同Catherine開開心心咁食左餐雞煲~

我又再一次辣到變左孖膶腸...

每次同Catherine黎食雞煲都係咁架啦~

都慣架啦~

不過真係開心既~





只要係同Catherine一齊,只要有Catherine喺身邊,做乜食乜都係咁開心~咁快樂~咁幸福既~

「傻佬做乜喺道傻笑~」Catherine拖住我行下行下,又揑一揑我隻手~

『咩傻笑丫?係幸福既微笑丫~』我摸一摸Catherine個鼻尖~

「無啦啦笑得咁幸福,你仲話你唔係傻笑?傻佬~」Catherine挨個頭埋黎,嗲一嗲我~

『係喇係喇~可以做到你既傻佬係最幸福架~』我就拖一拖實Catherine,喺街上行下行下~





夜喇~

天色都昏暗喇~

街上就係得暗黃色既街燈照明~

可以拖住深愛既人,喺暗黃色既街燈下慢步,都真係幾浪漫~

浪漫,唔一定要花好多錢~





浪漫,又唔一定要花好多時間~

浪漫,其實可以好簡單~

簡簡單單拖住深愛既人,喺街上慢步~

感受住對方掌心脈搏既跳動~

感受一下對方既體溫~

其實都可以好浪漫~

只要同深愛既人一齊...只要同深愛既Catherine一齊...做乜都係咁浪漫~

我同Catherine拖住手咁行,又撞下撞下對方膊頭咁向住屋企方向行~





行下行下,我聽到對面馬路有吵鬧聲...

我聽到有把男人聲...好大聲咁講:「八婆!死撚開啦!」

「你唔好走丫!D錢喺用黎幫阿女交書簿費架!」我又聽到有把女聲大嗌...

好奇心之下,我望一望過去...

我見到喺對面馬路...有一男一女...仲有個...小妹妹...

個女既拖住個小妹妹...

個小妹妹睇起上黎...應該都係得七、八歲左右...





望住個小妹妹拖住...佢媽媽...應該係佢媽媽...喺道喊...

個老公就同個老婆喺道糾纏梗...

家庭糾紛嘛?

係都唔出奇…

而家個社會咁亂...家都不成家架啦...

呢D新聞,日日都有得睇架啦...

喺街上吵吵鬧鬧好平常~

唔好彩既話,殺人放火都時時有...





我本來就唔應該好管閒事~

之不過...我望多兩望...望清楚D...又望真D...

個女既...好似...好熟口面...

熟口面到...好似係...

之唔係...

咪就係...

「死八婆你咪撚阻鳩住晒啦!」只見個老公一巴車落個老婆塊面上!





就喺呢個時候,Catherine鬆一鬆開我隻手,指住個男人:「喂!你做乜打人呀!」

Catherine一邊行過去對面馬路,一邊指住個臭男人...

睇到Catherine既反應咁大...我諗我都應該無認錯...

呢個女仔...呢個俾老公一巴車到跪喺地上...撳住塊面飲泣既女仔...就係...Catherine既細妹...Alice...

「Alice…有無事丫?」Catherine扶一扶住Alice,再怒視住個臭男人,「你痴線架?!咁樣打你個老婆!」

「哦?係Catherine丫?我同我老婆之間既時,關你撚事呀?」個臭男人仲要聲大夾惡!

『喂!我理撚得你同你老婆之間乜撚野事呀!你郁手打老婆就唔岩啦!』我都立即走過去,屌鳩個臭男人一份!

「你邊位丫?」個臭男人睥住我...

『我係Catherine既男朋友!』我行前多兩步,啤返住個臭男人!

「哦~原來係老襟丫嘛?」個臭男人串串柒柒咁!

『你噏乜柒呀?』乜撚野老襟呀?!

「鳩咁耐之前,我同Catherine都有一手架~佢既鮑都係由我開既~嗰陣時丫~真係又緊又窄架~抽返出黎既時候,仲有血絲黐住我碌鳩添~」條仆街仲要意氣風發咁既撚樣!

『你講乜撚野呀?!』我一手拉住條仆街件衫!

「嗱嗱嗱~唔好郁手郁腳丫喇~我呢D爛命黎架咋~搞到你要入冊受幾年就無撚謂啦~」條仆街仲要勁串嘴!

屌!呢D死仆街真係又夠無賴!

「無野啦嘛~無野我就走先喇~何生等我拎錢既~我老婆同個女呢~你地鍾意就拎去啦~喺咁先~唔係咩丫?」條死仆街就彈下彈下彈上架的士...

屌你老母鬼唔望你撞車死!

「嗚...嗚...D錢...阿女D書簿費...嗚嗚...」Alice一直喺道喊...

