《男孩的她》: 作者的話

大家好，個故嚟到呢個位都差唔多啦。

由第一日落手寫呢個故，去到今日個故終於完啦，大概都有三個幾月。

首先多謝咁多位一直睇到呢度嘅讀者先，你地嘅支持，係我呢個成日半途而廢嘅人不斷出文嘅動力。冇你地嘅鼓勵，我都唔會寫曬呢七萬幾字。

其實當初我都唔記得點樣見到紙言，本身自己係個好鐘意睇書嘅人，見到呢個網之後梗係成日攞住部電話喺度睇。

我喺度諗，點解我自己又唔試下寫下呢？



7月19號，我開始寫第一個字，開始咗我嘅第一次。

暑假嘅時間比較多，可以用成日嘅時間去諗情節同打文。開學之後冇乜空閒時間，唯有夜晚十二點幾先一個字一個字咁打。

其實寫寫下都有諗過放棄，因為有時真係無咁多時間去打文，但係我想喺另一個世界去彌補自己喺現實生活中嘅遺憾。

我都知有時追故，個作者死都唔肯出文，身為讀者一定好心急。所以，我都要係度同大家講句唔好意思，我都知自己出文嘅效率好慢。

呢個故我自己都覺得有啲悶，寫曬之後睇返都覺得其實有啲位係冇需要出現嘅。



拖長嚟寫個唔好處就係，有時連自己都唔記得自己寫到邊，要睇返自己寫緊邊度。

我都要多謝我身邊嘅朋友，多謝你哋知道我寫文之後，不但冇笑我獻醜，仲叫我加油。

你地每一個留言同埋追稿都係對作者嘅一個鼓勵。所以其實我好希望，你地睇完之後，可以花少少時間，㩒一下追稿，又或者留個言，令到我知道原來仲有人睇緊我寫嘅嘢。

呢個故其實冇乜大道理帶到出嚟，我寫呢個故嘅初衷，除咗上面所講嘅圓心願，仲想去追自己嘅一個寫作夢。同時間，令一啲已經離開咗校園生活嘅人，感受返以前係校園嘅青春，追女仔嘅回憶。

希望呢個故可以令大家搵返最純真嘅愛情。



我知道其實自己仲有好多可以改善嘅地方，我會繼續努力。

呢個故係我第一個嘅七萬字故，如果可以，我希望有第二個，第三個……

咁當然仲要你哋嘅支持啦！

冇讀者，又點會有作者呢？

講到呢度都差唔多，我哋下個故再見啦。

好啦，真係再見啦。:)

2015/10/26