千禧港女神探（一）春風化雨殺人事件: 第卅二話　突破進展

第卅二話　突破進展

徐梓俊說：「老老實實，你係咪甘心成世人都俾個兇手控制？」

張宇傑說：「梗係唔甘心，但係可以點？我哋已經洗濕咗個頭喇！」

徐梓俊說：「萬一警方查到我哋身上，我哋水洗都唔清，但係個兇手就逍遙法外。」

張宇傑說：「咁都無辦法，鬼叫我哋有痛腳俾佢揸喺手。」





徐梓俊說：「我哋有份參與，點都係同謀，就算有罪，都要拉埋兇手落水。」

張宇傑說：「拉條鐵咩！我哋都唔知道邊個係兇手！」

徐梓俊說：「咁我哋就要諗吓邊個係Tina嘅守護天使喇！」

張宇傑說：「Tina除咗同Winson拍過拖之外，唔係好覺仲有其他男朋友。」

徐梓俊說：「咁佢有無兄弟姊妹喺CFY讀書呀？」





張宇傑說：「唔太清楚，未聽聞過。」

徐梓俊說：「我哋一定要搵到個兇手出來，證明我哋係被迫成為共犯。」

張宇傑說：「轉做污點證人係可以減輕刑責，但係亦等於承認我哋四個輪姦過Tina。」

徐梓俊說：「至少輪姦無謀殺咁大罪，唔使被判終生監禁。」

這時，突然有人從後拍兩人的肩膊，嚇得兩人跳起來。





葉雨晴說：「頭先你兩個講你哋四個輪姦過Tina？」

張宇傑說：「無呀！妳聽錯，妳幻聽。」

徐梓俊說：「男仔吹水嘅嘢千祈唔好信。」

葉雨晴說：「頭先你哋兩個太專心傾偈，我已經用手機將你哋嘅對話錄低咗。」

張宇傑說：「妳嚇鬼咩！頭先我哋講得又唔大聲，收音都唔會清楚得去邊。」

徐梓俊說：「就算收得清又點？我哋吹水唔得咩？」

葉雨晴說：「你哋認為將所有罪名推曬喺Edward身上就會無事？兇手就會放過你哋？」

張宇傑說：「佢話今次係最後一次㗎！」





徐梓俊從後大力拍打張宇傑的後腦。

徐梓俊說：「死蠢！穿曬煲喇！」

葉雨晴說：「兇手可以利用你哋去殺Victor同Winson，自然亦可以殺埋你哋。」

張宇傑說：「對Tina傷害最深嘅係佢哋，我哋已經幫兇手去懲罰佢哋，應該唔會有事。」

徐梓俊說：「咪咁天真，就算兇手唔殺我哋，都會繼續威脅我哋幫佢做其他犯法嘅事。」

葉雨晴說：「唔通你呢一世都想被兇手控制？」

張宇傑說：「咁我轉手機號碼、轉校、搬屋，總之令佢搵唔到我就得。」





徐梓俊說：「兇手已經掌握我哋嘅犯罪證據，佢向警方告發我哋，就邊度都唔使去。」

葉雨晴說：「無錯，你哋已經無得揀，唔想呢一世都被控制，唯一辦法就係揪兇手出來。」

張宇傑說：「就連我哋都唔知道兇手嘅身份，點樣揪佢出來？」

徐梓俊說：「都唔係完全唔知道，至少可以肯定佢係5A班嘅同學。」

葉雨晴說：「唔好理兇手嘅身份住，首先我想問吓邊個放把劍落Edward外套個袋度？」

張宇傑和徐梓俊面面相覻，知道紙包不着火。

徐梓俊說：「我睇得好清楚，放學Kenneth撞到Edward嗰陣放落去。」

葉雨晴說：「咁把劍你係幾時攞到手？」





張宇傑說：「小息嗰陣仲未有，下晝食完飯返來，把劍就喺我櫃桶入面。」

葉雨晴說：「但係琴日朝早先至搜完書包，唔見有任何刀劍之類。」

徐梓俊說：「把劍成六寸長，唔擺喺書包又可以收喺邊度呢？」

葉雨晴說：「呢個就係最大嘅問題，只要解開咗，就可以知道兇手嘅身份。」

張宇傑說：「會唔會一早放喺locker呢？」

葉雨晴說：「5A班嘅locker喺四樓走廊，拎咁大把劍出來會好礙眼。」

徐梓俊說：「咁會唔會放喺褲袋呢？」





葉雨晴說：「放喺褲袋把劍嘅形狀一定會現曬出來，都係講唔通。」

張宇傑說：「呢個問題要再研究，依家我哋係咪決心要揪個兇手出來。」

徐梓俊說：「我唔想一世被兇手控制，至於對Tina做過嘅事，我哋係應該受到法律制裁。」

葉雨晴說：「既然係咁，我哋大家交換手機號碼，一有新消息即刻通知大家。」

張宇傑、徐梓俊、葉雨晴三人伸出拳頭疊在一起，示意結成聯盟，一齊揪出兇手。