[真人真事+少少甜] 一切，由MSN開始: 第六十六章、藍：婦唱夫隨

「我…我想做你男朋友！」今次都唔係丁當第一次同我表白，但今次比以前任何一次都感動。 

唔單單係因為佢為我做左咁多野，而係因為我地都變得勇敢，願意踏出「好朋友」呢個安全地帶。 

「我... 我非常樂意！ 」我即刻攬實佢，眼淚唔覺意就流左落黎。 

「不過... 我當然有條件。 」 

「你講乜我都聽哂你話啦，女朋友大人！ 」丁當攬得我更實。 



「就係... 我地要做一世既...」 

「我知我知！夫婦！ 」 

「邊個咁快話嫁你！我係話做一世既好朋友...」 

「又好朋友... 」 

「我未講完呀！ 」 



「好朋友一般既男女友。 」 

「姐係點？ 」 

「我需要你好似以前咁，無論我點，你都要係我身邊陪住我。就算我地嗌交，你都要聽我訴苦。呀！我地仲要訂個〈女朋友守則〉出黎。 

聽住啦，第一，緊係要愛我！第二...」 

「嘩！做你男朋友都好慘姐！ 」 



「咁你係咪唔做先... 」 

「做！緊係做！要我做乜都得！不過我都要訂個〈男朋友守則〉哈哈 」 

「講黎聽下先啦，我唔一定會照做嫁。」 

「urm…我嘅男朋友守則淨係得一條，就係淨係準你鍾意我一個，唔準你鍾意第二個男仔。 」 

「你唔洗講我都會咁做啦傻佬。 」 

呢一刻，丁當好深情咁望住我，成個世界好似靜止左咁。 

佢哄個頭過黎，好似想錫我咁，我個心跳得好快。 

當我地之間相距1cm，丁當突然笑出黎。 



「藍藍，你好矮，搞到我要『dub』低少少，哈哈哈哈哈哈！」 

「你！你笑乜！自己又唔係特別高！！！得個170cm都笑人！唔比錫！你呢一世都咪錫我！」我嘟起個嘴，就係呢個時候，丁當好快咁嘴左埋黎！ 

「我就下你咪得囉，傻瓜！」丁當用手摸摸我個頭。 

一個月之後... 

「肥丁！行快D啦！陣間Miss左大雄班機我會嬲死你！」無錯，今日係大雄飛去美國既大日子。今次佢一走，都唔知幾時會見... 

「得啦！仲有成45分鐘，洗乜咁心急！」 

「我有好多野想同大雄講呀！」 



「知啦知啦，我都要同大雄道別嫁。」 

行左五分鐘，終於到左離境大堂。 

「大雄！去到個度記得要同我地講聲，多D上Facebook Post下相，等我地知道你既近況。」

「當然啦，我點都要上去呃下Like嫁哈哈」大雄同我傾左一陣之後，好認真咁同丁當講：「幫我好好照顧藍藍啦！不過係你既我就好放心。 」 

丁當即刻話：「唔知你講我都會，我會養到佢肥肥白白嫁啦！ 」 

「唔洗你養，佢依家都肥肥白白好似隻豬咁哈哈哈 」 

「你兩個！一係就做仇人，一Friend起上黎就攻擊我！」傾下傾下，大雄已經要走。我攬住佢一路係到喊話：「我會掛住你嫁！ 」 

「放心啦！我一有長假就會番黎探你地。我走啦。」 



佢一入閘，我拎部電話出黎，開番MSN。 

唔知由幾時開始，愈黎愈少人用MSN，個個轉用咩Whatsapp或者Line個D。即使MSN學人整番個app版，都無乜人再上線。 

有一大半既人既頭像已經長時間係灰色，大雄都好耐無上線啦。 

我： 
14:16 大雄 再見啦! 多謝你...  

正當我想登出個時... 

大雄 傳來震動... 

大雄： 


14:17 再見啦 藍藍! 我從來無後悔自己愛上你 我知你到依家仲係好自責 不過唔洗嫁 因為愛上過你已經係一件好幸福既事 
14:17 我依家要去一個新既地方重新尋覓自己既幸福  
14:18 再見!  

一切... 

由MSN開始，亦由MSN結束。