千禧港女神探（一）春風化雨殺人事件: 第三話　學霸女神

第三話　學霸女神

開學後，葉雨虹如常地上學，某天放學後到儲物櫃，轉動鎖頭上的密碼。

她打開儲物櫃後，發現一個粉紅色印有Hello Minnie圖案的信封。

葉雨虹說：「每年都收到唔少情信，今年睇吓有乜嘢新意。」

打開信封後，並沒有任何情信，只有一張相片，當中有三個人。





左邊是人稱「怕醜書生」的黎國光，中間是化學科人稱「爆炸頭」的文麗卿老師，右邊是葉雨虹。

她記得這是去年某天上完化學課時拍下的，說是為了被「自願辭職」的文麗卿留念。

當時黎國光硬要葉雨虹站在文麗卿左邊，自己則站在右邊而拍下的。

葉雨虹說：「究竟張相係想表達乜嘢意思呢？點解佢會知道我個鎖嘅密碼？」

收好書本後，拿着相片在四樓走廊上前行，隱約聽到附近有腳步聲，而且越來越近。





可是，葉雨虹環顧四周，看不見半點人影。難道是有鬼嗎？

就在開始惶恐不安時，突然發現右邊肩膊下方有一個黑影。

再向下看，方才發現有一女學妹，向葉雨虹展現天真的笑容。

葉雨晴說：「家姐！有咩事？拎住幅相做乜嘢呀？」

葉雨虹說：「呢幅相頭先喺locker搵到，唔知道想表達乜嘢。」





葉雨晴二話不說，就將家姐手中的相片搶過來看。

葉雨晴大笑：「哈哈哈！好小學雞呀！」

葉雨虹說：「咩小學雞呀？佢究竟想表達乜嘢？」

葉雨晴說：「仲記唔記得《楊修之死》嗰課書呀？」

葉雨虹說：「門內有活？一人一口酥？雞肋？」

葉雨晴說：「無錯，門內有活，就即係『闊』。」

葉雨虹說：「咁同呢幅相有乜嘢關係呢？」

葉雨晴說：「家姐！你真係讀死書，個腦轉吓彎得唔得？」





葉雨虹說：「不如妳開估咪仲好啦！」

葉雨晴說：「左邊係寄相嘅人，中間係Miss Man，右邊係妳。咁都唔明？」

葉雨虹搖頭說：「等妳講個『正確答案』俾我聽！」

葉雨晴說：「咪即係I Miss You囉！」

葉雨虹無奈地說：「吓！咁都得？佢都好無聊吓喎！」

葉雨晴說：「咁佢都係仰慕妳姐！連埋佢總共有幾多男仔向妳示愛呀？」

葉雨虹說：「之前嗰啲唔記得，淨係計開學之後，佢已經係第九個。」





葉雨晴說：「無辦法啦！妳又高又靚，成績又好，讀精英5A班，簡直係學霸女神。」

葉雨虹說：「有無咁誇張呀？其實妳都幾可愛，只要斯文啲，應該都有好多男仔鍾意。」

葉雨虹一邊說，一邊伸手摸妹妹的頭頂，卻被妹妹一手撥開。

葉雨晴憤怒地說：「我知道自己矮，唔好再話我可愛，唔好再摸我個頭頂。」

葉雨虹說：「咁就奇怪！妳唔係打冬社籃球隊咩？打籃球應該好高㗎喎！」

葉雨晴說：「我打PG㗎！打PG唔使高，速度夠快就得。」

葉雨虹說：「乜嘢係PG呀？PG家長指引？」

葉雨晴說：「PG即係Point Guard控球後衛，主要係策動攻勢，就同足球嘅進攻中場差唔多。」





兩人差不多去到走廊盡頭時，有一人正在等待着。

葉雨晴說：「呢個咪係張相入面嗰個男仔？咁我走先喇！」

葉雨晴識趣地走開，卻在暗角觀察着，慎防他對姐姐有過火的行為。

這時，黎國光看見意中人，終於等到示愛機會時，緊張得臉紅耳赤。

黎國光說：「Rainbow張相⋯⋯妳收到嘛？我嘅意思⋯⋯妳明白嘛？」

葉雨虹說：「Edward你想講I Miss You嘛！我明白！」

黎國光說：「其實自從舊年4A班開始，我已經好鍾意妳。妳可以做我女朋友嘛？」





葉雨虹說：「對唔住！我依家只想專心讀書考好DSE，入大學之前都唔想拍拖。」

黎國光說：「咁我都明白，我願意等妳兩年，我唔介意做住妳隻兵先。」

葉雨虹說：「就算妳肯做我嘅『觀音兵』，我都唔會保證入大學之後會同妳一齊。」

黎國光說：「唔緊要！只要喺妳身邊，保護妳，照顧妳，我就會滿足。」

就是這樣，黎國光成為了葉雨虹的其中一隻「觀音兵」。