瞓喺張床上...矇矇矓矓...矇矇矓矓...

未醒未醒...

唔想醒...唔想醒...

總係想可以繼續瞓...

瞓喺張床上...瞓喺睡夢之中...





「起身喇~懶瞓豬~」突然,有把溫柔既聲線進入我夢鄉...

『嗯嗯...俾我瞓多陣添啦...』但我都仲係好想瞓多一陣...

「好晏架喇~要起身返工架喇~」除左溫柔既聲線之外,仲有一隻溫暖既大手摸一摸我個冬菇頭...

『嗯嗯...醒架喇...醒架喇...唔唔...』口裏說醒,身體卻很誠實...

雖然我話“醒架喇...醒架喇...”,但我都仲係攬實張被,唔願落床...





「懶瞓豬~係唔係要錫啖先醒到丫?」溫柔既聲線過後,我感覺到有兩片柔軟既嘴唇貼住我既嘴唇...

『嗯...嗯...』我微微睜開雙眼,望一望眼前既...眼前既東日...

係我最深愛既尚東日~

每朝…我都好唔願醒~

而同左東日一齊住之後,我每朝都要佢錫我先肯醒~





一個女仔,一朝早睜開雙眼就見到自己最深愛既人,係好幸福既事~

而每朝都有自己深愛既人,好似白馬王子咁將自己錫到醒,就係最幸福既事喇~

『嗯...嗯嗯...嗯嗯嗯~』我再攬實東日錫多一陣...

「好喇~真係要起身梳洗架喇~」東日摸一摸我個冬菇頭,好溫柔咁望住我~

『嗯~而家去梳洗~』我再攬實東日錫多啖~

「嗯~咁我煮定早餐~等你梳洗完立刻有得食~」東日再摸摸我個冬菇頭~

『嗯~』我就起身拎定D內衣褲去浴室梳洗~

赤裸裸咁企喺個企缸上面...





任由暖水流遍全身...

好攰呢...真係好攰呢...

尋晚同東日真係搞得…太夜…

搞得…太攰喇...

尋晚我同東日搞過D乜?

絕對唔係你地諗嗰D衰野啦~

我同東日都好正經架~





咁即係搞過D乜?

無~我同東日砌下模型咁姐~

是咁的~

尋晚同東日打完個邊爐之後,我就急不可待咁拉住東日返黎砌我隻新買返黎既RG版UNICORN~

呢隻RG版UNICORN我等左好耐架喇!

都等左成個月有多架喇!

等左成個月,終於俾我等到!我就緊係會心急D架啦~

所以一返到黎,我一換好套衫,就咋咋聲喺我既工作枱上開工~





東日亦都好似好有興趣咁行到埋黎:「我都想學下~」

『嗯嗯~咁就首先由最基本開始先~』見東日咁有興趣,我就緊係好樂意咁教教佢啦~

「嗯嗯~」東日變左個小學雞咁~準備上堂~

『嗱~首先緊係要拆盒先啦~』我拎一拎盒UNICORN放上枱~再拎一拎起把𠝹刀,𠝹一𠝹D膠紙~

「嗯嗯~」東日就好耐心咁睇住我~

『跟住就將D件剪晒出黎先~』我就拎定把剪鉗出黎~

「嗯嗯~」東日就望一望下D件~





『要小心D喎~唔好剪得太貼喎~要留返D位~之後先慢慢再執既~如果唔係,就會破壞到件件既完整性架喇~』我交一交把剪鉗到東日手~

「嗯嗯~」東日就好小心咁望實D件黎剪~

『係喇~慢慢~唔駛急既~砌模型要好有耐性架~唔急得架~』我就望住東日笨手笨腳咁~

「嗯嗯...慢慢黎...慢慢黎...」東日又傻頭傻腦咁剪下剪下~

望住東日呢個笨手笨腳傻頭傻腦樣真係...都真係幾搞笑~

平時望住東日好專心咁打文,就會覺得好似好吸引,卻好似走不近...

