住嗰個男仔...

「佢同個男仔講左幾句...個男仔好似又同佢講左幾句...但因為太細聲,我聽唔到佢地講乜...佢地講左一陣,新娘子就拖住個男仔行到去Chris面前...佢地三個人都顯得有D緊張同不知所措...之後我覺得勢色唔對,就拎部手機出黎...跟住就喺段片既開頭喇~」阿Ling再指一指住條片...

『咁則係點丫?咁Chris佢點丫?』當中好似有好多野都搞唔清...

但最重要都係Chris!

就算當中發生過咩事都好,個結果對Chris黎講,都係一種沈重既打擊!

「Chris丫...佢之後咪好似平時一樣,咁和藹可親咁,同在坐既親友講“對唔住各位...雖然婚宴要取消...但餸菜一樣會繼續送上...各位都可以選擇食埋先走...對唔住...”鞠一鞠躬後,就去左打點一切~」阿Ling扮上阿Chris既口吻...

『下?Chris無好大反應咩?』遇到咁大件事,點可能咁平淡面對?!

「咁我又唔覺佢有乜大反應...到我食完餐解穢酒,佢都好似無乜野咁...」阿Ling點一點頭...

『你仲食得落丫?』我驚訝咁問一問。

「點解食唔落丫?大嗱嗱八舊水架!幾大都食埋佢先啦~唔單止我丫~個個有去既同事都食埋生果先走架~」阿Ling理直氣壯咁回答。

好似好有道理咁喎...

但係...

「不過走既時候,都唔知恭喜Chris好,定係叫佢唔好咁難過好喇...」阿Ling有D難為情咁既樣...

遇上有如CCTVB式既悲慘劇情,Chris都好似無乜野咁...

頭先返黎仲同平時一樣,面上都帶住和藹可親既親切笑容...

喺Chris身上,完全唔覺得佢遇上咁突然既打擊...

Chris佢…真係無野?

喺公司裏面都坐左一大個早上...

可以話連半份工作都無做過...

因為整個Office都仲係充斥住有關尋晚Chris婚宴上既劇情...總令我個心囉囉攣,無心工作...

坐喺個位道,我總會豎起隻耳仔,聽下班八公八婆講D乜。

但聽黎聽去唔係話“好似係”,就係“聽講呢”...

就連一D可靠D既消息都收唔到...

係因為Chris真係無異樣?

定一或佢唔想俾人知,所以收得好埋?

以我推測,應該都係後者居多!

就算係一個有幾堅強、有幾正面、有幾樂天既人都好,遇上呢D事...仲要喺咁多親友面前發生,一定好難堪!

當我拎住個杯,走到去茶水間之時...

「喂喂喂…聽講呢,尋晚散左席之後,有人見到Chris自己一個隊晒成支XO~」幾個八婆就圍埋一齊討論...

好明顯又係吹水啦...如果真係隊晒成支XO既話,今日仲點返工喎...

「喂喂喂…唔只咁喎~仲要一路隊,一路喪喊~喊到哭喪咁款喎~」另一個八婆接住講...

呢點就更加無可能...如果真係喊到哭喪咁,今朝起身對眼一定腫晒!腫到好似我而家對眼咁...

「喂喂喂…你地話Chris點解會取消休假返黎架喇?」

「係咯係咯…係我就休返幾日先喇~話晒都傷到入心入肺~」

「係咯係咯…仲要俾咁多同事知道自己瘀成咁喎~」

班八婆越講越過份...

「梗係要返黎扮無野啦~」

「係咯係咯…男人黎架嘛~要面架嘛~」

越講越離譜...

「男人面子大過天~老婆跟佬走喎~喺人面前緊係要扮無野喇~呵呵呵~」

我揸實個杯...聽到火都黎...

「仲要跟個伴郎走喎~真係咩面都無喇~呵呵呵~」

你地呢班...呢班八婆...我忍無可忍喇!

『你地...』當我仲未講出“呢班死八婆”之時...

