[我好正常]我老母單手的咗我入精神病院: 十二

　　我背後彷彿有一個巨大未知嘅存在不斷追趕著我，唔通所謂嘅機會已經來臨，最真實赤裸嘅世界已經緊貼到我嘅背後，要一手將我抓住？忽然，一種強大嘅吸力將我嘅腳步硬生生咁停住，我諗明年今日，正是我嘅死忌……但我都必須知道兇手係邊條粉腸！等我佘氏家族嘅後人日後都有一個為我報仇雪恥嘅機會！一擰轉頭，我最唔想見到嘅事情已經發生：「屌！阿叔乜原來你未死架咩！」 

　　「仆街仔！終於畀我抓到你喇！乖乖地聽嘉薰醫生嘅話入院啦！」呢個時候阿叔已經唔係啱啱一臉嘅死狗樣，我睇得出從佢眼中射出的是有如毒蛇一樣嘅狠辣眼光…… 

　　「唔好郁！」望返去前面，出現係我眼前嘅正是兩個起碼米八高、肥屍大隻、著住保安制服嘅男人。 

　　今舖真係仆街鳥……但我又點可以就咁衰係呢度，衰係呢個癡線阿叔嘅手上？成世仔咩都做唔好，每件事都自視過高，以為自己有能力做得好好睇睇，但最後每件事都只係做到唔湯唔水，甚至係一塌糊塗……神呀！至起碼，畀我唔好衰呢次！今次我一定唔可以衰，至少，我一定唔可以再衰畀我自己睇！ 

　　我冷笑一聲，然後一臉認真咁問阿叔：「哼，阿叔，你知唔知人，點解會被稱之為人？」 





　　「點解呀？」我趁阿叔一個不留神，一個流星踭批落佢嘅小腹，阿叔慘叫一聲，嗚呼哀哉，我已經脫離佢嘅五指魔爪。 

　　「係因為人有一顆強大嘅內心，強大到連人嘅自身都無法想像。」我好瀟灑咁拋下一句我自己都唔知自己Up乜鳩做乜撚嘅說話就拔足狂逃，但前面仲有兩個強大嘅敵人，我係唔可以鬆懈下來的。

　　「都叫咗你唔好郁！」其中一隻戴眼鏡、成面暗瘡印嘅肥屍向我大喊。 

　　「你都癡撚線！我而家都叫你唔好郁！」屌，佢哋真係唔郁喎。 

　　係呢個時候，一定要把握時間，所以我用短短五秒鐘已經思考哂存在係呢條狹窄走廊上嘅任何一個生機。如果我仲係當年身體質素極佳嘅全盛時期，我可以一個變速衝刺就過咗呢兩件肥屍，但無做運動咁耐，我而家嘅速度同衝撞力，恐防並唔足夠衝破雙塔，而走廊兩旁都有一張又一張嘅長凳，仲有天花嘅高度……似乎足夠我憑藉長凳作一個小小嘅跳板去進行跳躍，而且，我仲必須係移動嘅時候，計算好肥屍嘅移速同距離，跳上凳角再進行二段跳，然後越過雙塔、越過我自己、越過呢個荒謬殘酷嘅世界……當年我係打四號位，就算我坐寫字樓坐到個屎忽啲肌肉都鬆哂，但我對自己嘅彈跳力仍然有一定自信……掌握籃板球，就可以掌握勝負！出嚟啦，佘文樂！唔係……上啦，佘文樂！ 





　　我望都唔望後面，一個反手就將係後面仲掩住小腹嘅阿叔去我前面：「唔好過嚟！我有人質係手！」