[真人真事+少少甜] 一切，由MSN開始: 第十二章、丁：友誼萬歳
見到枱面上竟然係一碗腸仔通，我都唔知笑好定喊好
。不過我都知佢唔會煮到啲咩出黎，加上係藍藍煮嘅，我就緊係唔介意啦。睇個賣相都好似唔錯咁喎，點知一食落去，嘩！
Hi！咁咸嘅！
不過我見到藍藍一副好期待咁嘅樣，我即刻將果句粗口連埋通粉一齊吞落肚，拿拿林食埋佢。 「你食得咁快係咪好肚餓呀？我裝多碗俾你丫
」藍藍一野就搶左我隻碗入廚房，咁我為左唔掃佢興唯有食多碗啦… 好唔容易終於食哂，藍藍就話：「丁當，知你唔開心。我有一份禮物比你，你過黎我比你睇下。」果下真係有啲驚喜，原本諗住佢個心一早飛左去大雄果度，原來佢都有少少著緊我嘅，我即刻有啲沾沾自喜。
「喂喂喂！你做乜帶我入你房？我唔想咁快失身喎哈哈」我扮到有啲欲拒還迎咁。
跟住佢帶左我入房，間房咁多年都無咩點變過，無論係桃紅色嘅牆紙，定係佢啲好幼稚嘅卡通擺設，都同我細個上黎玩嘅時候一樣。
藍藍係個櫃到拎左件波衫出黎，佢講：『之前你咪話你好鍾意cp3嘅，我特登走去買黎俾你。原本諗住當生日禮物送俾你嘅，不過見你依排咁唔開心就提早送俾你先當係鼓勵下你啦。雖然你做唔到隊長，但係你係我心目中都仲係好西利嫁！』
『件衫好貴嫁喎，不如我俾返錢你啦…』
『識左咁多年唔洗咁斤斤計較啦
』 我接過件波衫，果一刻，我真係有啲感動。之前一直以為藍藍俾大雄迷到神魂顛倒，但原來佢都無忘記到我，我係佢心目中都仲有番咁上下地位。
望住面前笑得好燦爛嘅藍藍，我突然攬住左佢，我知道呢個時機可一不可再。
『藍藍，我好鍾意你，我一直都暗戀你，之前我見到你同大雄變到咁熟我真係好驚，我好擔心會失去你。你可唔可以俾次機會我，等我做你男朋友？』我心入面唔知點解湧出一股勇氣，將我一直收埋係個心入面嘅野講哂出黎，果陣時我個心真係跳得好快好快，個腦完全諗唔到野。
『丁當，我知道你對我好好，好緊張我。我地一齊經歷過好多野，同你一齊嘅時候真係好開心，我一直都當你係我最好嘅朋友。如果你做我男朋友嘅話，我諗你都會對我好好，甚至比依家更好。但係我好擔心萬一我地嘅友情變左質，又或者有一日我地遇到啲咩事而令到我地唔再咁愛大家嘅時候，我地唔可以再好似依家咁做番好朋友。所以，對唔住，我唔可以應承你，但係我想你可以一直留係我身邊，做我最好最好嘅朋友』藍藍甩開左我雙手，塊面好紅，係佢嬌滴滴嘅面上係一個堅定嘅眼神。果一刻，我知道，我再點講都唔會改變到佢嘅決定。
『對唔住…我唔應該講啲咁嘅野，或者我地真係比較適合做朋友。多謝你件衫，我走先喇，下次再見啦』
我真係好後悔，我知道有啲野講左出口就收唔番，可能就係因為我嘅一時衝動，令到我同藍藍唔可以再返到好似以前咁嘻嘻哈哈。我個心真係好亂好亂…