「你地好~」我聽到Chris把聲,由茶水間門口傳入黎!

我回身眼定定望一望門前...門前正正企左一個西裝筆挺既身影...

『Chris...』

「HI…哈哈哈...我地有野趕住做...唔阻你喇...哈哈哈...」成班八婆面懵懵咁行左出茶水間。

Chris帶住和藹既笑容,行到埋部水機前...

我眼定定望住近在咫尺既Chris...

我有好多野想問...但又唔敢問...

我有好多關心既說話想同佢講...但又唔敢講...

心中有著千語萬語,但又唔知點開口...

只係識得眼定定咁望住你...一直痴痴迷咁望住你既背影...

「Carol?做咩丫?係唔係想斟水?」Chris對住我笑一笑…

『丫…係丫係丫…』面對Chris突如其來既詢問,我六神無主咁回答...

但當我放個杯落部水機之時,先發現自己已經斟滿水...

「做咩咁心神不定咁丫你?仲無黎精神咁既?尋晚瞓得唔好?」Chris帶住笑面打量一下我...

Chris就係一個咁既男人...無時無刻都咁關心別人...

就算自己岩岩先經歷左一場浩劫,都總會將注意力放喺別人身上...

『我..我無事...可能喺尋晚瞓得唔好...』我唔敢講得太多,怕會為Chris帶來更多煩惱...

我更怕會勾起Chris既傷心事...

「嗯~咁你都抖下喇~唔好咁操勞喇~有需要既話,請半日假返去休息下啦~」Chris飲一啖水...

『嗯嗯...我會架喇...』我托一托副黑色粗框眼鏡,點一點頭...

「大個女喇~再唔係岩岩畢業既小妹妹喇~要識得自己照顧自己丫~」Chris送上一個親切既笑容,點一點頭後,行左出茶水間。

望住Chris既背影...我猜唔透...

唔好咁操勞...需要休息既...應該係你先岩...

但點解...喺你既面上...好似...不帶半點憂傷?

就好似從來都無發生過...無發生過悔婚既事...無發生過被好朋友...甚至係好兄弟搶妻既事一樣...

Chris就同平時一樣,待人親切殷勤,處處關心別人...

Chris…究竟喺你心裏面...諗梗乜呢?

今日全日唔係掛住偷聽D同事講有關Chris尋晚結婚晚宴既事,就係心掛掛諗梗Chris有無事...

魂不附體之下,堆積如山既工作一樣都無掂過...

結果…又要OT了...

「Carol唔好做咁夜喇~Bye~」阿Ling拎起個手袋仔,同我揮揮手...

『嗯~Bye~』我強顏歡笑向阿Ling揮揮手...

就連阿Ling都走埋之後,整個Office就等返我一個...好寧靜...

差不多所有燈都熄晒,就熄剩我頭上嗰一排光管...

白色既光管燈光照射住我,整個Office寧靜而沈寂到...有D...寂寞...

喺一個既寧靜,又寂寞既環境下,我應該可以好好咁專心工作。

但我個心...總係專心喺Chris道呢...

探頭望向Chris間房…

留意住佢間房既燈光...

心裏一直盤算住“熄未呢?熄未呢?要熄燈未呢?”

我一直心急咁守候,守候關上房燈的時候...

“滴答...滴答...滴答...”時間喺不知不覺偷偷流走,我都唔知自己注視左幾耐...

就喺我對眼開始有D乾澀,意識有點迷糊之時...

我見到Chris間房一黑!

“咔”房門一開!

Chris拎住佢個工事包,由佢間房行左出黎!

Chris要離開公司喇!

唔知佢會唔會...

「Carol?你仲未走既?」當我仲喺心底裏盤算梗Chris會唔會留意到我既存在之時,佢帶住和藹既笑容望住我。

『走架喇...走架喇...我都執梗野準備走架喇...』其實我已經一早就執好晒野...

「唔...都咁夜喇...不如我車埋你返去啦~」Chris望一望手上既手錶。

『好丫好丫~我行得架喇~』我拎一拎起個手袋仔,急急腳咁行去Chris面前...

