一個人,追一個女神: 序
9月1日 朝早7點
「一唔一齊返學?返就7點10你樓下等啦!」悲鳴起床後用電話輸入。同時用單手穿上嗰套無燙過既校服。「嘟嘟!」電話響起,「OK!」對方輸入。悲鳴一笑,戴上嗰隻小學生先會用既萬用錶,著住對黑白色AIR FORCE出門口。
7點40分,悲鳴慢條斯理咁走到附近既一條天橋,睇住部電話,仲一邊咬住個包。睇住FACEBOOK上既好笑野,他頓時感嘆自己點解唔買花生味。突然,他遇上她......
佢叫霜心,是悲鳴讀緊嗰間中學既其中一個女神,佢無咩好,得個樣殺得死人。據說佢係一個極度挑剔,重度公主病病患,危險程度同十號波有得比。悲鳴見到佢之後,根本毫不在意,一於繼續打自己部機。兩個人行得差唔多咁快,但係悲鳴根本無留意佢,仲特登行慢小小,等佢快D離開自己既視線範圍。「頂你咩,再遲D呀!」某人說,「唔係呢,頭先行行下見到傷身哥呀,我驚行得快過佢會出事呀!公子」悲鳴仍低頭玩電話,「出咩事吖,再唔行一陣遲到比人鬧就真係傷心嗱!」公子話。公子係悲鳴既朋友,佢唔係有公子病先叫公子,而佢真係叫......供梓。而傷身係佢地對霜心既叫法,因為佢地覺得,遇上霜心,注定傷身。
踏入課室嗰一秒,嘈吵的環境令佢地從暑假休閒既生活拉返現實。「叮噹!」上堂鐘一響,就好似死神拉你去坐監咁,無得走......
到左悲鳴最期待既時侯,分座位表!呢個舉動唔只可以令同學之間增進感情,仲可以決定你呢一年既生死。簡直係生死時速呀!「好嗱咁多位同學,你地而家跟出面既座位表坐啦!」班主任講完呢句之後,差唔多成班人衝出去睇。悲鳴企係公子身邊,等班人睇完先慢慢睇。「喂你兩個想同邊個坐?」言已行過嚟悲鳴身邊講,「邊個都好,唔好係D惱羞仔!」悲鳴說,「邊個都好,最好唔係肥婆!」,「嘻,我同大波妹坐,上堂有野睇嚕~係喎,悲鳴你睇左未?你應該會好開心。」言已用佢淫賤既眼神望住佢所講既大波妹。悲鳴心諗「有咩開心得過同自己女神坐吖?但係人地係第二班喎。唉!」「又真係幾開心喎,哈哈,仲有D傷身添。」公子大大聲咁講。「咁就死得啦!」悲鳴一邊擠進人群一邊說,其實悲鳴已經知道自己奶野,因為公子的兩隻字,傷身!
果然,悲鳴的確同霜心坐同一組,同組仲有飛機王同港女一名。公子嗰組就好啲,兩個隱形人,一個惱羞仔。不過都算幾熟,有計傾下咁。言已就最開心,同大波妹,乖乖仔同公子條女,又唔洗擔心功課唔識做,又有野睇。悲鳴日日睇住佢撩大波妹傾計都覺得自已上一世唔係殺左人就是推阿婆出馬路,竟然要同霜心坐。
過左幾日,悲鳴知道自己無得同自己心目中既女神一齊上堂,心灰意冷咁伏係自己張枱上面。呢一刻,悲鳴真係好想悲鳴。