「媽咪...媽咪...痛唔痛丫媽咪...」個小妹妹就摸下摸下Alice塊面...

「Alice…不如你地上我地道...坐陣先...」Catherine扶一扶起Alice...

「咁...嗯...」Alice喊住咁點點頭...

Catherine扶住Alice...

睇住眼前呢三個女仔...總係有D...無助...

我呢個大男人...又可以做得D乜呢...

Alice就拖住佢個囡囡,黎到我地屋企...

『飲啖暖水先~』我放一放低杯暖水俾Alice同Catherine,『小妹妹~你就飲橙汁啦~』

「唔該哥哥~」小妹妹甜絲絲咁對住我笑~

有小妹妹叫哥哥喔~真係心都甜埋丫~

「打擾到你地...真係唔好意思...」Alice眼紅紅咁...

「唔打擾...D錢你袋住先啦~」Catherine交左舊錢俾Alice...

「我點可以...」Alice未將說話講完...

「收左佢啦~兩姊妹嘛~」Catherine拍一拍Alice對手...

「我...對唔住丫家姐...我當年...」Alice再一次未將說話講完...

「喺小朋友面前...唔好講呢D喇...」Catherine帶住微笑擰一擰頭..

Alice明顯仲係好內疚...

「你都係唔好返去喇...返去只會再俾嗰個衰人拎晒D錢去賭...」Catherine摸下摸下Alice對手...

「嗯...其實我都已經執好晒D野...諗住同菲菲搬返去爸爸媽媽嗰邊住...唔再理嗰個衰人...點知就喺我地要走之時,俾個衰人拎走埋我地D錢...嗚...嗚...」Alice又喊起上黎...

「嗯...唔緊要架...只要你同菲菲離開嗰個衰人...以後既生活一定會過得好好~爸爸媽媽一定會好好照顧你同菲菲~唔會俾個衰人再騷擾你地~」Catherine摸一摸Alice同菲菲塊面...

「家姐...」Alice攬住Catherine同菲菲黎喊...

望住Alice攬到Catherine同菲菲實一實...

又望住Catherine攬到Alice同菲菲實一實...

或者喺當年Alice真係好對Catherine唔住...

可能真係不可原諒...

不過都過左咁多年...兩姐妹...應該係時候冰釋前嫌喇...

Alice同佢個囡囡菲菲喺我地屋企坐左一陣...

抖左一陣...

心情平復返D之後...

我就同Catherine陪住Alice兩母女一齊返去拎野走人~

我同Catherine護送Alice兩母女上到佢地既屋企...

一間大約只有五十尺左右既劏房...

五十尺既劏房已經夠細...

房裏都仲要滿佈雜物...

有D係馬經丫...

有D係汽車雜誌丫...

有D係男裝衫褲丫...

絕大部份都係男人野丫...

仲要四圍亂擺丫...

放到周圍都係丫...

亂七八糟咁丫...

就只有一個細細地既書檯仔係最整齊...

我諗呢張書檯仔,一定係菲菲平時用黎做功課同溫書既地方...

一個可愛又得意既小妺妺,就要屈就喺呢D咁既地方成長...

仲要跟住個咁唔生性既衰老豆...

好彩菲菲唔似佢老豆咋!

如果唔係就陰公豬喇...

不過當然,我就唔敢亂講野...

始終都係人地既家事...

我又真係唔方便加把口既...

而家只好希望...希望Alice同菲菲真係可以逃離個衰人既魔掌啦...

「菲菲拎齊晒野未?」Alice拎起一細袋旅行袋...

「嗯嗯~拎齊喇媽咪~」菲菲亦都孭好個大背包...

「嗯...咁我地走喇~」Alice將條鎖匙放一放低喺檯面後...

我同Catherine都每人拎一細袋,離開呢個殘破既家。

衰男人...

喺呢個世界上真係多的是...

但又好奇怪...D女人總係鍾意黐埋去...

男不壞,女不愛?

痴線啦~

黐埋個壞男人有乜好?

你唔係諗住你可以令佢浪子回頭丫嘛?

有幾多個浪子,會係因為個女仔而回頭?

十個有十一個浪子回頭既個案,都係因為個浪子老喇,力不從心喇,咪回頭是岸囉~

D所謂既浪子有得佢玩,真係唔玩咩?

實玩到你殘添啦~

俾個臭男人玩到殘晒...浪費時間...浪費青春...值得咩?

所以話,各位港女們,要揀男友都係揀D真毒好~

唔好再揀埋D死MK喇~

萬一真係咁唔好彩,已經俾D死MK中出二百連發既話...

都係及早逃離佢地~

無謂俾人玩到看破紅塵先黎後悔太遲丫嘛~

我地三大一細坐上的士,好快就黎到未來外家...

