第廿七話 再添人命

蔡智勇陪同黃傳聲乘坐救護車到大埔那打素醫院急症室。

可惜,在途中已經停止呼吸,搶救無效,證實不治了。

負責調查此案的趙芷芳高級督察和高子峰警長,亦趕到急症室。

趙芷芳說:「蔡Sir今次又發生乜嘢事?」





蔡智勇說:「我哋坐低再慢慢講!」

三人在急症室大堂坐下,高子峰將兩人的對話進行筆錄。

趙芷芳說:「唔係又有人死掛?」

蔡智勇說:「無錯,今次有學生受傷,之後就死咗。」

趙芷芳說:「佢叫乜嘢名?邊度受傷?係失血過多致死?」





蔡智勇說:「佢係5A班嘅黃傳聲,左手被劍拮傷,相信死因又係中毒。」

趙芷芳說:「點解你咁肯定係中毒呢?」

蔡智勇說:「口唇同血都變黑,唔係中毒係乜嘢?」

趙芷芳說:「咁左手被劍拮傷,流血量應該唔足以致死,但係無端端邊度搵把劍出來?」

蔡智勇說:「兇器仲係死者身上,妳睇吓自然會明白。」





趙芷芳戴着膠手套,拔出黃傳聲左手緊握着的「天下第一劍」。

蔡智勇說:「另外仲有我手上嘅劍鞘。」

蔡智勇將用膠袋裝着的劍鞘拿出來,交給趙芷芳。

趙芷芳說:「呢把劍好熟口面喎!好似喺邊度見過咁!」

高子峰說:「呢把係香港漫畫《風雲天下》入面嘅『天下第一劍』。」

蔡智勇說:「原來係『天下第一劍』,唔怪之得咁靚。」

趙芷芳說:「呢種係用來觀賞嘅玩具劍,應該未開鋒,點解可以拮傷人?」

高子峰說:「既然係用來行兇,自然已經開鋒,而且劍身仲搽咗毒液。」





趙芷芳說:「至於係邊一種毒,就要經過化驗先至知道。」

蔡智勇說:「Madam已經第二條人命,妳哋真係要快啲搵到兇手。」

趙芷芳說:「放心,大埔係我嘅管轄範圍,破案係我嘅份內事,我一定會盡快將兇手拘捕。」

蔡智勇說:「咁我就放心,跟住係咪返學校落口供?」

趙芷芳說:「無錯,係邊個最先發現死者?案發地點喺邊度?」

蔡智勇說:「係校工區貴誠喺地下嘅男更衣者發現死者,當時佢已經得返半條人命。」

趙芷芳說:「咁我哋就返學校同佢落口供啦!」





三人乘坐警車回到學校,在校務處的會議室跟區貴誠錄取口供。

趙芷芳說:「你好,又係我。今次又要麻煩你講吓案發經過。」

區貴誠說:「今日大約4:15左右,我見到有個男仔喺地下嘅男更衣室走出來……」

趙芷芳說:「嗰個男仔就係死者黃傳聲?」

區貴誠說:「我唔知道佢叫乜嘢名,不過唔係死咗嗰個。」

趙芷芳說:「咁之後發生乜嘢事呢?」

區貴誠說:「我見到佢件外套有些少血跡,於是我就走入去男更衣室睇吓。」

趙芷芳說:「跟住你就發現死者黃傳聲?」





區貴誠說:「我唔肯定佢叫乜嘢名,只見到佢左手插住把劍,喺度流緊血。」

趙芷芳說:「只係些少受傷,學校應該有急救箱,點解要報警?」

區貴誠說:「佢口唇同血都變黑,好明顯係中毒,點可以唔報警?」

趙芷芳說:「都好合理,咁你記唔記得走出來嗰個男仔嘅樣?」

區貴誠說:「熟口熟面,應該記得。」

趙芷芳說:「我估計嗰個男仔係5A班嘅機會好高,蔡Sir麻煩你將5A班所有男學生相拎出來。」

蔡智勇說:「好呀!誠叔咁你就要睇真啲喇!」





區貴誠留心看着5A班男學生各人的容貌,之後就指認了那個男學生的相片。

區貴誠說:「係佢!就係呢個男仔!」

蔡智勇說:「竟然係黎國光?」

趙芷芳說:「點解你咁驚奇呢?」

蔡智勇說:「佢一向都好乖仔,估唔到會殺人。」