《耿耿於懷，念念不忘》: 男生篇(五) - 小灰

正當跟瓊姐聊著「那件事」的時候，我聽到一陣跑步聲， 

肥強滿頭大汗的跑過來，上氣不接下氣地叫：
「死啦！死啦！子樂！子樂！….. 」 

「你唔係撞鬼下嘩，」我冷靜地說。

「仲驚過撞鬼呀我話你知，我岩岩先見到你最憎個個男班長，岑晞欣，仲有…..」肥強抹著滿頭大汗說。 
「黃詩瑩?」我問 
「冇錯呀，佢地應該岩岩係一樓見完Miss Fung ，之後岑晞欣係後面叫左我一聲，我就立即返黎搵你啦。」


「嗯」

「好彩我走到咋，先可以快一步返黎話你知 …..」
(肥強總是這樣子，一冷靜，就開始吹噓自己了） 

「又係個招?」
「你點知既?」
「你次次甩身，都係話自己絞肚痛，之後就借屎循，咁多年都冇進步過，淨係得呢一招。」

「我邊似你咁勁，足智多謀姐 ….. 」 看到肥強抹著滿頭好似永遠流不完的大汗，



這種的單純，那種的真摰，在出來工作之後慢慢消失，
尤其是職位愈高，要防範的人就只會愈來愈多。
 多年以來，最好的兄弟，都可算是肥強你了。 

「咁佢地而家點?」我問
「而家仲係度四圍行緊，你洗唔洗…… 」
「得啦！我有分數」
（其實是大失方寸才是！） 



「你做乜野定曬形姐，而家唔係應該好開心既咩你?」

肥強在我面前用手揚了揚，嘗試著將我在緊張之中帶回來。 

外表仍然如常的我，心跳得很快很快。
要來的，終於要來了。 

幾乎不能自控的心跳著的我在想，這一次真的不同了，
跟一直想像的不同，真的要面對她了。 

「你講得岩，咁佢地係邊?」
「佢地應該岩岩同Miss Fung傾完計，而家就唔知啦。」

 聽肥強講完，我忽然呼了一口氣，
但我很清楚，這不是我不想見到她，


反而是現在的我實在也未免太過緊張了，
根本緊張得整個人都亂了。 

「瓊姐，我要行開一陣先，轉頭返黎搵你丫。」
「好哇，記住，珍惜眼前人。」瓊姐語重心長的跟我說。 

「肥強，我地不如去個toilet 先，我想洗下個面。」
「做咩姐你，你唔係好有信心既咩，唔通你都淆底，學我想借屎循？」
「妖，講少兩句廢話啦！」 

正當我向洗手間的方向走去的時候，我見到一個熟悉的身影。 

他就跟當年一樣，都是一樣的斯文，
但現在更配上一份優雅的氣質。 從前是長跑校隊的他，身形不但沒有走樣，現在更見健壯。
穿著住一身的Polo Shirt + Chino褲子，配上他原來修長的身軀，完全沒有違和感。 想不到幾年時間，


就將以前的書呆子變成現在幾近如男模一樣，令我不禁有點自卑。 

雖然我今日配上了一身Casual smart 的穿搭，但是看到男班長的強勢，我總覺得有點兒比下去了。
 相比起我，曾經有一段時間也真的令自己「大隻」了不少，
但現在轉了新工之後經常要應酬飲酒，
即使每個星期都有踢波，小腹已經漸漸開始失守， 
雖然女友Daisy喜歡摸摸我這個慢慢「在成長中可愛的小肚子」，
但我可不想太快就遇上中年危機，在做運動的時間本身已不多的情況下，
要立即看起來瘦一點，最簡單的方法就是「挺胸＋縮肚」，
才不致令自己的小肚腩走出來貽笑大方。 