但而家眼前既東日,都係好專心~但就係好似好近~好親切~

好吸引...走不近?

我喺道講梗乜丫?

望住東日繼續好專心又好細心咁剪D件出黎~

剪左好一陣子...都剪左成個幾鐘~

當然我都有剪埋一份啦~

唔係既話,剪件都要剪足一晚~

「呼~終於都剪晒喇~手都軟埋丫~」東日Fing一Fing對手~

『叻喇叻喇~』我望一望D件,其實有七成都係我剪~

不過都唔怪得東日既~

我初初玩模型,都用左好多時間喺剪件呢個步驟上~

而且仲俾我剪爛左唔少件~

而家東日可以安安全全無穿無爛咁剪到三成出黎,算叻架喇~

東日鬆多兩鬆對手之後:「跟住呢~跟住呢~跟住係唔係可以溝油上色架喇?」

『未得住~未得住~喺溝油上色之前,我地仲要分組既~因為我地上色係一Part一Part咁上~所以要分好晒佢地先~』我就拎起D件~

「分組丫?」東日望住堆件好似好迷惘咁~

『係丫~同色既就一堆~好似呢件啦~呢件啦~仲有呢幾件都係同色架嘛~』我拎起幾件同樣係白色件喺手~

「哦~咁呢件...呢件...同呢件呢?」東日又喺堆件中,拎起幾件~

『嗱~呢件係~呢件都係~但呢件呢,就唔係喇~呢件係灰色黎既~』我拎起東日手中件灰色件~

「哦?乜係灰色黎架咩?」東日拎起件灰色件,仔細咁睇清楚~

『係丫~灰色黎架~其實UNICORN既色調就唔係有好多隻~不過就有D近似~所以要好細心咁去分~』你話UNICORN易玩又唔係,難玩又唔係...

睇起上黎好似好易~

但玩起上,一個唔小心既話,就好易上錯色~又或者好易整爛D件~

因為UNICORN個設計本身就係複雜~

再加上係玩出名支架脆弱既RG...就更加易爛~

所以我覺得UNICORN遲遲都唔出RG版係有原因架~

「哦哦...咁呢件係唔係灰色?」

『呢件係白色~』

「哦...咁呢件係唔係白色?」

『呢件係灰色~』

「哦...咁呢件係灰色定係白色?」

『呢件係藍色~』

就係咁,我同東日就分左成晚~搞左成晚~

懶懶洋洋咁梳洗完~

我濕住個頭咁行出黎~

我見到東日已經煮好晒早餐~

放梗喺餐檯上~

東日望一望我,帶住微笑咁講:「個頭咁濕好易頭痛架~黎~我幫你吹乾佢先~」

我就俾東日隻溫暖大手拖住去床邊~

東日拎一拎起個風筒~

“呼”一聲響~

『唔該~』我就乖乖地,坐定定,等東日幫我吹頭~

東日好細心咁撥下我個冬菇頭~

輕輕力咁~好溫柔咁~

每朝都有我深愛既東日幫我吹頭,我真係好幸福~

東日真係一個好完美既男朋友~

我諗喺呢個世界上,真係唔會再遇到另一個~

所以我一直堅持住只愛東日~一直等成為東日既女朋友既機會係無錯既~

而又好好彩之下,真係俾我等到呢個機會~

我真係世上最幸福既女人呢~

最幸福既女人?

我望住檯上塊鏡仔...

望住鏡仔入面既東日…

望住東日既雙眼…

東日既雙眼…東日既雙眼…

點解...有時...總係好似...好似缺少左...缺少左...

『嘩!好熱好熱!』我突然覺得個頭勁熱!