或者我心底裏...暗地裏都係想等呢一個機會...

等左成晚...都係想等到Chris話車我返屋企既機會...

但係我並唔係諗住要坐順風車...

更加唔係咁隨便!

我之所以咁樣做,係想可以再多D留意下Chris!

留意下佢係唔係真係無野…

內心同表面一樣...無野一樣...

“咔”打開車門,坐上Chris架紅色Mini Cooper。

『你架車好鮮豔呢~』我扣上安全帶。

「係丫~我...以前女朋友鍾意鮮豔D既顏色。」當Chris講起佢前女友之時,聲音連同動作都有0.3秒既停頓...

我係唔係講錯野呢?

呢0.3秒既停頓,係唔係表示喺Chris既心裏,對佢既前女友有一份耿耿於懷呢?

『ER…係丫…係呢~要你車我返屋企,會唔會麻煩到你丫?』我尷尷尬尬咁問一問。

「唔麻煩~我經...之前都經常去你嗰邊接女朋友放工先返屋企~屯門入元朗都好近咋嘛~」Chris帶住親切既笑容點點頭。

又係0.3秒...

當Chris一提起佢前女友既事,總係有0.3秒既停頓...

係仲未習慣?定係仲未接受?

『嗯...咁...麻煩你喇...』

「唔麻煩~唔麻煩~」

“吼”當Mini Cooper開動之時,我總係覺得...Chris係未放得低...

應該話仲未接受到...

因為由Mini Cooper既搖擺之下,我感覺得到...

感覺得到Chris內心既動盪...

一種動盪不安既心境...

我既第六感唔會錯架呢!

而呢種動盪不安既心境,令到掛喺倒後鏡上既飾物發出“叮叮噹...叮叮噹...”既聲響。

『呢件野都幾得意架喎~』我摸一摸件飾物。

飾物以紅線穿起,中間有幾粒水晶,又有幾個鈴鈴咁...

呢件飾物應該係...

「哦~呢個係平安符黎既~係我...前女友幫我求既~佢成話我手車差丫嘛~哈哈...」Chris有D分心...

又係0.3秒...

同頭先兩次既情況一樣...當Chris一提起佢前女友既事,總係有0.3秒既停頓...

不過講開又講,邊有人會求個有鈴鈴既平安符掛喺男朋友架車入面架?!

成日都發出D“叮叮噹...叮叮噹...”既聲音,想令男友分心炒車咩?!

『係...係丫...』聽完Chris咁講,我都唔係好敢再講多半句。

我發現,喺Chris既世界之中,有好多好多既事都會牽涉到佢前女友...

只係一架車,三個話題,都會提及Chris既前女友...

係既…或許兩個人都已經親密到不分你我,先會觸及到談婚論嫁既境地。

但如果都已經親密到不分你我,到最後...又點會...分開呢?

我一直盤算,Mini Cooper一直向住我家方向行駛。

直到駛入屯門,我都係諗唔通...

只見Chris望一望公路旁邊一間中學...眼定定咁...被間中學吸引住...

『喂喂!睇住!』我立刻叫Chris望返前面!

「哦哦!」喺就快要撞埋防撞欄之時,Chris及時扭返正架車!

『呼...睇黎...你手車真係...有D差喎...』我托一托副眼鏡...

「係丫係丫...哈哈...Sorry丫...」Chris有D尷尬。

其實...唔係Chris手車差...

係Chris心不在焉姐...

『多謝你送我返黎~』落車之後,我向Chris揮揮手。

「唔駛客氣~」Chris亦向我揮揮手。

『Bye~』

「Bye~」

“吼”望住Chris架Mini Cooper離開...

其實我心裏仲有野想同你講...

我想同你講...唔好諗咁多…

但...

總有一道阻力,壓抑住埋藏喺心底裏既說話...

面對住任何時候都一面和善既你...我...始終都係開不了口呢...