《再等多少個十年，我也要和你一起》: 第八章 日記的秘密

「請問你有冇興趣做社drama啊？」藍社社長杜嘉奇問我。
 
「um…我諗唔洗啦…」我一向也不善於上台表演的活動。
 
「係啊？咁算啦，真係可惜…」
 
「等陣！」開口的是樂符︰「你試下玩下啦，drama好好玩㗎，我都有參加。」
 
「唓…我又唔係同你同一個社…」
 


「喂啊，參加啦參加啦…」樂符偏嘴對我衰求着︰「我想睇呀庭你表演啊！」
 
「唉，好啦好啦。我試下啦…」
 
「咁實在太好啦！」嘉奇把我的名字記下來︰「唔該哂你啊，小符！」
 
樂符也對他單眼點一點頭…
 
「叫得咁親切做咩喎，同你好熟咩…」我低聲自道。
 


「庭庭你又呷醋啊？醋酲，醋酲，醋酲！」樂符笑說。
 
「冇囉…不過你因住我咁靚仔上台做drama迷到萬千少女啊！」我自問樣子也算得上英俊。
 
「迷到你都唔會so佢地㗎啦…唔係咩？」樂符對我撒嬌。
 
「咁緊係啦，我淨係愛符符一個！！」
 
*************************************************
 


一群藍社社員放學後留在禮堂商討社drama事宜……
 
「我認為應該做愛情劇，所有同學都一定會好有共嗚！」提出意見的是一個矮小身材的女子，帶着一臉可愛的樣子，用「蘿莉」來形容最適合不過。
 
「咪ON9啦羅小怡…評分係班老師評唔係學生評㗎！」一向直腸直肚的零仔即使對方是女仔他也依舊直屌。
 
「屌，咁你講囉，做咩啊！？？」小怡也不甘示弱。
 
「緊係演啲懶有深度嘅劇啦！啲老師最中意睇呢啲。」
 
「有見地！好啦，咁寫劇本就交比你啦零哥。」社長順勢而上。
 
「點…點解係我啊？不嬲都係果個羅小怡寫劇本㗎啦…」
 
「咁你BAN人地個IDEA，呢啲嘢就要自己做㗎啦。」社長杜嘉奇明顯地偏幫小怡，看得人有點不爽。


 
「屌你地中意做咩劇就做咩劇啦。」零仔沒有選擇抗爭下去。
 
「好啦！其實劇本我都寫好咗㗎啦…」小怡從袋中拿出劇本。
 
「屌咁你問乜撚嘢啊！？先斬後奏係到扮民主，ON99。」這句是我心想的…
 
「呢套劇我暫時改咗佢個名做︰'穿梭時空愛着你'。」小怡打開劇本︰「套劇係講一個男仔花光一生嘅時間、心機都要同一個女仔一齊，佢最後甚至不惜穿越時空，去補救一啲佢曾經做錯咗嘅嘢…」
 
