愛．限期（真人真事）－續集: <<第七集>>

2014年5月17日 星期六

訓左兩個鐘...九點就醒左...我成個腦都諗住Miki，一合埋雙眼，就係同Miki傾計既情境，好辛苦咁再訓返，訓到一點，一起身就收到Miki既message，睇來佢對我都有d好感啵！既然係咁，鍾意傾計既我就直接打電話俾佢，一傾就兩個鐘。我同佢傾計真係傾得好開心，不過可能只係太耐無試過依種感覺啦。

我地既話題非常廣泛，上至科學下至生活，唔覺唔覺就傾到三點。我約左Johnny佢地四點出到去飲酒，難離難捨都需要收線啦。但係我出左門口之後到夜晚，都一直同佢send message，好有初戀既感覺啊！但係原來我d朋友話喺嗰度唔好信人係真既...

今日我得到兩個真相：一）佢話佢無男朋友係講緊大話；二）佢根本唔係叫Miki Au...
原來...佢男朋友係英國讀緊書...佢真係陪朋友來玩，而佢真名係Miki Chu。因為如果佢話真名俾我聽，我搵到佢Instagram之後，佢話無男朋友依個大話就會穿煲。
當我知道依個殘酷既真相之後，第一刻我有少少悲傷...但隨之而來既係放鬆既心情。悲傷既原因當然係因為我對佢有好感，可惜佢已經有另一半；但係因為我其實會擔心浪費女孩子既時間，所以如果佢有男朋友，即係唔怕我會浪費佢時間啦！



今日喺佢口中聽到由佢形容既男朋友，其實係非常好既一個男朋友，而佢地都拍左五年幾拖，差唔多六年，咁長咁穩定既感情，令我有一個問號係我既心中浮現...點解佢會肯同我發展落去呢？不過我只係覺得，同佢傾計真係好開心，當有一日泥足深陷既時候，我能夠令大家全身而退就可以啦。

食完飯返屋企再同佢傾電話...傾左好耐...再有意識望鐘既嗰刻我呆左，時針直指四點方向。原來不知不覺間，又傾左四個鐘電話。我不得不承認，我對佢既好感加多左唔少。究竟只係單純地因為依個女仔既吸引力丫？定係因為佢同我之前女朋友既對比太大呢？我唔知，不過如果真係要我答，我會答，兩者缺一不可。

今日我嘗試約佢食飯，佢答我今個星期已經有兩日都出街食，唔想成日唔返屋企食。表現出乖乖女既個性，我鍾意！而佢下星期一開始要返暑期工，所以，我約左佢星期二係佢返工之前食早餐，好想快d到嗰日啊！