金庸今年出食譜？: 一

我叫Kyle，係一名普通中學生。

曾經有人同我講金庸出食譜都大把人仆住去買。

原來，係真既。

琴日，某大型出版商公佈左，黎緊金庸會出食譜，限量發售，持有xx銀行信用卡可優先訂購。

消息一出，一眾黃牛黨，金庸fans們當然係爭相搶購，情形就好似餓狗搶屎一樣。（我并唔係話金庸既書係屎，比喻而已。）





出於好奇心，我用比原價高出十多倍的價錢購入了一本金庸食譜。

先從封面講起，黑底白字，設計簡約，「食譜」二字設於書面中心，右下角則是楷書體的「金庸」二字。

再翻翻內文，其實同市面果d圖文並茂既食譜書相差無幾，裡面亦都無介紹咩好新奇好特別既菜色，只不過係牛肉炒苦瓜佢就改左牛肉黑松露炒苦瓜諸如此類而已。如果唔係掛住金庸大名，肯定無咁多人仆到去買。

殊不知，出食譜只是嚼頭。

一個禮拜後，出版商響佢地官網突然宣佈，凡係買左金庸食譜既讀者都會自動成為「齊來哇啦啦燒書大賽」既參賽者。





比賽係為左慶祝該出版商成立唔知幾多週年特意舉行既。

呢個燒書大賽既賽制基本上係完完全全將動畫《魔法小神童加旋》裡既設定照搬過黎，首先每名讀者均會獲得一隻以金庸先生筆下角色為原型的虛擬拍檔，讀者只要響封面用手指臨摹一次該楷書體的「金庸」二字，隨即書內預設的電腦程式就會啟動，一個一比一的金庸小說角色就會活靈活現於你眼前。

然而，所有角色的一開始都是沒有任何技能，要令角色習得技能唯一既方法就係跟住食譜照辦煮碗咁完成該道菜色。

一道菜色等於一個招式。

菜色越複雜，得到的招式越高級。





招數越多，戰鬥就越有利，對決規則亦好簡單就係打敗對手，燒左佢地本書，每本書只要感應到被攻擊，裡面既自燃程式就會啟動，食譜便會自動燒毀。

經過一大輪廝殺最後剩低果一位參賽者就會成為冠軍，比賽冠軍將會獲得十萬銀獎金以及金庸一年內所有小說賺得的版稅。

十萬銀話多唔多，但對我呢種窮學生絕對係超級吸引，夠升級部電腦同買PS4再加NDS有餘，睇黎呢筆獎金我非取不可。

而我本食譜入面設定既金庸人物係：青翼蝠王韋一笑。