穿越時空…咁似我同樂符嘅故事嘅？
 
如果樂符同我同一個社，可以做男女主角就好了…
 
「你做咩呆咗啊？」嘉奇問︰「你想做男主角呢…？」
 


「好啊，我都贊成佢做男主角。」零仔舉手贊成。
 
「我都贊成！」「我都係。」「I AGREE TOO。」差不多整個社的同學ABCDEF也說贊成我做男主角。
 
「我都冇話要做…」這時我終於忍不住出聲︰「我又冇做過DRAMA，更何況我諗住嚟打下氣打下雜㗎炸…」說實了是因為樂符希望我做。
 
嘉奇以帶有一點GAY味的眼神看着我︰「做啦，做啦，張樂符佢都好希望你做㗎…」
 
其他社員也立即和應︰「係囉！」「就交比你啦！」
 
如果我能當上主角，的確能令樂符開心…
 
「我可以試下嘅…」
 
「男主角就搞掂啦。」社長望了望女社員︰「咁女主角邊個做啊？」


 
那些女仔你眼望我眼，你推我讓，沒有一個願意當…
 
社長再說︰「冇人做就抽籤啦，抽中邊個冇得怨啊。」
 
我望向那群女社員，發現當中有幾個身形坦克暴龍級的女子。
 
我心裏祈求她們不要抽中…
 
「對唔住啊，我嚟遲咗。」推門進來的是藍社副社長，淑敏︰「你地傾成點啊？」
 
這時杜嘉奇便立即像一隻士兵一樣，走到娘娘面前匯報情況。
 
「哦…任杰庭做咗男主角，睇唔出喎…」我自己也猜不到自己會做主角。
 


淑敏再說︰「唔洗抽籤啦，冇人做女主角，就我做啦！」
 
場面陷入了冷卻當中…
 
大家也好像很驚訝淑敏她會願意擔任女主角，我也猜不到。
 
「WOW，副社長好耶！！！」「副社長萬歲！」「我地今次贏硬啦！」社員們再一次為找到人做主角而歡呼。
 
淑敏則對着我點頭一笑…
 
這個笑容…很熟悉，但又有一種奇怪的感覺…
 
很難以文字來形容，總之這個笑容就像不屬於中四的淑敏……
 
*************************************************
 
一陣撲鼻而來的濃溢香氣從客廳傳到房裏去。
 
是香烤西式多士的氣味…
 
剛剛還跟社員討論DRAMA的我現在竟在床上…
 
是一段失去了的記憶嗎？
 
我被某特工組織洗腦了？
 
被外星人抓到UFO被進行研究再清除記憶了嗎？
 
這一切奇想在我望向床頭鏡中的自己後，已經不攻自破。
 
我回復到30歲的樣子…
 
濃密的鬚根，歷盡滄桑皮膚粗糙的成熟面孔，與夢境中的年青樣子成了一個對比。
 
我又從那個「夢」中醒過來了嗎？
 
這次醒來的時間真久呢…可是我看到今天的日期，是八月十三日，也即表示我只睡了一夜！
 
我翻開書桌上的日記一看…
 
日記裏的頭十多頁寫滿了字，全都是記載着我和樂符的一點一滴…
 
一個擁抱，甚至一句甜言，兩句蜜語，也清晰地記載於日記之上。
 
我一邊看着這幾篇日記一邊傻笑，笑的是那兩小無猜的傻氣，他們的肉麻，他們的甜蜜…
 
「喂，快啲出嚟食嘢啦，唔洗返工啊？！」老媽耳熟能詳的話語於我耳邊響起。
 
「哦！嚟啦。」身處夢境之久令我忘記了自己已經是一名IT公司軟件開發部的主管。
 
吃過呀媽煮的西式多士後，我便出發去上班。
 
*******************************************
 
經過一天的勞動後，終於下班了！
 
今天呀媽相約了X太、Y太和S太以雀會友，所以我自己一個到了茶記吃晚飯。
 
「豆腐火腩食，凍檸茶！」我霸氣地向與我相距兩張枱的伙記下單。
 
「收到！！！」伙記的回覆也充滿霸氣。
 
與伙記之間的霸氣交流在普通人眼中只是一次普通不過的下單。
 
可是我和伙記深知…我們的對話不只是下單，是交流，更是比試！
 
是霸氣的比試，也是男人之間的比試！
 
每次的比試也是我喜歡到茶記吃飯的原因。
 
「咁啱嘅？」一把女聲在我身旁傳出︰「冇人嘛？」她指着我身旁的坐位。
 
她沒有等我的答覆已經坐了下來。
 
「淑敏？你都會食茶記㗎？」我還以為淑敏這種女神級的女孩一定會不會別茶記。
 
「咁又冇男朋友，自己一個，食茶記都幾方便啊。」淑敏眼神中流露出一絲寂寞。
 
「其實你都差唔多係時候搵番個啦，以你嘅條件，搵個筍盤都唔難啊。」
 
「唉…你唔明㗎啦。」淑敏不敢直視於我。
 
接着我便把夢境中的幾天的經歷告訴淑敏。
 
聽過我的經歷後，淑敏沒有露出任何驚訝好奇，平淡地說︰「哦，咁炸…」
 
好像對我所說的百份百相信，完全沒有懷疑我憶女成狂。
 
與其說相信…
 
倒不如說她的反應就像她自己也親歷其境，沒有什麼好驚訝…
 
*********************************************************
 
回到家後，我立即回到房間研究和思考為什麼這次穿越的時間這麼的久…
 
在我百思不得其解之時，我再次打開日記本，細看我和樂符這幾天的經歷回味一番…
 
當我重複翻看數次後，我發現了一個奇怪的地方。
 
每一頁寫上字的頁面的右上角，也寫着一小行︰1n=3d。
 
而還未記有文字的頁面的右上角則只印有_n=_d，很明顯需要自己填寫。
 
1n=3d…
 
會不會是1night=3day的意思呢？！
 
很有可能！昨晚我只需要一夜，就在夢境中渡過了三日。
 
為了可以在那個有樂符的世界過久一點，我決定在日記新的一頁填上了:1n=365d…
 
沒錯…
 
我要待在那個世界，一年！