放假一大清早就要喺屋企執野…

喺間大約三百呎既屋仔裏面執下執...

拎起塊鏡仔...拎起檯上既護膚品...化妝品...幾張相...放到落紙皮箱...

將一件又一件要帶走既野,都放入紙皮箱入面...

再將D最後剩低既衣服,都放到入行李箱入面...





而D大型D既野...例如電腦...電視呢D電子產品...

都係等Chris黎到先叫佢幫我執啦~

你問我點解要執咁多野?

係唔係去旅行?

去旅行又點會帶埋電腦同電視呢?





其實我係要搬喇~

我要搬去Chris為我地結婚而買既新居喇...

由今日開始…我就會搬去同Chris一齊住...

同Chris一齊住...

之前都已經執左D架喇~





本來應該喺早幾日就搬埋最後搬剩既野過埋去...搬埋過去同Chris一齊生活...

不過呢幾日都比較忙...我同Chris都要返工...Chris仲要開左好多晚OT...所以都無時間執野...

拖到最後一日...交吉先黎搬...

拖到最後一日...最後都到左呢一日...要搬去同Chris一齊生活既一日...

其實...或多或少都係因為我...因為我唔想咁快就搬去同Chris一齊生活...先拖到咁遲...

坐喺全間屋既正中間…橫視一下整間屋…

三年喇~都住左喺道三年喇~

三年黎一個人住,由成日都唔記得煲水...唔記得開機洗衫...叮杯麵叮到差D爆炸..到而家識得自己換燈膽...都已經成為習慣~





三年黎雖然話都有Chris喺我身邊,但佢都甚少會上黎...

應該話...我都唔係好想請Chris上黎...

更莫講話一齊瞓...

當然就更加無發生過關係啦!

我...我一早就同Chris講好左,我係一個虔誠既基督徒,所以要結左婚先可以發生性行為。

當然...Chris都好錫我...好聽我既話...一直都無向我提出要求...

就連親熱...都只係攬攬錫錫…





錫都仲係只限於蜻蜓點水...

我同Chris真係可以話係嗰種...發乎情,止乎禮...

係Chris太錫我?

定抑或係我仲未有心理準備同Chris...更進一步...

都就快結婚啦...

都好快就成為歐陽太太啦...

唔通真係到結左婚…都要用幾盤水隔開黎瞓咩...

唉...





“願意為你 我願意為你 我願意為你 忘記我姓名”電話響...

睇黎應該係Chris打黎架喇~

我滑動解鎖:『喂?Chris?』

「迦迦…你...執好晒D野未呢?」Chris吞吞吐吐咁。

『都執得七七八八架喇~你到左喇?』我望一望隻手錶...時間尚早喎...

「未...我...我公司仲有D野要做...」Chris好唔好意思咁。

『哦~唔緊要啦~我可以等你~你慢慢都OK喎~』我坐喺個行李箱上,踢下踢下對腳~





遲D都好既...遲D先見...可以遲D先見到Chris...

「我諗...我要到下午先可以過到黎...」Chris仲係超級唔好意思咁。

『係丫?但係我地今晚要去飲架喎...』今晚係冼Sir同Yuki既結婚大日子...

我同Chris今晚都會出席...

如果要等到Chris下午先黎幫我執埋D野過去既話...咁咪好遲囉...

「嗯嗯~我當然唔會忘記~所以呢...我叫左高暉黎幫手架喇~」當Chris一提起高暉,我個心跳左一跳...呆左一呆...

『下…』係高暉…

高暉會過黎幫我...

「放心啦~高暉佢好有擔帶既~佢一定可以妥妥當當咁搬好晒D野去我地既新愛巢~」Chris真係好似好放心咁...

『嗯嗯...』但我就真係有D擔心...

「Chris!老細話要開會喇!」Chris嗰邊傳黎一把女仔聲。

『咁你去做野先啦...』我帶住忐忑既心情...

「嗯~咁我放工之後立即過新屋接你啦~」

『嗯...拜拜...』

「拜拜~」

收左線之後...我雙手緊握住部電話...靜靜咁坐喺個行李箱上面...

我個心...好唔靜...

我個心...“卜卜”聲咁跳...

跳得好快...好重...

當我一聽到“高暉”呢個名既時候...我個心...就好似有隻小鹿亂撞咁...

不停咁亂跳...

又再見到高暉...

自上次一班兄弟姊妹食飯傾野之後...都已經過左兩個星期...

兩個星期以來...我都無喺任何人面前提起高暉...亦都無主動去聯絡高暉...

我就只有喺夜深一人之時,偷偷上佢個Facebook睇下佢既近況...

偷偷開個Whatsapp睇下佢有無轉Status...

我地都無再見過面...

我地都無再通過話...

