千禧港女神探（一）春風化雨殺人事件: 第四十三話　兩強對決

第四十三話　兩強對決

就在此時，有一隻強而有力的左臂，輕易地將葉雨晴撥開。

葉雨晴向左退後幾步後，方才站穩馬步，原來此人正是體育科老師朱展明。

朱展明說：「大家讓開！睇來只有我先至可以制伏到你！」

謝隆恩說：「朱Sir？我都想同你比試一吓邊個臂力比較勁！」





沒有使用拳打腳踢，朱展明一開始就去抓謝隆恩的手腕。

謝隆恩亦不甘示弱，同樣去抓朱展明的手腕。

結果，兩人都用左手抓到了對方的右腕。

謝隆恩說：「拳怕少壯呀！我後生過你咁多，你認為可以贏到我咩？」

朱展明說：「哈哈哈！你未聽過薑越老越辣咩？」





兩人僵持不下，一時間不分勝負。

謝隆恩求勝心切，終於沉不住氣，要先發制人。

謝隆恩說：「我已經單身16年喇！你係無可能贏到我嘅！」

謝隆恩突然運勁，手臂至肩膊位置的上衣爆開，雙手向外壓出去。

謝隆恩大喝：「左青龍！右滑鼠！」





朱展明開始處於下風，可是仍然神態自若，氣定神閑。

朱展明說：「你⋯⋯就係得咁多？」

謝隆恩顯然已經用盡全力，開始額角流汗。

朱展明突然運勁，手臂至肩膊位置的上衣爆開，雙手向內壓進去。

朱展明大喝：「左青龍！右滑鼠！」

形勢逆轉，謝隆恩逐漸氣力不繼，可是仍然堅持到底。

謝隆恩說：「原來朱Sir都係同道中人！」

朱展明說：「無錯！我已經單身60年喇！你係無可能贏到我嘅！」





朱展明將兩人的四手合起來，然後雙手抓着謝隆恩的雙腕，就好像馴獸師合起鱷魚的巨嘴一樣。

朱展明說：「你已經徹底失敗，都係束手就擒啦！」

謝隆恩說：「我單身16年，你單身60年。我輸得口服心服，唔再反抗。」

「啪！啪！啪！」零聲的拍掌聲由5A班同學開始，逐漸變成全場熱烈的鼓掌聲。

大家一齊喝采：「朱Sir你真係好勁呀！」

趙芷芳上前想用手銬扣上謝隆恩的手腕，豈料為普通人而設計的手銬太細，根本扣不上如此巨腕。

高子峰唯有找了一條粗麻繩，將謝隆恩的雙腕綑綁。





趙芷芳說：「朱Sir唔該曬！多謝你同警方合作！」

朱展明說：「唔使客氣！我都係盡良好市民嘅責任姐！」

高子峰說：「好啦！呢單案已經完結，你就乖乖地同我哋返差館。」

謝隆恩說：「等一陣！我有一個請求！」

趙芷芳說：「依家你係重犯，憑乜嘢提出要求？」

朱展明說：「話曬我都曾經教過佢，就聽吓佢想點。」

謝隆恩說：「我知道殺人要坐一世監，有一件事想請朱Sir成全，過咗今日就以後再無機會。」

朱展明說：「究竟係乜嘢事咁重要呢？如果我幫到手就一定會幫！」





謝隆恩說：「我真係好想睇一次你喺鞍馬上面做『湯馬斯盤旋』，頭先同你交手，

發覺你仍然體力充沛，我好有信心你仍然做得到，我真係好想欣賞你嘅優美動作。」

謝隆恩投以仰慕的眼神，朱展明立刻雙眼泛起淚光。

朱展明說：「估唔到⋯⋯我喺CFY教咗幾十年，都係第一次有學生咁欣賞我。」

高子峰說：「等一陣！咁樣唔啱規距！」

朱展明說：「人係我幫你哋拉返來，就當係俾我一個薄面。」

趙芷芳說：「咁樣⋯⋯我好難向上頭交代㗎喎！」





朱展明說：「不如咁啦！我就民主啲，用投票決定，想睇我做『湯馬斯盤旋』嘅請舉手。」

禮堂之中，除了趙芷芳、高子峰和雙手被綑綁的謝隆恩，其他人全部舉手。

趙芷芳看見警方只有兩人，老師、學生和家長人多勢眾，實在不宜硬碰。

趙芷芳說：「咁好！你需要幾耐時間？」

朱展明說：「成套動作五分鐘之內可以完成，請大家跟我落去有蓋操場。」