那年玩社，四位靚女: 三十六

天元叫咗我出嚟安定商場附近嘅一個公園坐低傾下，搞到我要搭輕鐵由元朗出翻嚟屯門；不過聽到佢喺電話把聲咁驚青，搞到我冇得唔出嚟關心佢。

我一行入公園，已經見到佢坐咗喺其中一排長凳上面。用「坐」呢個字似乎唔係太貼切，應該話，佢成個人乏力地，接近攤咗喺張長凳上面，只能夠勉強咁保持姿勢。佢雙眼無神，我望到都覺得有啲恐怖。

「喂。」我呢一句​「喂」終於叫醒咗佢。

「呀，文哥，你嚟到就啱啦。」

「你咁急call我，我連衫都嚟唔切換。你話你要留班？」





「係呀，終於都要。」

「今次大家都pass到，即係唔係成績出咗事啦。你搞邊科呀？平時瞓教，未至於要留班掛？」

「平時瞓教就緊係未至於要留班啦，」佢身體似乎終於可以發力，挺直咗條腰，正正常常咁坐返起身。「不過，我出面瀨咗嘢。」

我面色一沉。「瀨咗嘢？咩事咁大鑊？」

「我。。。我喺出面煲煙。」








氣氛一片寂靜，因為我都唔知可以比咩回應。

雖然我份人好唔鍾意人食煙，當年老豆喺屋企賭住馬煲煙都比我屌到佢出街食；但係食煙炸喎，又唔係殺人放火，洗唔洗留級呀？

「屌，食煙炸喎，個個都食架啦，」我自己梗係冇。「你係咪比老師捉到？」

「屌，我點估到我行去兆康同班小學同學煲下煙，都會比嗰個隔離班班主任Miss Yam捉到姐？佢又咁啱認到我，問我係咪足球隊嗰個陳天元？」





「你最好唔好同我講，你答咗佢你係。」

「咁我又未至於咁蠢，打死都話我唔撚係，你認錯人啦。不過佢真係認到我，我又吹佢唔脹。」

「你就去兆康呢啲人煙密集嘅地方食已經夠哂戇居啦！好去唔去，就去全屯門最大個屋邨，驚死人睇唔到？」我都冇佢咁好氣。「你搭多幾蚊車，就去碼頭嗰海邊，啟豐呀海翠呀嗰度對住個海食，撚有人理你咩？」

我估佢都知道自己蠢到核爆，唔夠膽出聲，氣氛就再一次陷入寂靜。




「唉唔好提啦，咁你叫我出嚟，唔會淨係同我講呢件事掛？」

佢好似終於攞到准許證講嘢咁，急不及待。「係呀，你有冇方法可以幫到我呀？」





我對住地下長歎。「大佬呀，你估我喺出面讀過幾年書，就真係神仙咩。我同你哋一樣，都係凡人一個。我做唔到人做唔到嘅嘢，我都要跟規矩行。」

「我唔係要你唔跟規矩走後門呀，我話我可能要留班姐，未firm實嘅。嗰個Miss Yam日日都嚟M咁款，又比佢捉到正，如果你唔幫下我手，咁我就真係要扣分，下年冇得見架喇。」

「你都戇鳩嘅，見唔到你咪仲好，專心讀書。」

「大佬，呢個時候你仲講到笑？」

我面色一變，嚴肅咁望住佢。「我叫返你大佬至真。你留班呢件前途問題，仲複雜過量子力學，你竟然貿貿然就叫我搞？家下我真係肉隨砧板上，任由你處置，你話點就點呀！」

佢即刻跪咗喺地下。「我求下你呀文哥，你唔幫我嘅話，我都唔知有邊個可以幫到我！」

「唔好跪，我受唔起！」我即刻扯咗佢起身。「留一年姐，留唔起咩？」





「唔係，但係自己個妹仲高過自己，好瘀架嘛。」

氣氛第三度凍結，個一刻除咗風聲之外再冇其他聲音。





「唉屌，冇得唔幫啦咁？」