第廿二話 初次查案

趙芷芳說:「你知道就好,總之我會公事公辦,唔會冤枉好人,亦唔會偏袒佢。」

葉雨晴說:「等一陣,Season爸管西九龍理唔到,我喺大埔區,我一定要幫家姐洗脫嫌疑。」

趙芷芳說:「依家講緊查案,唔係細路女玩泥沙。」

葉雨晴說:「我一向都好認真,我會用自己嘅方法去查,一定會早過妳搵到真正兇手。」





趙芷芳說:「妳有咁嘅本事,我唔會阻妳,但係唔使旨意我會俾妳睇警方嘅資料。」

葉知秋說:「估唔到我個細女都有我嘅風範,咁就要睇吓妳有我幾多遺傳。」

葉雨晴說:「放心,我一定唔會令Season爸失望。」

這時,高子峰從羈留室帶葉雨虹出來,她的臉容有點落泊,昔日的神采不見了。

劉月嫦說:「大妹!妳無咩丫嘛?」





葉雨虹說:「無咩!只係見有啲攰,想返屋企休息。」

趙芷芳說:「葉Sir請過來辦理保釋手續,完成之後就可以將葉雨虹帶走。」

葉知秋說:「我跟妳去,妳兩個好好睇住大妹。」

手續辦好後,四人離開大埔區警署,回到大埔花園的家中。

葉知秋說:「大妹,今晚好好休息一吓。老婆、細妹,好好陪住佢。」





劉月嫦說:「我知道喇!老公你放心繼續去做嘢啦!」

葉知秋輕吻劉月嫦的臉龐,之後就離開了。

第二天,星期六早上,葉雨虹睡醒,劉月嫦和葉雨晴正在吃早餐。

葉雨虹梳洗後,亦一起吃着傳統的火腿通粉和香腸煎蛋。

葉雨晴說:「家姐!好返啲未呀?」

葉雨虹說:「好返好多喇!好彩可以保釋,唔係就會喺羈留室度過兩日。」

葉雨晴說:「妳記唔記得當日案發嘅經過?等我睇吓點解妳會被警方懷疑。」

劉月嫦說:「細妹,大妹醒咗無幾耐,應該俾佢抖多啲。」





葉雨虹說:「Moon媽放心,我已經無事。」

葉雨晴說:「咁妳講俾我聽究竟星期三嗰日發生乜嘢事!」

於是,葉雨虹就將當日發生的事情告訴葉雨晴。

葉雨晴說:「照妳咁講,兇手係5A班同學嘅機會好高。」

葉雨虹說:「理論上係,不過我唔覺得邊個同Victor有深仇大恨。」

葉雨晴說:「凡事唔可以睇表面,妳對同學嘅瞭解有幾多?」

葉雨虹說:「我一向掛住讀書,就算人緣幾好,都只係當同學只係普通朋友。」





葉雨晴說:「咁咪係囉!妳讀書勁,又靚女,大家只會討好妳,未必會對妳講心事。」

葉雨虹說:「嗯⋯⋯仲有一個問題,兇手究竟係咪想嫁禍俾我?定係純粹我唔好彩?」

葉雨晴說:「呢個唔清楚,不過有一點可以肯定,就係兇手好瞭解5A班各同學嘅性格同習慣。」

葉雨虹說:「點解咁講?唔通就連我會將垃圾掉出去小圓邨垃圾收集站都喺兇手計劃之中?」

葉雨晴說:「有咁嘅可能,妳覺得當日在場嘅同學之中,邊個嘅觀察力最強?」

葉雨虹說:「咁有兩個人比較可疑,就係Winson同Edward。」

葉雨晴說:「Winson同Edward即係邊個?」

葉雨虹說:「Winson係外副黃傳聲,Edward係內副黎國光。」





葉雨晴說:「Edward係咪上次向妳示愛嗰個怕醜仔呀?」

葉雨虹說:「咪就係佢囉!不過我唔係幾相信佢係兇手,至於Winson就好難講。」

葉雨晴說:「點解咁講呢?佢兩個邊方面值得妳懷疑呢?」

葉雨虹說:「首先,Winson當日做司儀,負責主持大局,可以清楚睇到每個人嘅動靜。

至於Edward就負責錄影,佢亦都可以留意到大家嘅反應。」

葉雨晴說:「既然Edward有錄影片段,話唔定可以搵到兇手嘅漏洞。」

葉雨虹說:「係就好喇!搵到兇手之後,Victor就可以死得眼閉。」





葉雨晴說:「咁其他同學呢?妳覺得完全無問題?」

葉雨虹說:「其他同學,咪同平時差唔多,唔覺得有乜嘢特別。」

葉雨晴說:「既然係咁,等星期一返學,妳幫我約佢哋傾吓,瞭解當日嘅情況。」

葉雨虹說:「無問題,就包喺我身上。」

葉雨晴說:「記得叫Edward帶埋錄影片段俾我!」