[真人真事+少少甜] 一切，由MSN開始: 第二十四章、丁：天各一方

同藍藍講完我同kelly嘅野之後，見到佢無嬲，仲識得串我，成個人都好似鬆一口氣咁。我同左kelly一齊，咁樣我就應該可以同藍藍以朋友嘅關係一直相處落去。 

靜香： 
21:15 你聽日得唔得閒呀 
21:15 不如一齊食lunch丫XD 

我： 
21:16 好呀 

第二日返到學校，一早就已經見到大雄係度同藍藍傾計，佢又話要幫Mrs Lam做野嘅… 



呢個時候，kelly突然彈出黎：『我地今食咩呀？不如去食越棧丫 』 

『好…好呀，你鍾意啦』 

無幾耐Miss Wong就入左黎，佢手入面拎住張紙：『大家呢家個位都坐左個半月喇，係時候調下位。依張係新嘅坐位表，大家聽日就開始跟住佢黎坐啦』 

Miss Wong一走左之後，有成半班衝左出去睇座位表，我當然有份。我自己就會坐係靠窗個角落位，真係打飛機都無人知 kelly咁岩就坐係我前面。而藍藍就左係我嘅對角，天各一方，而坐係藍藍隔離嘅係…大雄！！！  

Hi有無咁岩呀！ 呢個時候我望一望大雄，見佢望住張座位表係度陰陰嘴笑個樣真係好黑人憎。不過算啦，唔通我同Miss Wong講我要同大雄調位咩… 



話咁快就到左lunch time, kelly一落堂就走過黎捉住我隻手：『我好肚餓呀，行快D啦我地』 

我俾kelly捉住走嘅時候，我回頭望左望藍藍，佢都望緊我，個樣好似有D sad咁，一見到我望住就即迴避我眼神。藍藍點解會唔開心嘅？應該係我一時睇錯姐。 

『兩個豬扒白飯丫，一個要多蔥。一杯熱檸茶，一杯椰汁冰，唔該。』 

『係呢，遲D就係halloween喇喎，不如我地一齊去OP玩丫 』 

『係喎，又到halloween喇喎。我ok呀，不如搵埋藍藍去丫，我之前中秋都無同佢慶祝，今次都掉低佢好似唔係咁好咁』 



『…淨係我地兩個去唔得咩…』kelly把聲變到好細，好似唔係咁開心咁 

『我同佢真係朋友黎嫁炸，同埋我唔係果D重色輕友嘅人』 

『咁算啦…你鍾意點就點啦』 

『好啦，咁我返到去問下佢啦』 

食完飯返到課室，藍藍又坐左係度同大雄傾計。 

『藍琛蕾，遲D halloween不如齊去OP玩啦』 

『下…不如你同kelly兩個人去啦，我唔想做電燈膽喎』 



『有咩所謂姐，我地識左咁多年，廢事你話我重色輕友』 

『你地去OP呀？不如預埋我丫』大雄無啦啦搭把嘴埋黎。你D面皮有無厚到咁呀 

『咁不如…我地４個一齊去啦，人多熱鬧D好玩D嘛』連kelly都企埋去大雄果邊，咁我都無野好講啦… 

『咁…好啦，我都去啦』算啦，雖然俾大雄痴到埋黎，不過藍藍肯去就唔同佢計較。 

就係咁，我地４個看似有D關係但又唔算好熟嘅組合就約埋一齊去OP喇…