「Sorry!Sorry!吹返凍佢!我幫你吹返凍佢!」東日手亂腳亂咁立即較返凍個風筒~

『差D著火~差D著火~』差D就變燶菇頭~~~

「哈哈~Sorry~Sorry~我會小心D~我會小心D~」東日摸一摸我個頭,再細心咁幫我吹~

呼~真係好險呢~

等到東日再幫我吹多一陣~

「搞掂喇~八成乾喇~」東日摸一摸我個冬菇頭,收返好個風筒~

『嗯嗯~食早餐~食早餐~』我就彈下跳下咁彈過去餐檯~

我望一望餐檯上既煎雙蛋~雙腸~火腿~

『正呀喂~係我最鍾意食既西式早餐丫~』我用力索一索~

有一陣陣煎香味~(定係我個燶菇頭既燶味呢?)

「我就係知你鍾意食西式早餐~不過唔健康架~唔好食咁多丫~」東日都行到埋黎餐檯前,同我一齊坐定定~

『知道知道~』口裏說不,身體卻很誠實呢~

我已經左叉右刀咁開餐~

每朝都可以食到東日煮既早餐~

「黎~」東日切一切條腸仔,放到我嘴邊~

『嗯~~~好味好味~~~我都餵你食~』我切下切下塊火腿~餵到去東日嘴邊~

「嗯~好好味~」東日甜絲絲咁點點頭~

可以互相餵對方食早餐,真係夠晒溫馨呢~

拍拖丫嘛~拍拖就係要咁溫馨~~~~

一有時間~一有機會~可以喺對方身邊既時候,就要做多D一齊做既事~

製造多D共同回憶~

屬於我地兩個既共同回憶~~~

我好記得東日係有咁講過~~~

喺東日既作品裏面,係有咁寫過~~~

「呀~~~」你餵下我~

『嗯嗯~~~呀呀~~~』我餵下你~

餵下餵下...餵下餵下...

『呀呀~呀呀~呀...東日~~~』我擘大個嘴,等左東日好一陣子都未等到佢切完塊火腿~

「下...丫...Sorry...嗱~」東日餵一餵塊火腿埋我嘴邊~

『嗯~做乜無啦啦發呆丫~』我隨便咁問一問~

「我...無~諗梗個新故點寫咋嘛~」東日諗下諗下咁點點頭~

『哦?諗成點丫?』我繼續隨便咁問問~

「仲構思梗…」東日仲係諗下諗下咁~

『嗯~慢慢黎喇~唔駛急既~我既男朋友係大作家黎架嘛~』大作家隨便諗一諗都寫到驚世巨著架啦~

「我已經...諗得好慢...再慢既話...就要開天窗架喇...」東日諗下諗下,擰擰頭。

『就算真係開天窗都唔怕啦~我地會耐心咁等你架嘛~』等一生都等~

「你會...但唔係所有讀者都會...」東日又擰擰頭...

『嗯?』我有D唔係好明東日既意思。

「唔係個個讀者,都好似你對我咁好...喺呢個急速既社會裏面,所有野都去得好快...假如你太耐都唔更新既話,D人好快就會將你忘記...徹徹底底咁把你忘記...就好似從來都無出現過一樣...」東日一對空洞無物既雙眼...就好似黑洞一樣...

我望住呢一對好似黑洞一樣既雙眼...

總係好似缺少左...缺乏左...

好重要...好重要既...

「都係唔好諗咁多喇~食野先啦~唔係就遲到架喇~」東日再切一切塊火腿,餵到埋我嘴邊~

『嗯嗯~好味~黎黎黎~等我都餵下你~~~』我地就繼續互相餵對方~

假如你太耐都唔更新既話,D人好快就會將你忘記?

我唔係好理解東日呢句既意思...

之但係東日呢句說話,又不斷咁喺我個腦海中打轉...

徹徹底底咁把你忘記...就好似從來都無出現過一樣?

乜真係可以架咩?

乜真係可以將一個曾經出現過喺你既世界裏面既人,徹徹底底咁忘記架咩?

