那年玩社，四位靚女: 八

準備咗成個禮拜，差唔多到咗社際足球比賽嘅決賽。係我同申屠子成嘅決戰。雖然我而家應該唔需要再為咗博取莉曦嘅歡心而戰，但係為咗幫嘉瑜，同綠社，仲有藍社嘅榮譽，我點都要贏！

係決賽進行之前，先舉行藍社對綠社嘅季軍戰。我應承咗嘉瑜會嚟睇，順便幫下佢手做嘢。

「點呀，搞成點？」係佢忙緊啦啦隊一啲最後準備個陣，等我關心下我嘅嘉瑜。

「唔好搞我啦，我仲做緊嘢。」睇嚟佢幫緊佢嘅社員點名。

「咁我睇你表演囉喎！」既然佢咁講，我都冇理佢。我坐咗係看台後面，睇住呢場季軍戰。





估唔到，我眼前呢個女仔，上一次比賽仲係一個同我冇咩關係嘅同學，今日已經係我嘅女朋友。

藍社自從上場比我大炒六比零之後，聽講士氣受到嚴重打擊，龍門嘅白文翰好似因為咁而頹咗兩日，冇去練波。相反綠社上場同樣係輸波，但係打得唔差，都曾經同黃社打成均勢，再加上綠社啦啦隊係嘉瑜領導下，繼續佢哋嘅強勁氣勢，所以綠社球員喺信心方面先勝一籌。

雖然佢哋今日唔係嚟爭冠軍，但係依然士氣高昂，唔知係咪因為有一個咁勤力，又靚嘅啦啦隊隊長呢？

好，唔講女。場波已經開始咗，綠社一如預期，獲得較多控球權，壓住藍社嚟打。唔夠5分鐘，綠社已經射咗三至四球。

終於，係賽事嘅第9分鐘，綠社前鋒譚兆倫頭槌建功，一比零領先。綠社看台上一片瘋狂，嘉瑜嗌到痴線。





我希望嘉瑜唔好咁快嗌爆喉嚨，因為我敢擔保，綠社入球陸續有嚟。

果然，藍社失咗一球之後，防線突然崩潰，俾人話扭就扭，白文翰救到頭幾球，救唔到跟住嗰啲。上半場，綠社已經贏到三比零。

我趁中場休息嗰陣買多兩支水比嘉瑜，果然佢都嗌到失聲，係咁飲水。

我抱住佢條腰，「你唔好嗌咁多之好喎。」

「得...我冇嘢。」





當然，我唔比佢嗌到咁大聲，於是捉住佢，帶佢上看台上面，同我一齊坐。

「而家你坐係我隔離，你唔可以再嗌咯喎，唔係我聾架啦。」

結果，佢又唔知點解坐定定。就算下半場綠社入多一粒，佢都冇乜點嗌。不過，似係佢嗌唔出多啲。

最後，綠社以四比二擊敗藍社，獲得社足第三名。

綠社成班球員同幹事搵埋嘉瑜去慶功，但係佢唔去，話要同我一齊。

「傻豬，做咩唔去同佢哋食飯呀？我實搵到人陪我架。」

「唔得！你唔可以再搵其他人陪你！」

「陳天元都唔得？」





「唔得！」

我真係好好彩，點解我會有咁鍾意同我一齊嘅女朋友？

「嘉瑜，」

「做咩呀？」佢已經成個瞓咗落我個膊頭度。

「我真係好鍾意你。」

「我都係。」

呢個時候，我嘅腦海浮現咗一段歌詞，我忍唔住唱咗出嚟。





https://www.youtube.com/watch?v=ldOTcfTHMlg

「能同途偶遇在這星球上　燃亮飄渺人生　我多麼夠運
無人如你逗留我思潮上　從沒再疑問　這個世界好得很」

我嘅唱功應該唔算差，都玩過學校talent show，只可惜嘉瑜唔識欣賞，佢已經攰到瞓著咗，睇嚟佢呢幾日真係好辛苦。

「唔好訓啦，瑜，
我帶唔到你返屋企架...」