《耿耿於懷，念念不忘》: 男生篇(十八) - 小灰

收到肥強這個求救短訊，我也不禁心中一驚。

雖然喉嚨痛得要命,但為免肥強變成「永遠的 0 」，
作為他的好戰友兼首席軍師，就算現在真的開不了口，
也總要在喉嚨間擠出一點聲音，去支持這一個老友。

也許，男人除了面對強敵之外，能夠一起很齊心合力的，都可以算得上是追女孩的時候了。
（當然除了兩個都喜歡上同一個女孩的情況）

我熟練的拿起電話，快速致電給肥強。



「喂張子樂！做乜尋日搵你唔覆機既?」
「我 .... 咳咳 .....」
「你把聲沙到咁既 ? 尋晚去左唱 k 飲酒直落呀 ? 」
「你都痴線既 ..... 咳咳 .....明顯我病左啦。咁你有冇whatsapp 佢 ?」

「就係有，不過佢都冇覆。」
「咁你冇單機六十連發send 短訊俾佢丫嘛?」
「梗係冇啦 ，你估我傻既咩！」



「點知你姐 .... 話唔定晞欣姐姐太吸引令你忍唔住 .....咳咳 .....」
「仆街啦你。抵你咳到收唔到聲。」

也許這樣子的對話可以令肥強先鎮定下來，接下來就是需要知道現在的情況。

「係喎，你今日執左個咩 look 出去 ? 咳咳 ....有冇 gel 頭嫁 ? 有冇噴止汗劑?」
「有呀有呀！你仲煩過我阿媽 ..... 你放心啦，就算我衰左都唔會返黎搵你 hehe 既 ! 如果你仲擔心既，我最多sd 返而家個 look 俾你睇下啦。」

收到肥強傳過來的照片，今天的他也算不錯了。



上身是白色碎花襯衣，下身是淺啡色的扯布褲，配上藍色布鞋，
新一代「男神」，誕生。

「男神降臨喎 ...... 」
「死仔仲講廢話 ! 不過都要多謝你早幾日俾左 d 方向我，先知點執個 look 咋 !」

接下來的十多分鐘，始終喉嚨太痛的關係，都是聽著肥強如何準備，以及這兩天他們的溝通。
單就肥強所講的，他所做的所應對的，也沒有出任何問題，那為什麼現在晞欣要放飛機了?

雖然心裡打了最壞的打算，但總不成要打沉肥強。
況且我也沒有十足把握，即使時間一點一滴的過去，也只好祈禱著有奇跡的出現。

正在我沉思著下一步要說些甚麼去安慰肥強的時候，他突然提起：

「你估下我尋晚係尖沙咀撞到邊個丫拿？」


「點 q 知你呀大佬 ... 咳咳 ..... 」

「頂你啦，我尋晚撞到黃詩瑩呀。」
「係咩 ? 」「個時我趕住去交收 .....　途中就俾黃詩瑩叫停左我。」

「交收？ ... ... 買乜野呀你 .. .. .. 咳咳 ...」
「我諗住約晞欣去睇Twins 演唱會 .... 我買左 31 號晚個場 ，可以同佢一齊去聽演唱會順手倒數丫嘛 ....... 」

「我記得晞欣好中意 Twins 既 .... 但你而家先買飛 ..... 咁咪好貴 ? 咳咳 ..... 咪住 .... 唔怪得之你個死仔早排終於肯讓你隻特別版 Ironman figure 俾我啦 ..... 咁黃詩瑩有冇同你講 d 乜野咁呀 ?」
「仲死撐，都話左你個死仔扮曬野，其實就想知佢D野嫁啦 …... 佢淨係同我講 : 「十一點半旺角地䥫站丫嘛，佢唔記得我都會拖佢出黎，你安安分分就得喇。」」

想到「安份」這一點，肥強敢認第七，不會有人敢認第一。
從來，不安份的就只有我而已。

肥強仍然很擔心，問：「到底佢地最後會唔會唔黎嫁？」



面對這個多年的兄弟，要我講真相，我沒有這樣的膽，
要騙他，我可過不了自己那餘唯一丁點的良心。

「等下啦，應該就到嫁啦，咳咳 .....佢地唔似咁冇交帶既人黎既。你唔好急到谷出成身汗嚇走佢地就真！」
「我知你唔想我擔心 ...... 只係 ...... 咦 ，黃詩瑩有whatsapp 黎 ，佢話佢地仲有15分鐘就到啦。」

