《耿耿於懷，念念不忘》: 男生篇(十九) - 小灰

果然，多睡兩個小時，身體已經好了少少，頭痛也漸漸消失。

看看時鐘，他們都差不多看完電影，應該一切都會比想像中順利吧？

在等待見肥強的「戰地報告」期間，我也是時候查看一下公司的電郵。
一路看來，不是報價就是客人在詢問廣告格式的電郵，我不禁有點納悶。

看著時鐘慢慢踏進了五時四十五分，也應該散場了。

whatsapp 又再響了起來。

我走到房間裡，拿起手機，只看到Shirley的問侯，而非肥強的訊息。

「點啊你張子樂，睇到facebook 話你病左，死得未啊？」

我只是緩緩的覆了一句 : 
「死唔去既，不過仲係好攰姐。」

之後Shirley再給我傳了幾個訊息，我也沒再有心情打開來看。

突然電話的螢幕進入了來電的畫面，上面顯示的是肥強的來電！



我心中一驚：「唔係咁快就收皮掛 ......」
我仍裝作鎮定，接聽了電話，一來便是肥強的哭聲 ...... 

「嗚嗚 .... 張子樂 ...... 嗚嗚 .... 」
「做乜事喊丫 ? 講俾哥哥知 ?」

「岩岩套<我的少女時代>真係好滾動呀 ! 嗚嗚 .... 我睇到忍唔住喊左 ..... 晞欣都有喊到呀 ，詩瑩就.... 嗚嗚 .... ...都有喊，而家我地分開入左廁所先敢打俾你咋！ 」
「整鬼你咩 ...... 真係俾你嚇死 ，你喊到死老豆咁，唔知以為你真係俾晞欣收左皮。」



肥強稍稍整理一下情緒之後，繼續說：
「我今次醜死怪啦 ..... 係佢地未拎紙巾之前我已經忍唔到喊左 ..... 個時詩瑩遞紙巾俾我，晞欣雖然係有少少 O 咀，但之後我地三個一齊喊到收唔到聲。」
「咁請問有咩咁感動到你呢肥強先生?」

「睇到徐太宇同林真心，我就諗起你同詩瑩啦 ......」
「下 ? 頂你又關我事? 」

「徐太宇同林真心真係錯過左好多好多 ..... 」
「通常呢 d 戲最後都係佢地一齊嫁啦，冇中間既錯過，又邊會顯得之後既珍貴？」

講，也許很輕易。

在電影中，也只不過是兩個小時的時間；
但若是真實世界，就是很多很多的兩個小時，
再加上更多更多的緣份，才能成就這一份珍貴的小幸運。



也許我跟詩瑩之間，大概未必有這個小幸運吧。

「好啦好啦 ..... 而家你喊埋呢一陣就好啦下，你諗住下一站會去邊 ? 」
「我 book 左 8 點食晞欣最中意既放題 ，咁之前我會打算去影貼紙相同埋夾公仔。」

如果龍珠入面所講既「精神時光屋」是可以令在裡面修練的人可以一天等如外面世界的一年，
那麼，肥強在這兩個多小時的電影時間，他就好似進入了「精神時光屋」，令他的功力進步了很多。

不但懂得選擇合適的「作戰地點」，還可以好好的善用時間，
部署上比我原來根據他的能力去安排的還要細膩。

一方面能夠與晞欣可以重回那些年，
令電影散場至晚飯前的過場時間氣氛不至下跌，
仍然為晚上約會的Part 2 留下個好開始，



肥強，你的進步真的令我超出我想像啊！

「咁你一陣記住抹好曬你 D 眼淚同鼻涕先好出去，唔好嚇死人。仲有呀，你又唔係唔知詩瑩心思慎密，晞欣就眼利，雖然晞欣今日接受得你既約會，佢都插盲左自己隻眼嫁啦，但你用得多"廁所 break" 就會令佢地懷疑你後面係唔係有人教路。所以，"廁所 break" 呢招係跟住落黎既時間，真係如非必要就唔好用咁多。最後，佢地而家唔係咁中意我，你千祈唔好提起我，一陣搞到成個場dead 左就唔好啦。」

「知啦，我都唔想一陣出咩問題，有你既鼓勵，我而家充滿力量呀！不論今次成唔成功，下次出黎飲酒我既！」

「死仔你係先好講，不過都真係要等我好返先。」
「咁當然啦大佬，真係多謝曬你。」

到了現在，以肥強的強勢，能夠再提醒他的事也沒太多了。
接下來，就是看肥強是否真的將這個狀態一直維持到約會結束。

一個幽默得來又不失風度，仍是原來那個親和力的肥強，
晞欣，你應該會愛上這一個可愛的肥強吧？　



跟肥強通話完畢之後，我又再whatsapp 了 Daisy 一次。
等了大半個小時，仍然都是沒有顯示「已讀」。

在等候肥強的「最新戰況」，我又忍不住再胡思亂想了。

明明 ..... 早兩天Daisy ig 的那張照片 ..... 拍照的地點在香港 ..... 
到底她是否有見過 Calvin 呢 ? 
如果她要找Calvin，到底會是因為甚麼原因呢？
為什麼她要瞞著我? 

