[真人真事+少少甜] 一切，由MSN開始: 第四十章、藍：重新返回

自從長洲之旅，丁當比起佢當初拍拖個時搵多左我好多。 

「藍藍，一唔一齊食飯？」 

「藍藍，一齊去小食部？」 

「藍藍，今晚跑步？」丁當成日搵我，我當然開心，但係咪搵得太多！？ 

差唔多每一次我都話：「唔啦，我約左大雄。下次先啦。」或者求其作一個理由。 



丁當，你係咪傻左？再係咁Kelly會唔開心！ 

就連肥仔都走黎同我講：「頂！呢個丁當係咪傻向左走向右走左，人地拍拖都係重色輕友，佢就重友輕色！唔通呢個死仔想3P！」 

至於Kelly？佢係同丁當拍拖開頭成日MSM我： 

靜香： 
13:22 Halo 藍藍 你唔介意我咁嗌你嫁可 
13:23 我想多d了解丁當 你可唔可以多d講下佢以前既事 



由個時開始，Kelly周不時會搵下我吹水，我地漸漸都成為左好姊妹。 

但係，當丁當開始多左搵我，Kelly對我雖然一樣好，但我知佢好唔開心，同時亦令我好有罪惡感... 

「藍藍... 老實講，我覺得丁當唔係咁愛我...」Kelly放學個時同我去左操場度談心。 

「做乜咁講呀？丁當唔愛你又點會同你一齊喎，唔好亂諗啦傻妹。」 

「我都唔想咁諗！但... 丁當愈黎愈少搵我，次次都係我主動。一個人既眼神可以睇到好多野嫁，丁當已經好耐無好柔情咁望住我... 係咪我唔夠好...」 



眼前既Kelly同平時自信滿滿既佢完全唔同，我更加覺得對佢唔住。 

「Kelly，比D信心自己啦。呢個丁當係怕羞d、慢熱d，比翻少少時間佢啦。」Kelly聽到之後都有翻少少笑容。 

翻到屋企之後... 

我： 
16:33 喂 丁當 我地今晚去跑步？ 
16:33 我地好似好耐無出去haha 

丁當： 
16:34 好呀!!! 
16:34 你終於得閒 

其實，我今次約丁當係有目的既... 



「藍藍，我地好耐兩個出黎啦！」 

「係呀，呢排比較忙。Sorry呀！」 

「唔緊要嫁，洗乜同我斤斤計較喎，我地兄弟黎家嘛。」 

「丁當呀...」 

「有咩就直接講啦。」 

「Kelly近排好似唔太開心喎，你應該多d陪下佢。 

雖然佢成績好，平時又好似好有自信咁，其實佢係拍拖呢方面無乜信心嫁。 



我諗你呢排成日搵我可能係因為覺得前一排忽略左我，其實唔緊要嫁。 

反正大雄平時都成日陪我，但Kelly唔同，佢得你一個炸... 

你間唔中約下我，我可以嫁。但我唔想為左我地自己既快樂，而令Kelly傷心。 

要對人好d呀，應承我啦，我地勾手指尾。」 

丁當應左我一下，我地就跑步，成晚都無再提過呢件事。 

第二朝，Kelly就好開心咁同我講丁當係咁約佢。 

咁就太好啦