(無甜)上天給我的一個玩笑 (新增外傳): (21)

時間不知不覺地過去，沙灘越黎越涼，我見係咁就好小心咁抱起左啊螢，我唔敢抱佢行太遠，驚整醒佢，最後將佢放左係我張吊床上面然後將個睡袋解開蓋係佢身上以防佢凍親
 
而我就舖左張沙灘蓆係地下，蓋一件外套係個身上面，仰望天上嘅星星，但我睇到嘅係我係啊螢屋企見到嘅個張相…
 
不知不覺間，我亦都訓著左
 
當我起身嘅時候，啊恩煮緊早餐，其他人都去左梳洗，而啊螢亦都仲係訓緊...
 
「快啲去洗面啦」啊恩整緊三文治「好快有得食架啦」
 




我亦都去左廁所梳洗，梳洗完返到去我仲坐左係到等自己清醒啲，但啊螢仍然都係未醒仲好似好好訓咁…唔通我張吊床真係咁好訓?
 
時間去到十點，我地個個都食完早餐，啊螢先悠悠閒閒咁起身
 
「好舒服呀」佢打左個呵欠「咦你地咁快食左野嘅」佢望一望我地咁多個
 
「仲望住你訓左好耐添」啊恩笑笑口「快啲去梳洗啦，我而家整埋你個份呀」
 
「哦哦哦，好呀」啊螢急急腳咁落床
 




「哎呀」佢成個翻左落黎
 
「有無事呀你」我上前扶佢
 
「無事，好彩係沙地黎，不過我個口好多沙呀」佢指住自己個口，講野含糊不清
 
我比支水佢等佢吐返口入面嘅沙出黎
 
「邊個放我上黎架…」佢指住我張吊床
 




「我見你琴晚訓左，費事整醒你咪抱左你上黎囉」我一面無奈
 
「張床係幾好訓嘅不過撻死人咩」佢塊面紅紅地，不過係嬲個種紅
 
啊螢撻落地嘅時候條手繩亦都甩左，我就咁執左佢收埋落自己嘅褲袋
 
等埋啊螢食完早餐之後我地都開始收拾行裝離開呢個營地返屋企了
 
大家係地鐵站分開之後，我就同啊螢一齊行返去屋企
 
「琴晚唔該你抱我返去訓喎」啊螢笑笑口咁講
 
「唔洗，下次你眼訓就返去訓啦，唔洗陪我係到坐喎」其實我都唔知有無下一次呢啲機會
 
「咩喎，我睇睇下星訓著左，你估我想架咩?」啊螢又係到拍我




 
當佢拍我嘅時候先發現自己無左條手繩，就開始好緊張咁係到搵
 
我扮哂咩都唔知「搵緊咩呀你」
 
「手繩呀」佢係咁摸自己褲袋「你係長洲送比我個條呀」
 
「呢條呀?」我係褲袋到拎出黎
 
「係呀係呀，點解會係你到」佢好似放低心頭大石咁
 
「你撻落地個陣我執左囉」我笑左出黎「戴好啦下次無咁好彩」我再一次套係佢手上
 
「做咩咁緊張條手繩」我問佢
 




「唔話你知」佢個樣好傻好似小學雞