[真人真事+少少甜] 一切，由MSN開始: 第二十九章、藍：三人同行

「呢排女班長同大雄玩到好埋囉，你估佢地會唔會拍緊拖？ 」 

「咁丁當點算？ 佢地以前唔係好friend嫁咩？」 

「依家丁當咪同左個大波妹一齊囉！  都唔知佢前世做乜9，咁好彩又有靚女、又有大波妹鍾意佢。我都想呀！！！！  」 

「你FF下算啦，傻的嗎仔！ 」後面有幾個男仔係到討論緊我地，以為自己好細聲，其實大半班都聽到佢地講乜，佢地真係好討厭！  

「喂！你班毒ling好收嗲啦！藍藍同丁當既事關你地屁事！ 」本來我想扮聽唔到，但大雄知我唔開心，就忍唔住開聲鬧佢地。 



「算啦，大雄。佢地講下姐... 」我拉住大雄，驚佢嬲起上黎唔知做乜。 

「佢地講乜都得，就係話你就唔得！」其實心入面都係到暗爽緊哈哈。 

我即刻拉佢落去小食部，等佢下下火。 

「藍藍，你做乜拉走我？等我打9佢地，睇下佢地仲敢唔敢咁多嗲！ 」 

「唔好咁火啦，我唔介意喎，反正佢地講緊事實姐...」 



「你呀... 頭先成個sad樣出哂黎，仲係到逞強。」 

「咁係有少少既。唔講呢D啦，我今日放學要去補P Chan呀，今日係新一期，你一唔一齊呀？」 

「補習？食得嫁？哈哈 」 

「我地出年就要會考啦，緊係早D補定，雖然P Chan真係幾煩膠。」 

「既然你叫到，我就去啦。」好yeah！大雄肯陪我補，我就唔洗咁悶。 



今期報左4:15個班，再加上大雄要辦手續，放左學唯有即刻狗衝。一搞完手續，行入班房就見到一個好熟悉既身影... 

「丁當！點解你係到既！？ 」 

「藍藍！同...大雄。」 

「你唔係不嬲好討厭補習嫁咩？ 」 

「係既，但Kelly係咁叫我同佢補習。你地都知佢讀書幾屈機嫁啦，所以我咪諗住偷偷地補番一個月，打下個底先囉，點知又會咁好彩撞正藍藍你... 地哈哈。」 

成堂我都好唔專心呀呀呀呀呀呀呀呀！ 無諗過會同時同大雄仲有丁當一齊補習，氣氛好尷尬。結果，今堂淨係有抄野，其實一隻字都無聽過入耳，成個腦都係到諗呢2個月所發生既事。原來2個月已經可以變化咁大... 

落堂啦... 死啦，又出現一個問題。唔通要3個人一齊行番去搭車！？ 

「唉！乜原來上P Chan會咁 支力！」大雄一出班房就話。 



「我行先啦，我要去一去南豐買野比Kelly。 」丁當之後就一支箭咁跑出現代。 

呢個時候，真係鬆一口氣。但見住丁當個身影愈縮愈細，最後消失係人群之中，我個心好痛，仲痛過之前... 

「藍藍，你做乜唔出聲呀？」 

「無呀，我太眼訓姐。次次補完習都會咁。」 

「我陪你慢慢行番海濱啦，反正仲有時間。 」 

「都好。」習慣就好。 

藍琛蕾，你要好好記住，係你身邊陪住你、錫住你果個叫大雄。你對佢唔住，你呢一世都原諒唔到自己嫁！ 



行到去荃灣公園果時，大雄叫我坐低係側邊D長凳度。 

「你合埋眼，我比D野你。 」又懶神秘咁！ 

「嘩！點解既？」眼前竟然係好耐之前我睇中左既一對食鬼耳環！  

「上次見你係櫥窗望左佢好耐，所以咪買比你，當係多謝你比個機會我地一齊。 」大雄笑得好開心，而我亦都一樣。唔單止因為佢買野送比我，而係我完全感覺到佢好愛我、好錫我。 

藍琛蕾，記住要好好對大雄，因為佢好愛你。