聽到黃詩瑩有短訊來，我立時舒了一口氣，遲到總比沒有到好。

呢一刻，我真係感動到瀨屎呀！

雖然頭痛得快要炸開一樣，但我想給肥強指示：
「咳咳 …… 咁你而家快 d 搵左間餐廳先啦 .....」
「點解 ? 」



「你睇下個鐘啦，都就快成點半，我估佢地一定係整緊 d 野遲左出門口，實會趕到甩頭甩髻，野都未食。」
「嗯。」

「咳咳 .....你而家拿拿聲搵定間餐廳去坐定定等佢地黎 , 等佢地黎 .....你有乜野就即管whatsapp 我，就算我錄唔到音，我都會照打字覆你，放心去馬啦！」
「死仔 ...... 好啦，你都休息多 D 啦 , 我會努力嫁啦! 」

「咁就岩啦！係喎，你諗住搵邊間餐廳去食呀？」
「未諗到喎 ....... 」

「頂你 ... 咳咳 .... 你睇下商場 d 餐廳，再講俾我知 ? 」
「土司工房?」
「食個 tea 就得姐， 咳咳 .... 而家係正式食lunch ，揀過間！」
「哦！」

之後肥強向我提議了幾間餐廳，都給我 reject 得一乾二淨。



肥強選擇的餐廳，不是太hea得根本不適合聊天，就是太過 high profile，根本不適合今天輕鬆的約會。
而另外一些貴價餐廳，但就現在以肥強跟晞欣的關係，就算肥強真的建議去吃，以晞欣性格一定不會接受。

看到肥強在約會功力上的不足，還是由自己親自出馬吧。

撐著在床邊的小几，我走出了客廳打開了Mac book ，
開始在openrice 中為肥強去尋找一間最適合的餐廳給他們。

「咁就不如試下school food 啦，價錢同入面好都似幾好坐，可以一戰。」
「咁我去拎定位先，慢慢等佢地黎。」
「咁你加油啦。」

暫時到目前的安排仍然在計算之中，很好。

其實今日的目標很簡單，要營造一個輕鬆，愉快，多話題又不至於沉悶的約會，
即使詩瑩今日在做「電燈膽」，也不會令場面太過尷尬。

只要肥強不在意製造任何特別，只求彼此感到舒服與快樂，
加上他天生的幽默感及親和力，要得到晞欣的歡心，其實唔難。

而晞欣開心的話，肥強約下一次，再下一次 ...... 直到晞欣首肯的那天。
還是那一句，他千萬不要做一個煩膠就一切都會順利。

餘下的問題是之後的日子，總不成每次肥強跟晞欣拍拖也要帶我或者詩瑩傍著出去吧，
下一步就是在他這次約會之後再好好給他來幾課「特訓」吧！

忽然，肥強又給我傳了一個短訊：

「佢地而家轉food court喎，點算好？」

「唔洗諗，照go 。」

現在的我就好似那些第一天送小孩上學的媽媽一樣，
又或者不一樣，她們是捕在學校門口看著自己的小孩子，
而我就好似警方部署捉重犯一樣在whatsapp 旁邊等著。

「媽呀!我只是你的好友兼軍師，幾時做埋你褓母嫁！！！」

或許，這些等待的時間，是有回報的。

在入場之前，肥強給我傳了一個短訊：
「尋晚詩瑩佢地去左唱ｋ，仲好似飲左好多，唔知做咩事呢？你有時間就關心下人啦！」
「你自己醒醒定定仲好啦，咁趁你入場我訓陣先，直到今晚仲有排搞呀......」

跟肥強通話完畢吃過藥後，體力漸漸不支的我倒在床上，

在想好不好給詩瑩傳個短訊好呢？
但轉念一想，還是不好了。

萬一詩瑩的反應影響到肥強，
他的「下半生」及「下半身」的幸福我可擔當不了。

結果差不多一睡就差不多是兩個小時。

看過whatsapp 似乎沒有新的訊息通知，亦即代表到目前為止沒出亂子，
似乎我的「作戰計劃」開始奏效了。

（待續）

 (如果喜歡我的文章， 就給我一個 like 吧 )
P.S 如果大家有任何感情事 , 問題 , 也想分享下 ,
也可以給我一個 email [email protected]
Facebook Page : https://www.facebook.com/thesiufui