綠社打得唔差,但係黃社有申屠,難免要輸。

綠社球員垂頭喪氣咁行返去看台,但係啦啦隊繼續打氣,唔講仲以為係綠社贏咗。莫嘉瑜走去幫班球員打氣。唔知點解,可能係我同情綠社,我走咗去綠社看台,幫莫嘉瑜手。

我係莫嘉瑜手上攞咗支水,比咗其中一個落場嘅球員。

「唔好傷心,你哋打得好好。」

「多謝你。你係咪藍社嗰個康洛文?」



「係呀,做咩?」

「應承我哋一樣嘢,要贏黃社。」

「傻啦,咁就係一定嘅,記得嚟捧場。」

我同佢寒暄完幾句之後,就諗住轉身返去。呢個時候,莫嘉瑜叫住我:「喂,康洛文!」

「突然咁有禮貌,你唔係叫我基佬嘅咩?」



「sorry囉,話時話吖,多謝你。」

「多謝我啲乜?」

「我以為你喺名校到讀,係個啲把口好撚串,成日踩到人哋一個仙都唔值個啲人。估唔到其實你都係個好人。」

「如果我真係嗰啲人,我就唔使嚟呢度讀啦,不過呢啲都係後話,遲下再講啦。」

「係喎,康洛文,你整間得唔得閑?」唔係掛,嚟真架?



「得呀,做咩?」

「冇咩嘅...約你出去飲杯嘢姐。」

康洛文呀康洛文,掂喎,唔駛自己出聲,有女自己送上門!

雖然話我鍾情於莉曦,但係莫嘉瑜其實都係學校數一數二嘅好女仔。佢唔係最靚嗰個,但係矮矮細細又幾得意。佢份人好nice(對住我就例外),其實都係gfable。

「好呀,整間見。」

我要扮咩事都冇發生過咁行番去。

「喂,sky,我整間唔去練波,有嘢做,你哋自己練啦。」

「吓,哦,好呀。」佢又若無其事咁繼續whatsapp。



我執好嘢,發現莫嘉瑜已經係度等緊我。我暫時放低我對莉曦嘅傾慕,同嘉瑜一齊步出球場。

「你想去邊度?」我問。

「不如去starfucks?」

唔係掛,第一次約人出街去starfucks?又好似hea咗少少喎。

不過算啦,有個靚女陪住你,去邊度都差唔多姐。

我哋一齊搭輕鐵去市中心。佢坐係我隔離,全程都唔夠膽望住我,好似驚我一望住佢我就會殺咗佢咁。

去到starfucks,可能今日唔係假期,所以都好易搵位。我買咗杯cappuccino,但係佢淨係買咗支果汁!



我可以肯定,佢係諗唔到地方,先同我嚟starfucks飲嘢。

「喂,做咩搵我飲嘢。」

「其實,你都估到啦。」唔通真係估中咗?

「講啦,我唔知。」

「你係都要我講嘅!係呀,我真係幾鍾意你。你信唔信我第一日就鍾意咗你?」

一個靚女竟然對我一見鍾情,我真係太遲鈍。

「即係,你想我做你條仔?哈。」而家搞到我好似蝦緊佢咁。

「係呀!我初頭以為你做人真係不要太嗰啲,但係原來份人好好人。」



佢咁講,我真係好唔好意思。我只不過係周圍打交先比人踢出校,又點稱得上話好人。應該話,我只不過係有最基本嘅人性,有一班係名校讀嘅人,連最基本嘅人性都冇。

「唔好咁驚啦,我幾時話要拒絕你姐?我真係估唔到,你係主動嗰個。」

「咁,我哋可唔可以試下?」

我二話不說,將塊面貼近嘉瑜,然後錫落佢嘅咀唇上面。

係cappuccino嘅香味。

唔好意思,莉曦,我要放低你。


 
已有 0 人追稿