一個人就算幾無記性,好似我咁成日俾人話無記性,都無可能將一個人徹徹底底咁忘記得一乾二淨~

總係會...殘留住...一D...重要既事...難忘既事...喺腦海中...

只要你再遇上...某D關於呢個人既事或物,你都會立即將呢個人記起!

呢一個人既殘影,總會立即喺你眼前出現!

摸不到...捉不緊...似是而非...

你不能,亦不曾把一個人忘記...

除非...你從來都無將呢個人放在心裏...

同東日嘆完個二人世界套餐~

都係時候準備返工喇~

「等我幫你襯衫~」東日行到去埋我個衣櫃道,揀下揀下~

『唔該晒~』我就坐定定喺張床上,踢下踢下對腳咁等東日幫我揀衫~

唔知東日今日會幫我點襯法呢?

其實由同東日搬埋一齊住開始,我出街又好~返工都好既衫都係由東日幫我襯~

一個女孩,有深愛既人幫佢襯衫,唔駛自己煩惱,係多麼幸福既事呢~

我真係好幸福~

訓既時候有最愛既人俾我攬住瞓~

又有最愛既人錫到自己醒~

又有最愛既人幫自己吹頭~

又有最愛既人為自己煮早餐~

又有最愛既人餵野俾自己食~

仲有最愛既人幫自己襯埋衫添~

你話我係唔係全宇宙最幸福既女人呢~

我知我係曬梗幸福架喇~

但我D幸福真係流到一地都係喇~

你就俾我曬下啦~

我繼續踢下踢下對腳仔,睇住東日幫我襯衫~

等多一陣子之後...

「就咁啦~」東日拎起左件胸口有張黑白相既白色緊身Tee,再加上一條黑色緊身長褲~

『嗯~唔該晒~』我接一接過套衫~

「嗯~咁我去洗埋D碗先喇~」東日就行去個開放式廚房嗰邊~

無錯喇~東日係無幫我換衫既~

因為我...始終都...有D怕怕地羞~

而喺同東日交往呢三個月以黎,除左話我地無幫過對方換衫之外,我地都無真真正正玉帛相見過既~

係丫~我地都仲未有咩咩過架~

始終...都係岩岩先開始咋嘛~~~

岩岩開始又搬埋一齊住?

咁香港D次序不嬲都係咁亂架啦~

同居又唔一定要結婚~

結婚既又唔一定係搬埋一齊住喎~

一齊住又話唔生~

到離左婚先有個B都唔出奇架~

香港就係一個咁奇蹟既都市黎架啦~

講真嗰句,我同東日都係比較保守既人~

都唔係好認同婚前性行為既~

之不過...而家D租金仲係鬼咁貴...

搬埋一齊住,可以分輕下丫嘛~

好多情侶都係咁架啦~

生活艱難丫嘛~唉~

不過可以同到深愛既人一齊生活,已經好好架喇~

我都係唔好諗咁多,快快手手換衫返工好過~

萬一份工都無埋,生活就真係難上加難喇~

換好衫~再等埋東日洗好碗之後~

「行得~」我就拖住東日隻手,去到停車場~坐上佢架白色既Mini Cooper~

坐定定喺架Mini Cooper裏面,時快時慢咁...

其實我都真係覺得東日手車唔係咁掂...

總係好似唔多專心咁...

『係呢~你今日有乜野做呢~』喺呢D時候,我仲聊東日講野,會唔會危險左D呢...

「我?」東日諗一諗,「我...等等會去揀間咖啡店坐下寫下文咁啦~」

『無其他野做喇?』我仲要追問一下...

