[真人真事+少少甜] 一切，由MSN開始: 第五十一章、藍：戀愛專家
大雄：
00:26 有時 我真係唔明到底我定係丁當先係你男朋友...
我：
00:26 緊係你啦... Sorry! 我以後都唔會自己跑開去
00:26 今日同你一齊我真係好好好好好開心!!
大雄：
00:27 算啦 你知我嬲你唔落!
00:27 真係無下次就ok啦
00:27 因為我真係好愛好愛你 我都一樣唔想失去你
咁就好啦! 大雄好似已經無乜野。不過，難得大雄同丁當前一排既關系好轉，依家... 我諗就好難講。
聖誕都要番學校補課，無計啦我地就黎考CE。Kelly全堂都無同我講野，連望都無望過我...
好對唔住，我從來都唔係想搞成咁。一直以黎，我都係真心祝福你同丁當。我亦都全心全意當你係好姊妹。
補完課之後，就落去地下籃球場搵大雄...
落到去就見到佢地係到打波，不過好奇怪... 丁當一向打開後衛，但佢今日學人打中鋒，唔通佢係故意既！？
因為... 大雄一直都係打開中鋒呀！
練習賽姐，但佢兩個好出盡全力咁。我呢個門外漢都睇得出大雄有意無意咁係到撞向丁當，點解裁判唔出聲？
呢一刻，我好想出聲，我忍受唔到任何人傷害丁當，何況個個係大雄！
「呀！」丁當竟然一拳打落大雄度！
點算好... 我應唔應該出去？ 正當我想出聲，丁當更加比我忍唔住：「喂，唔好咁過分好喎！
」 大雄即刻話：「依家係邊個過分呀？你一日仲痴住藍琛蕾，我就唔會放過你！
」 唔知點解，望住佢兩個搞成咁，我竟然喊左出黎。我點解總係令人唔愉快？如果無左我，大雄同丁當可能會係好朋友。就算唔係，都可以係普通同學一場呀！
「女班長，有無興趣陪我食個毒撈？」我擦乾眼淚，擰轉身見到肥仔俊拎住一大碗毒撈。
「女班長呀... 我知我呢個零戀愛經驗既肥仔唔應該出聲。呢個世界好奇怪，偏偏就係旁觀者清，而我有D咩想講都唔會想收收埋埋。
記唔記得我曾經叫你遠離丁當？其實係應該既，不過當時已經太遲啦。因為丁當早已經泥足深陷。你既離開只會令佢更加掛住你。
對唔住啦！我應該諗清楚當時情況先同你講既。我今次諗得好清楚啦。如果你真係想繼續同大雄一齊，而又唔失去丁當，你應該...」
「我應該點做？」我真係好好奇，點樣先可以唔失去大雄同丁當。要我揀邊個重要D？其實我永遠都會話兩個都咁重要。
「女班長，首先你要承認你愛丁當。」我愛丁當！？點會呀，我唔否認自己對佢有好感，亦曾經動心，但我愛既係大雄呀！
我點可以又愛大雄，又愛丁當。
「我...」
「你唔洗話我知，係心入面清清楚楚同自己講。」唔會嫁，我唔會愛丁當。
「跟住，你要問自己係咪真係愛大雄。
」我點會唔愛佢呢？我唔愛，又點同佢一齊... 呢個肥仔到底係到搞乜？