我地都無再交流過...

但而家...而家呢個時候...呢個時候又要突然俾我見到佢...

仲要係上黎我既屋企...幫我執屋...搬去我同Chris既新居...

呢種感覺...總係有D...有D難受...

我一個人...喺呢個熟悉既空間裏等...

所有野都好似唔存在咁...

空氣都變得稀薄...呼吸都有D困難...

時間都好似停頓左咁...

就只有我既心跳...

就只有我既心還動...

心跳既感覺...心動既感覺...

好似初戀一樣...

好似高暉第一次同我講“我愛你”既時候咁...

好似高暉問我“可唔可以做我女朋友”咁...

估唔到...事隔九年...呢種感覺會...會再一次...因為同一個人...而再...再次...

當我仲喺道唔知係回味,定係悼念梗呢種觸動心靈既感覺之時...

“叮噹 叮噹”兩下門鐘聲...

係高暉...高暉黎到喇...

高暉已經黎到我門前...

我帶住沈重既身軀...踏出一步又一步...一步又一步...

“咔”我一打開門...就已經見到高暉企喺道鐵閘出面...

「HI~迦迦~」高暉揮揮手向我打個招呼...

『HI~高暉~麻煩到你真係唔好意思~』我打一打開道鐵閘...請高暉入黎...

當然...我就扮到無晒野咁...

咩野都無...咩野都無...

要將期待、喜悅、心動之情都一一埋藏返喺深心處...

唔可以俾高暉察覺得到...

唔可以俾高暉察覺得到...我對佢仲有野...

「唔麻煩~有乜野需要幫手搬架?」高暉入一入到黎我間屋,望左幾望...

『部電腦同部電視~』我就行到高暉背後...

「嗯~咁就幫你搞左陪電腦先啦~」高暉就行到埋我部電腦前...

『嗯~唔該~』我就坐返喺個行李箱上面,望住高暉既背影...

望住高暉既背影...一直望住高暉既背影...

好似一直都無變過...好似從來都無變過...

高暉既背影俾我既感覺係...好橫...好闊...好有安全感...

以前同高暉一齊既時候,我總係好鍾意從後攬住佢...

總係會覺得好溫暖~又兩隻手都攬唔晒咁~

好似都好耐無試過...好耐都無試過咁樣攬住一個人...

攬住一個...自己深愛既男人...

「搞掂晒未?」高暉一邊幫我執梗部電腦,一邊問...

『下下?』死喇...諗得太入神...諗到失晒魂...都聽唔到高暉問乜添...

「我話~你同Chris既新居搞掂晒未架?」高暉擰一擰個頭過黎,笑一笑咁望一望我...

『哦哦...都七七八八...八八九九架喇~係Chris仲有少少野...加埋我呢邊少少野未執過去...』原來高暉係問我同Chris間新居搞成點...

「嗯~咁執多一日半日就可以安安樂樂咁過新生活啦~」高暉繼續幫我執部電腦...

『都...可以咁講既...』新生活...

「都可以咁講?」高暉好似唔係好明我既意思...

但佢就無停到手...無擰個頭過黎...

『嗯...如果話要係過新生活...我諗要到真係結左婚先啦~』我會覺得如果真係簽左紙...真係成為左歐陽太太...我既新生活先叫正式開始...

「其實,你同Chris都已經十足十兩公婆啦~只係差簽個名姐~」高暉隨便放下一句...

『唔同!我都未過同Chris佢...』我反應有D大!

大到差D講左D尷尬既行為出黎...

呢種事...始終都...都係...難以啟齒...

尤其係喺高暉面前...我更加唔想講...

唔想講我同Chris之間既事...

唔想講我同Chris既相處...

我唔係好想俾高暉知得太多...

我亦都唔想同任何人講...

就連我自己...都唔係好願去面對...

而高暉都好似知道我既意思咁...

無追問落去...無再出聲...

高暉都無再出聲...繼續專心咁幫我整理好部電腦...

「你想D keyboard mouse喇叭放喺邊?」高暉將我部電腦甩開晒之後,再幫我用塊毛巾抹一抹,問一問我。

『放喺呢個箱道就OK架喇~』我指一指住放喺地上既紙皮箱...

「OK~部電視都放埋落呢個箱道架喇?係嘛?」高暉放好晒電腦D野落個紙皮箱後,又行到去部電視機前面...

『嗯嗯~』我繼續好耐心咁坐喺個行李箱上等。

可以同高暉相處喺同一個空間...同一個細小既地方...一個我生活左三年既屋企...

仲要係只有我倆...只有我同高暉兩個人單獨相處...

好難得...

一直我都好想會再有機會...

再有機會同高暉獨處一室...

就好似我地以前拍拖既時候咁樣...

只有我同高暉...