正當我還在自慚形穢的時候，肥強這個人 …… 總是令我哭笑不得。 

「喂Jason！你做咩自己一個走左去既?」



我還未趕得給把手掩住肥強的口，他已經叫住了Jason。

 我心裡又暗罵了一句「媽的！」 

「哦，冇乜野，只係黃詩瑩佢今朝早餐食得唔夠飽，有d肚餓所以面青，而家我咪叫晞欣幫我睇住佢，我去小食部幫佢買個早餐囉。」 

「我都好想知到底黃詩瑩食d乜野要入廁所買既。」 
對不起，我的妒忌心完全控制了我的咀巴，我很想知道，現在男班長跟她的關係。 

如果他們在一起了，這麼多年了，總會有人在傳，
如果他們不是一起了，那麼，他現在的行為跟說話就跟以前一樣，令我感到反感。 

Jason氣得面一陣紅一陣白，他亦不甘下風 :
「你理得我買乜，總好過你買既野佢都唔會食。」
 媽的，在向我發出挑戰嗎？ 



當我們三人沿著洗手間回到雨天操場的時侯，遠處只見到岑晞欣一個人。

 未打招呼，岑晞欣已問：
「你地知唔知詩瑩去左邊丫? 佢已經行開左十分鐘啦 ! 佢個電話又唔通….」 
「下！」Jason焦急的說。 
「等等！黃詩瑩及生左咩事？」我問。

看著晞欣及Jason的臉愈來愈焦急，事情似乎也不是一件小事。 

這時候Jason還是要做他當年的班長，在指揮著：
「張子樂，而家黃詩瑩可能因為血糖太低而係學校既某個地方暈左，所以我地要 ….」 

「分頭搵佢。」

不用Jason的指揮，我已經接下了之後的說話，逐一向他們發出指示： 

「岑晞欣，你試下去四樓我地舊時F.7既班房搵佢，」
「好！」 

「肥強你就去三樓圖書館搵佢，」
「係！」

 「Jason你地岩岩搵完Miss Fung，你可以去一樓搵左Miss Fung先，可能佢返左去搵Miss Fung，同時你都可以叫埋Miss Fung幫幫手搵佢。」
「咁你呢？你又去邊搵佢？」
「我會係成個地下範圍搵佢，當然我都去埋其他樓層。」 
「咁我地應該 ….. 」
「十五分鐘之後大家係返呢度集合，ok ?」

「咁如果搵唔到佢咁點呀！」
面對Jason再次挑釁，在我準備開口還撃之際， 

「唔好嘈啦你地！男班長你聽下子樂講先啦，佢咁講得實有佢既道理。」
岑晞欣對我單了一下眼，好似完全明白我的意思一樣。 

那個滿載我跟她一點一滴回憶的F.7班房，
那個當她一有空便會花時間去的三樓圖書館，
那個她會經常會教員室去找的Miss Fung，還有 …… 幾個我將要去找她的地方， 每一個，都是她中學時最愛去的地方，
也是能夠可以找得到她的地方。 

「你果然同以前唔同左好多 ….. 」
岑晞欣走過來對我輕聲說。

 「唔好講咁多，搵左佢先。」 說畢之後，我們四人便分頭找尋。

黃詩瑩，我一定要找到你，一定要！ 

五分鐘後。 

當我都差不多走遍了大半個地下的範圍，我想起了我還有一個地方沒有找。 

就是 ……
校工宿舍旁邊的雜物房。 

正當我慢慢走近的時候，有一把輕柔的女聲証實了我的想法。
那一把輕柔的女聲在哼著熟悉旋律，陳奕迅的「十面埋伏」。
也是，黃詩瑩最喜歡的歌。 

「總差一點點　先可以　再會面
彷彿　應該　一早　見過
但直行直過　只差一個眼波　將彼此錯過」 

沿著歌聲的方向走，我看到了一個女生的背影。

我叫了那個女生一聲，她回過頭來。 

在離開中學的頭一兩年，當有人提起黃詩瑩的時候，我總會有一種緊緊揪心的感覺。
後來有一段時間，當有人提起黃詩瑩的時候，我只感到一陣又一陣的淡然的心酸。
再過了一段時間，當再有人提起黃詩瑩的時候，我只餘下一聲無力挽回的嘆息。
到剛剛步入校門，加上肥強說起黃詩瑩的時候，現在我的心好似被重槌一下。
當想像到一會要面對面直接見黃詩瑩的時候，一下子感覺全部都湧上心頭。
而如今，站在我面前的就正正是多年以來，心裡都一直是最放不下的人，

黃．詩．瑩。 

我們的故事，
由2003年開始說起，到了2005年那年定格，

直到十年後的今日，
直到這一刻，重新開始。 


（待續）
 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

(如果喜歡我的文章， 就給我一個 like 吧 )
P.S 如果大家有任何感情事 , 問題 , 也想分享下 ,
也可以給我一個 email [email protected]
Facebook Page : https://www.facebook.com/thesiufui