“叮噹叮噹”Catherine撳兩下門鐘...

“咔”門一打開...

「珮君…珮珊?」我就見到伯母展露出一副驚訝樣。

「媽...」Alice就攬住伯母...

講起上黎...我都係第一次見伯母...

睇起上黎,伯母都係一個慈祥既人...

應該都唔係太難相處~

「返黎喇?」我又聽到屋裏傳出一把穩重既男人聲...

我偷偷望入屋...見到世伯都行左過黎...

世伯睇起上黎嚴肅D...

不過面上都係帶住微笑既~

「爸...我...」Alice未將要講既說話講出口...

「嗯嗯...我等你地返黎,等左好耐喇~入黎先啦~」世伯就請我地入屋~

我地都將D行李放好後...

再叫菲菲去沖個靚涼先~

「呢位係我既男朋友Edwin~」Catherine就將我介紹一下俾佢父母認識...

『你地好丫世伯...伯母...我兩手空空咁上黎...真係失禮晒...』我有D唔係咁好意思...

話晒都係第一次登門拜訪...

第一次見家長...

好好醜醜都買盒鮑魚麵丫...

送禮夠體面,緊係送鮑魚麵丫嘛~

但我帶得兩梳蕉上黎...

唉...第一次既印象唔好既話...以後唔好話有無雞脾食,打後既日子都唔知點過...

「唔緊要~唔緊要~」世伯笑笑口咁擰擰頭,「你同珮君帶住珮珊同我個外孫女返黎,已經係最好既禮物~」

好彩世伯都係通情達理既人~

不過講真...我都無做過D乜...

「珮珊~今次返黎,唔好走喇~留喺道一齊生活~等我地湊下個外孫女啦~」伯母捉一捉住Alice隻手,摸下摸下~

睇得出,伯母真係好掛住呢個女呢~

「嗯嗯~唔走唔走...以後都唔走...」Alice眼有淚光咁~

親情喔~真係好~

Alice同菲菲都返黎世伯同伯母身邊~

Alice同Catherine兩姊妹又冰釋前嫌~

BBQ大團圓了~

我地再傾多陣~

「嗯嗯~有穩定既工作已經好好~」

再飲多兩啖熱茶~

『嗯~總算託賴~總算託賴~』

傾多一陣...坐多一陣...

「咁珮君就拜託你喇~」世伯、伯母同Alice都送到我同Catherine出門~

『放心交俾我~放心交俾我~我會好好照顧珮君架喇~』我一面誠懇咁點點頭~

「我地會多D返黎探你地~」Catherine都攬一攬伯母~

「嗯~返去小心D喇~」揮揮手,道個別~

『嗯~我地走喇~拜拜~』我同Catherine拖住手,返屋企~

同Catherine拖住手行...

再一次喺暗黃色既街燈下行...

Catherine一直都無出過聲...

一粒聲都無出過...

我感覺得到...身邊既Catherine好似悶悶不樂咁...

我仲感覺得到...Catherine既脈搏...好似跳得...有D亂...

好似總係...心事重重咁...

點解我會有呢種感覺?

唔係…

應該話點解Catherine會俾到呢種感覺我?

Alice同菲菲都返去世伯同伯母身邊喇~

Alice同Catherine兩姊妹又冰釋前嫌喇~

明明就係CCTVB式既BBQ大團圓結局啦~

點解我總係覺得...覺得Catherine心裏...有萬千鬱結不能說咁架呢?

係唔係我...Miss左D乜呢?

“咔”開一開門...

“啪”開一開燈...

同Catherine返到黎屋企...

Catherine粒聲都唔出咁,坐一坐喺張布梳化上...

望住Catherine面色一沈...仲係好似心事重重咁...

我就坐到埋Catherine身邊,溫柔咁摸一摸佢對手:『Alice都返去同父母一齊住~做咩仲好似心事重重咁既?』

「我...其實...我...」Catherine手震震咁...

『有乜唔開心都可以話我聽~我可以同你分擔架喎~』我捉一捉實Catherine對手。

Catherine對手好震...而且仲有D凍...

「其實我...一直都...好內疚...」Catherine唔止手震震...就連成身都震起上黎...

『哦?』內疚?

我唔係好理解...

我唔係好理解Catherine所指既內疚,係對邊個呢?

又係指邊樣呢?

「其實一直以黎...我都覺得...好對你唔住...」Catherine震下震下咁...

把聲都變得沙啞...

對我...唔住?

Catherine佢...一直以黎...都覺得好對我唔住?

Catherine佢...有乜野對我唔住呢?