再容納唔到其他人...

再一次望住高暉既背影...

我情意綿綿咁望住高暉既背影...

好想好想...好想可以再接近D...再親近D...

好想好想可以再親近一次...親密多一次...

我不自覺咁落一落地...

赤住對腳咁落一落地...

我不自覺咁一步一步行近...

一步一步向住溫暖既背影走近...

一步一步向住高暉既背影走近...

當我行近到...與高暉大約就只有五厘米既距離...

「哦?做咩丫?想幫我手丫?」高暉拎一拎住部電視,轉一轉身,望住我笑左一笑…

『嗯嗯~係丫~我都唔好意思就咁坐喺道等你幫我嘛~』我好順手咁扶一扶住高暉手上部電視。

「唔駛啦~重丫~等我黎得架喇~仲有無其他?」高暉就托住部電視,行到去個紙皮箱前,輕輕手咁放入去。

『無喇無喇~可以行得架喇~』係時候要離開喇...

「OK~咁我拎D重既野落去先~」高暉一手就托起載住電腦同電視既紙皮箱...

『嗯嗯~咁我都拎埋個行李箱~同你行第一轉先~』我亦都拉一拉起個行李箱,跟住高暉背後...

「小心D丫~你整親既話,我都唔知喺邊道搵返個新娘子賠俾人丫~」高暉一邊望實我,一邊好小心咁行...

『放心啦~我唔係細路女丫~』係時候要盡快離開...

盡快離開呢個危險既空間...

我怕...我再同高暉獨處落去...我會控制唔到自己...

我會控制唔到自己...攬住高暉...

我會控制唔到自己...向高暉表露心意...

我怕...我好怕...

好怕好怕再鎖唔住自己個心...飛向高暉既心...

同高暉上上落落左幾轉...

「估唔到你一個女仔住,都有咁多野要搬架喎~」高暉將最後一箱紙皮箱都放到去車尾箱。

『好多咩?之前已經搬左D過去架喇~』我拍一拍雙手,行到去車門旁。

「咁真係好多好多喎~好彩我揸架七人車黎姐~唔係真係要兜幾轉先搬得晒~」高暉上一上車。

『係架~Chris都分左幾次黎幫我搬架~』我都打一打開車門,上一上車。

「佢架Mini緊係唔夠啦~」高暉扣一扣好安全帶。

『係架~有陣時都覺得Mini Cooper真係幾唔方便...』我都扣一扣好安全帶。

「不過你鍾意丫嘛~」高暉開一開車...

“吼...吼...”

『係丫…我都真係好鍾意車仔細細既Mini Cooper…特別係鮮豔既紅色...』一直以黎...我都好鍾意...

「鍾意咪得囉~」高暉一邊揸車,一邊同我講。

『之不過...有陣時係鍾意既...又未必真係適合自己...而適合自己既...又未必係自己鍾意既...』好多時...都係咁...

你好鍾意一樣野...好想得到佢...擁有佢...佔有佢...征服佢...

但當你得到喇...擁有喇...佔有喇...征服喇...你又覺得好似...好似唔係咁岩自己...

好多時總係會...因為唔同既意見...又或者係觀點唔同而有好多爭端...

雖然話真係好鍾意...但真係夾唔黎...就真係夾唔黎...

相反有一樣野係同你好夾...好適合你既時候,你會覺得好舒服~

你好似乜都唔駛諗咁~好似乜都好自然咁~

當你迷茫既時候,佢會為你帶路~

當你覺得凍既時候,佢會給你溫暖~

當你想瞓既時候,佢會俾個膊頭~

當你肚餓既時候,佢就已經送上飯餸~

當落雨既時候,頭上就會出現雨傘~

當你隻高踭鞋斷左踭既時候,佢又會抱起你黎行~

所有所有都會為你準備~你根本就唔需要操心~

但偏偏就唔係你最愛嗰個囉...

好葉念琛丫呵?

都幾啦~

近代港式愛情觀念係咁上下架嘛~

硬係好似好多矛盾咁~

硬係想追求完美~但實際上係吹毛求疵~

好似好著地咁,實際上就離地到上月球~

至於喺愛情路上,你信安徒生,還是葉念琛?

係我既話...

