《耿耿於懷，念念不忘》: 男生篇(十一) - 小灰
每個人的心裡，都是總有一個你會放不下的人吧。
這個人，也許其實一點也不特別，也不出眾，
對比日後你認識的人來說，也可能甚麼也不是。
只是，這個人在你心目中，從來就是重要。
重要得在你的餘生裡，都有一個不能取代的位置。
即使日後有更美的邂逅，你都只會對這個人在意。
與肥強的晚飯後，我收到了Shirley的電話。
「今晚得唔得閒?」
「都 ok 既，你想？」
「照舊？」
（在這個時間，我好清楚Shirley說的「照舊」是那一個地方，但分手之後，我可不想再想太多）
「我諗唔好啦，不如 .... 尖咀等，我有間去開既清吧都 ok 既。」
「好。」
可能是出於對詩瑩的執念，所以，我真的不想肥強失去追求晞欣的機會。
在車上，我也不浪費任何一分鐘，在whatsapp 與他一起制訂當天的「作戰方針」。
直到下車之後，我仍然是手不離機，希望將我平生所學的都盡教會肥強。
「喂，你同以前都係一樣咁勁，可以一路覆whatsapp 一路行都唔會撞到人既。」
Shirley忽然在路邊走出，拉著我的手說。
我也下意識的鬆開了Shirley的手，接著說問：
「有野想傾？」
「如果我淨係想見下你呢?」
老實說，今天已經夠累了，我真的可不想再節外生枝。
「咁我會揀返去休息。」
「好啦好啦，唔玩你啦，其實我係有d 男人既問題想問下你嫁。」
Shirley一邊撥著「十零分界」的所謂「女神頭」，亦是想讓我看見她那性感的鎖骨及在緊身短裙都包不住的美好身段吧。
「你其實已經引死仔嫁啦，唔洗再咁引人。」
「唔通我對你已經冇曬吸引力咩？」
Shirley使出她的最後絕招，她那34D的導彈。
我別過了臉，再帶她到清吧坐好，
之後就聽她訴說著她跟那個在港工作的日本人老闆及clubbing認識了的韓國型男的三角關係。
其實她的所謂問題，根本不成問題。
問題是她享受日本人老闆在追求她時的吃喝玩樂，也鍾愛韓國型男帶給她的新鮮及征服感。
「你覺得이민영（李民永）oppa 其實係唔係都中意我，定其實佢玩緊我 ..... 你做乜發呆姐 ！」
「佢玩唔玩你，你唔係一早已經知咩？」
「嗯 ..... 你又做乜咁無心機，又係為左個個姓黃既女仔？」
「嗯。」
人與人的相遇與相處又倒真的很奇怪，就好似我跟Shirley在一次酒後一夜情之後變成了情侶。
在拍拖的這段時間，她對我的了解已經超越了我任何一任的女朋友（即使現任也是）
但亦很奇怪，當她知道黃詩瑩在我的心中存在，因而妒忌到最後要跟我分手。
縱然分手後我們不會上床，但也倒是一個可以聊到心事的朋友。
「我都唔明佢有乜咁好，你都中意左佢十年啦，其實佢知唔知道嫁？」
「我諗佢唔知。」
「咁你都好白痴姐，中意左個女仔十年但你又唔同人講，而你又擺佢係你個心入面，仲......」
「我諗佢都唔會唔知，只係大家都唔想篤穿呢件事。始終，大家都唔想跨過個一步。」
「咁你最近又聯絡返人？」
「嗯，都算係既」
「咁你地傾成點?」
「冇乜傾過 ......」
「你好緊張呀?」
「我唔識點講個種感覺，只係覺得，我識你又好，我d 前度同而家現任都好，我都係會緊張，但我對佢個種緊張，係一種好特別，好唔同既緊張，你明唔明呀。」
「雖然我真係唔明你地d男人諗乜，明明個女仔擺係度，咪追囉，自己唔去追俾人溝左之後又要係度耿耿於懷，其實人地最終可能對你都只係羅生門囉。」
「如果我當時真係去追 ..... 可能連frd 都會冇得做喎。」
「哈哈 ...... 張子樂，你呢句想笑死我咩 .... 你諗下你溝我又或者你現任，你有冇一刻驚過呢個問題丫？」
「咁又冇喎。」
Shirley呷了一口cosmoplitan，緩緩地說：
「有冇 frd 做，根本就係你地d 男人既心魔。你覺得佢係你心目中重要，你先會驚，先會怕，做每一步都會姐手姐腳之嘛！好似IT部個個Peter成日借機黎煩我，我都唔想同佢做朋友啦，如果係 이민영oppa 就唔同啦 ......」
「超！你試下你個oppa變左林雪咁既樣睇你仲會唔會係咁講！」
「你都痴線既，正如最初同你一齊個時，我都唔係因為你靚仔啦，係之後你 ..... 幾好，我先考慮同你一齊嫁。」
「嗯。」
「唉，你既問題就幫你解決左啦，我個이민영oppa ....... 」
「問返你，其實佢係你心目中重唔重要?」
「嗯.....」
看到Shirley咬著飲管，從她望我的眼神，我已經知道答案。
「Sorry。」
Shirley立即以笑回應：
「我知道既，咁你好快d幫我搞掂我個이민영oppa啦。」
「好啦，我實幫你。」
「你話嫁，唔好呃我。」
在Shirley去洗手間的時候，我看了看facebook，
黃詩瑩那段孤單心事的status 以及 Wilson Chung 及 Jason 的留言都全被刪去。
送了Shirley上車之後，我仍在回想Shirley的說話。
或者，每個人的心裡，都是總有一個你會放不下的人吧。
這個人，也許其實一點也不特別，也不出眾，
對比日後你認識的人來說，也可能甚麼也不是。
只是，這個人在你心目中，從來就是重要。
重要得在你的餘生裡，都有一個不能取代的位置。
即使日後有更美的邂逅，你都只會對這個人在意。
直到，你找到另一個人，重要得令你在餘生中偶然才會想起這個曾經放不下的人。
而今，黃詩瑩，我仍未忘。
(待續)
(如果喜歡我的文章， 就給我一個 like 吧 )
P.S 如果大家有任何感情事 , 問題 , 也想分享下 ,
也可以給我一個 email [email][email protected][/email]
Facebook Page : https://www.facebook.com/thesiufui