這些問題，很討厭，
同時也令吃過藥後不痛的頭，又再劇烈地疼痛了起來。

「叮叮」



肥強又來了訊息。

「一切順利，詩瑩係夾公仔同埋影貼紙相個時真係好識做，要搵日請佢食飯先得。（笑喊面）」

接著肥強給我發送了幾張他們拍的貼紙相，也有幾張更是肥強跟晞欣二人獨立的合照。

「咁咪好囉，下半場要加油呀，keep 住個勢去就岩嫁啦。（奸笑）」

隔了十五分鐘之後 ........ 

「仆街啦張子樂 ! 」
「你就仆街。 wt happened lol」

「仆佢個街，今晚我訂左個間放題，條友mark 錯左聽日，死啦 ...... 下晝同佢地講個陣佢地仲好興奮嫁 ...... 而家冇得去佢地會唔會嬲死我嫁 (滴汗)」

我沒有回應，只是傳了一張「唔撚係掛」樹熊的圖片給肥強。

他媽的，你們這次約會的意外真夠多。

現在晚飯的計劃失敗，就要盡快轉 plan B，
可是，這次的意外也來得太犯規了吧 ...... 

都不知是臭老天想考驗我這個天才追女軍師，
還是肥強今次的約會註定要多災多難。

在我再開啟電腦為肥強尋找合適的餐廳時，
肥強又再傳了一個whatsapp 給我。
(我心想 : 你洗唔洗咁急呀 ! 咪已經幫你諗緊計點拆囉頂你個肺 ! )

雖然會咒罵，我仍看看肥強給我傳送的訊息，
當我一看的時候，我呆了。

「晞欣突然話去打邊爐，之後仲拉左我地去，而我就諗好左打完邊爐之後去食糖水嫁啦，總之多謝曬你啦兄弟！」

一個人運氣要來的時候，真是誰也阻不住。

「咁你一陣萬事小心，唔好再出事啦知道冇？」
「頂你，你仲煩過d阿媽 ......」
「咁你自己執生，有咩再update 我。」

在我回覆了肥強最後一個 whatsapp 的時候，大門喀一聲開了。

Daisy 拉著旅行箱回來，但就沒有穿著她當空姐的工作服。

「返黎啦？點解咁casual 既 ?」
「係呀，早左兩日落機，好耐冇返媽咪度，咪住兩晚先返囉。」

Daisy 走過來給我一個擁抱，親吻我的額頭時她發現：
「你個頭咁興既？病左有冇睇醫生食藥？」
「冇護士姐姐你餵，病人係唔可以亂咁食藥嫁。」

「咁你食左野未?」
「今日訓左成日，冇乜胃口，張師奶可唔可以煮俾我食？」
「邊個話做張師奶嫁？見你咁可憐，就煮俾你食啦。」

之後的兩個小時，Daisy 用心的將晚飯都煮好，
一同吃晚飯，一樣的聊天，一樣的說笑。
一切，就好似跟以前一樣，沒有變。

但是感覺就總是有點怪怪的，就是說不出來的那種怪。
是自己心多？還是真的有些事情已經發生？

就是在Daisy 去洗碗的時候，又再收到肥強的來電 ：

「一切順利。」
「咁你whatsapp 我做乜 ? 」
「而家晞欣去左廁所先打俾你，一陣我就同晞欣二人世界去食糖水啦。」

「咁咪幾好...... 咪住 ! 詩瑩呢 ?」
「都話左你仲係對佢心掛掛嫁啦 ....... 岩岩我地咪話唔食放題既，我地一行出門口個陣詩瑩就唔小心扭親隻腳 .......」

聽到這個消息，我心急得比兩年前自己因踢波而骨折還要緊張。

「之後呢 ? 之後佢點呀 ! 你地冇同佢去睇跌打咩 ?」
「你個張子樂丫，講邊個女仔都得，次次一講起黃詩瑩就發曬矛。」

「咁即係點！」
「佢拗柴之後，有個男人走左埋黎，同我地講左一句唔阻我地拍拖之後個男人就揹左佢走。」

雖然我很焦急，但為免Daisy 聽見，我還是把聲線壓下來：
「個個男人係咩人黎！！！你好快D 講啦下！如果唔係唔教你追晞欣嫁！」
　「真係怕左你啦張子樂，個男人好似係叫Wilson，咁我見詩瑩咁耐冇覆都應該冇事嫁啦，所以而家先話你知。」

「咩話！！！！！！唔撚係掛！！！！...... 呢個Wilson係乜料？」
「你咪成日都站亂歌柄，俾我講埋先好唔好？聽晞欣講，Wilson好似係詩瑩個初戀男友黎，拍左年幾，感情幾好嫁，不過唔知點解最後分左手。」
「嗯。」

「係喎，你好似後面有d人聲咁既?」
「係呀，Daisy 返左黎。」

「哈，咁唔阻你，我繼續同晞欣二人世界，你就同Daisy 啦 ~ 88 。」

黃詩瑩的初戀男友 ........
Daisy 跟那個 Calvin ....... 

要來的，始終會來。

(待續)  

 (如果喜歡我的文章， 就給我一個 like 吧 )
P.S 如果大家有任何感情事 , 問題 , 也想分享下 ,
也可以給我一個 email [email protected]
Facebook Page : https://www.facebook.com/thesiufui