「其實駛乜諗到咁複雜~係愛既咪愛~唔愛咪唔愛囉~下下都要搬一大堆野出黎比較既話,呢種就唔係愛啦~愛係一種感覺導向黎架嘛~做咩呀?你愛呀?你愛要出聲先得架,你愛我俾你,你唔愛我當然唔會俾你啦!無理由你話愛我唔俾你,你唔愛我俾你架嘛!大家講道理丫嘛!嗱,我數三聲,你話愛唔愛喇喎。」高暉一邊揸車,一邊噏一大輪~

『哈哈~又西遊記~你悶唔悶架?專心D揸車啦你~』成日都講西遊記D對白出黎~

「你放心啦~我唔專心都揸到車架喇~喺英國既時候,我瞓住黎揸Ferrari都係咁架啦~」

『英國又點同呢~英國D路又長又直大闊~』

「所以咪容易瞓著囉~」

『係丫係丫係丫…唔好跟車太貼丫~』

「你放心啦~呢個車速推住佢尾都無問題啦~」

『安全D好丫~』

「已經好安全架喇~我平時單手揸添架~」

就係咁,同高暉傾下傾下,好快就到左我同Chris既新居...

「呼~終於都搬晒D野上黎喇~」同高暉搬埋最後一轉之後,佢就攤左喺張梳化上~

『斟杯水俾你啦~』我就去斟兩杯水過黎~

「唔該晒~你真係好多野搬架喎~人地搬屋時好多野都唔要架啦~你就唔係~樣樣都要~」高暉接過我杯水之後,飲一啖~

『咁唔捨得丫嘛~』我都坐到高暉身邊。

「咁又係既...英國D野...我都有拎返黎~好似話晚晚同我瞓既枕頭~由我中學拎過去~又由嗰邊拎返過黎~無左佢我真係瞓唔著囉~」高暉望住隻杯諗下諗...

『唔會丫嘛?成個小朋友咁~』我都望住隻杯諗下諗...

「好小朋友咩?咁有陣時習慣既野...係好難改變...亦好難適應既...」高暉繼續望住隻杯諗下諗...

『都係既...習慣既野...好難改變...亦好難適應...係呢,你...會唔會再返去英國架?』我都繼續望住隻杯諗下諗...

「唔...唔知呢...暫時都未諗...」高暉擰下擰下頭...

『暫時未諗?』我偷偷望一望高暉...

「嗯...未諗丫...我都唔知道...何去何從好...」高暉好似若有所思咁...

『當初你唔係話過...你過左去...唔會返黎架咩?』你話過你唔會再返黎...所以先叫我唔好等你...

「嗯...當時係咁樣講...」高暉點一點頭...

『咁點解你而家又要返黎?』我眼定定咁望住高暉...

「因為...我知道你要結婚...你要嫁俾Chris...」高暉點一點頭...

『點解知道我要嫁俾Chris...就返黎?』我仲係眼定定咁望住高暉...

「因為...Chris係我既好兄弟...我想返黎見證...」高暉望一望住我...

『見證?』我望實高暉對眼...

「見證住我最好既兄弟...同我...」高暉望實我對眼...

『同你...』

「同我最...」

我同高暉四目交投...

我可以好清楚喺高暉既雙眼之中...望到我自己...

好清楚...好清晰可見...高暉眼中既人...係我自己...

而喺高暉眼中既自己...好似越黎越近...越黎越接近...越黎越貼近...

貼近到好似就黎...可以由高暉眼中既自己...睇到眼裏既高暉一樣...

好似已經感受到高暉既呼吸...

好似已經感受到高暉既心跳...感受到高暉既心...

就喺呢一剎那...我大脾一震...

“願意為你 我願意為你 我願意為你 忘記我姓名”

電話響...

我拎一拎出部電話一睇...

係Chris…

“我願意為你 我願意為你 我願意為...”

我滑動解鎖:『喂?Chris?』

「搬晒D野未呢?」Chris把溫柔聲線就由耳筒傳過黎...

『嗯~岩岩高暉佢幫我搬晒上新屋喇~』一聽到Chris把聲,就好似由夢幻中返返黎現實一樣...

「嗯~我都放工架喇~而家趕梗返黎~你幫我同高暉講聲唔該晒丫~」我聽到Chris好似行得好急咁...

『嗯~你小心D丫~小心揸車丫~唔駛咁急架知道嘛?』我都關心一下Chris...

「嗯~聽晒老婆話~咁一陣見啦~」

『嗯~一陣見~』

「拜拜~」

『拜~』

好快...好快就會再見到Chris...

好快...好快又要返返黎現實...

其實...已經返左黎現實...

「咁我都走先喇~」高暉放一放低杯水...

『等我送你...』我都未講完要講既說話...

「唔駛啦~我自己落去得喇~」高暉帶住微笑擰擰頭...

『嗯...咁...唔該晒你...麻煩晒你幫我搬屋...』我向高暉鞠一鞠躬...

「唔駛客氣啦~拜拜喇~」高暉向我揮揮手後...

『拜拜...』我望住高暉既背影...

一直望住高暉既背影行到去門前...

望住高暉既背影打開大門...

望住高暉既背影步出大門...

望住高暉既背影消失於眼前...

再一次...再一次喺我眼前消失了...讓我心碎的背影...