「無啦~今日都無其他野做~我可以一邊寫下文,一邊等你放Lunch~」東日點一點頭~

『好丫~咁你今日Lunch想食D乜呢~』我繼續問~

「我丫...」東日諗一諗,「我又無乜所謂喎~你想呢?你D時間緊迫D~你話事~」

『我想去食豆腐火腩飯~』諗起都流口水~

「街市嗰邊嗰間?」東日帶住微笑咁問~

『係丫~嗰間最好味架喇~』夠晒火候~

「好丫~咁你今日係唔係同Timothy同一更丫?係唔係同埋佢一齊食丫?」東日繼續Keep住微笑~

『係就係同Timothy同一更~之但係我諗佢都係同佢女朋友撐檯腳~唔得閒理我地架喇~』條友仔真係丫...講起就扯火喇!

「哈哈~你又唔好咁話人啦~佢女朋友醒返無幾耐,係著緊D架喇~」

『著緊還著緊,都唔係咁架嘛!約親佢食飯,次次都話要陪女朋友!重色輕友!』

「哈哈~~~睇開D啦~~~」

就喺咁,係你一句又我一句之下,坐住東日架車返去舖頭~

而奇怪既係,就係同東日傾住計,佢手車反而定左落黎~

無時快時慢~

好安全咁~好安心咁~

點解會咁架呢?

真係唔知~

反正我地就安安全全,平平安安咁去到目的地~

「咁我去搵咖啡店坐下喇~你返工都要小心D喇~放Lunch打俾我啦~」東日交低幾句~

『嗯~你都小心D喇~放Lunch打俾你啦~拜拜~』我同東日揮揮手~

「嗯~拜~」東日又同我揮揮手道別後~

我就行返去舖頭~

行多兩步,轉個靚彎,就已經見到Timothy開好晒檔~

『Yeah~準時返到~』我彈下跳下咁彈入舖頭~

「Yeah~準時咁喺我開完壇先返到囉~」Timothy冷眼望一望我...

『嘻~唔好咁啦~』我搭一搭住Timothy膊頭~

「嘻...唔好咁啦...以為有拖拍~有個男朋友睇住你~會好D添~點知又係咁...」Timothy冷冷咁擰擰頭...

『好左架喇~好左架喇~唔係既話實遲到架喇~』你都唔係唔知我幾咁懶瞓架啦~

真係鏟都唔醒架嘛~

「好左好左...點丫?睇你個嘴角含春樣,一定幸福死啦~」Timothy恥笑一下我...

『咩嘴角含春丫?我邊有姐~係就係好幸福...不過你講一講...我又總係覺得...覺得好似...缺少左D野咁...』俾Timothy咁樣恥笑一下,我又諗起好似總係缺少左D野...

喺東日身上…

「缺少左D乜春丫?有得同男神一齊仲想點丫?等等先...Send個Message先...」Timothy拎起部電話撳撳撳撳撳...

『唔...唔知丫...但總係好似...好似...』我諗下諗下...

「唉~你地D女人真係麻鬼煩就麻鬼煩啦~無既時候就恨~恨到既時候又周身痕!等等先...等等先...覆返個Message先...」Timothy又拎起部電話撳撳撳撳撳...

『邊係姐?!你嗰個又點丫?唉呀Send乜鬼Message呀?!幾時搬埋一齊住丫?!日見夜見咪唔駛咁死唔斷氣囉!』真係睇見佢就覺得煩!

「唉~我都講過你聽,佢熱愛自由架啦~搬埋一齊住喎...諗諗先...諗諗先...」Timothy仲係拎住部電話撳撳撳撳撳...

『你唔係話佢變左D架喇咩?』我掩一掩住Timothy部電話~

「縮開縮開!係就係變左D...之但係都唔可以咁急進架嘛…再睇定D先啦~再睇定D先啦~你都係唔好阻住我喇~等我再Send多幾個Messages先~你睇住舖先啦~」Timothy就行左埋一二邊...

『有異性!無人性!』我都話左佢架啦!

正一衰人黎架!

一有拖拍就係咁!

仲黐身過D女人!

好明顯就唔係你女朋友熱愛自由~

係你太過黐身咋!

鬼唔望你又再同女朋友鬧交!冷戰!

哼~~~