「當年...我因為嗰個衰男人...離開你...我真係...」Catherine震下震下...聲音越黎越沙啞...眼淚都滴到落我手背上...

原來係...

原來Catherine所指既內疚...係呢件事!

當年...「你又對我好...佢又對我好...有得揀點解唔揀個靚仔D?」Catherine同嗰個衰男人一齊...拋棄左我...

原來Catherine佢...一直都放喺心裏面...

一直都...內疚...

「我真係好內疚...我真係好內疚...我一直都唔知可以點...可以點補償返俾你...我一直都唔知可以點樣彌補...我只好...只好作賤自己...」Catherine既眼淚源源不絕咁滴到我手背上...

作賤自己...

Catherine佢...

「我只有晚晚出去玩...晚晚飲到爛醉...晚晚都不省人事...我個心...我個心先會好過D...」Catherine不斷咁喊...不斷咁喊...

Catherine佢之前晚晚都走去蒲...

原來係...

「直至到我遇返你...我遇返你之後...我都仲係咁內疚...仲更加內疚...我好想可以同返你一齊...但我又怕你會嫌棄我...」Catherine擰一擰頭…

我...我又點會...

「我怕你...你唔會再愛我...就算我地再喺返埋一齊...你都唔會...你都唔會再愛上一個已經俾人...俾人玩到殘晒既我!」Catherine起一起身,直跑出家門!

『Cat!Catherine…』我望住Catherine既背影...

“啪”大門都閂埋喇...

我都只係識得企喺道...望住道門...

我...唔會再愛上...已經俾人玩到殘晒既Catherine?

點解Catherine要咁講呢?

點解Catherine會話自己俾人玩到殘晒呢?

我又點會唔愛Catherine呢?

Catherine…

點解你要咁傻呢?

點解你要作賤自己呢?

都咁多年喇...

都已經過左咁多年喇...

點解仲要...

點解仲要介懷呢?

介懷...

點解我仲要介懷...

我仲介懷...

或者我...或多或少都真係...有D介懷...

或者我...或多或少都係有D介意...介意Catherine曾經瘋狂過...

但都已經...都已經...

唉!都係唔好諗咁多!

快D出去搵返Catherine先好過!

我出一出門,落到街上。

企喺街上左望望,右望望,前望望,後望望...

望晒四周,遠遠近近,就係望唔到Catherine既身影...

我都唔係隔左好耐先落黎姐...

點解咁快就唔見Catherine既身影架呢?

Catherine會唔會走得太過快呢?

我喺街上四圍走...四圍跑...

穿過男男女女...

穿過橫街窄巷...

好似個傻佬咁四圍跑...

我一邊跑丫跑,搵丫搵,又拎部電話出黎,打俾Catherine...

「嘟...嘟嘟...嘟嘟嘟...喂~我係Catherine~而家唔得閒聽你電...」無人聽...

「嘟...嘟嘟...嘟嘟嘟...喂~我係Catherine~而家唔得閒聽...」仲係無人聽...

「嘟...嘟嘟...嘟嘟嘟...喂~我係Catherine~而家..」都仲係無人聽...

「我係Catherine~而...」直頭熄埋電話添...

『Catherine~你去左邊丫?』我只好留言...

『點都好~有乜事咪慢慢講囉~』再留言...

『打返個電話俾我先啦好嘛~』又再留言...

但就算我打左幾多個電話,留左幾多個言,等左幾耐都好,都係無回音...

Catherine去左邊呢?

真係擔心死我喇...

我繼續喺人群中...

「放開我!」突然...我聽到對面馬路有把男人聲...

好奇心之下我又擰個頭過去望一望...

「你聽我講...唔係咁架...」我望到有個女仔...拉住男人隻手...

「夠啦!我受夠喇!」個男人大喝一聲!

「你聽我講先啦...唔係你咁諗架...」個女仔仲係苦苦哀求咁既樣...

「夠喇...夠喇...咁多年黎...我真係受夠喇...我真係好攰喇!」個男人揮一揮衣袖...不帶走一片雲彩...

望住呢個女仔...跪喺地上...苦苦咁望住個男人既背影...越行越遠...越行越遠...

搞咩丫?

做咩啫?

而家算點先?

點解一晚裏面,可以見到兩次呢D男女鬧交既場面架?

仲要喺街上...

仲要係個女既留低喺道痛哭,個男既拍拍屁股走左去...

咩事丫?

我係唔係真係咁好彩丫?

係好彩?係唔好彩?

咩都好啦~

望住一個女仔跪下街上喊...總係好似...好似好可憐咁...

唉~~~你話我多事都好啦~~~

我一步一步咁行去對面...一步一步咁行到埋去個女仔身邊:『小姐...你無事丫嘛?』