廢青於中世紀魔法世界的生存法則: 77, 恃住自己失戀以為自己大曬既人正仆街
伯雷應該諗住叫埋菲兒出黎壓場，應該唔會失控。
你太天真喇伯雷BB……
即使菲兒係萬人迷，在場人仕既反應都明顯無咁熱烈，一黎被氣氛破壞者三葉搞串左個場，二黎佢地對來歷不明既都鐸都係有戒心；鄉下地方係咁架喇，習慣下。
係零丁既掌聲之後，仲未見兩位主角。
我勸你地就唔好搵，阻人扑野既後果好嚴重。
各位左望右望，終於發現佢兩個沉醉左係自己既世界，完全唔知有人搵佢。
「介唔介意我坐係到？」回頭一望，竟然係蘭卡特。
「隨便。」唔通我同佢講個位有人咩？係人都知我無朋友。
此刻我坐左係一張長椅既中間，三葉當我左邊大脾係枕頭咁訓左係到，然後用一隻手掩住自己雙眼，細細聲依依暗暗咁唔知講緊乜；而蘭卡柒就坐左係我右邊。
「你唔同你班手足一齊坐？」
「佢地遲早都要習慣我唔係到……倒不如依家就開始。」蘭卡特手執一隻銅杯，小嚼一口。
你又飲酒？
「然後佢地就會發覺其實我係唔係到分別都唔大。」
「…………」
自虐平時係我做開既野，你搶左我個定位我仲有咩台詞可以講？
「千祈唔好咁講……」你再咁講我真係會無左個飯碗。「點都會有啲分別。」例如有人會好開心。
「嘿……」
一輪擾攘之後，菲兒終於拖住都鐸出去見下各位鄉親父老，睇黎準備公布佢地結婚既消息。
「各位晚安。」菲兒有啲尷尬，似乎唔習慣係咁多人面前講野。
輕鬆啦，呢到係你地頭……
「各位好，在下都鐸。」佢一手放於腹前，一手放於背後然後做出照牌既紳士鞠躬。
若果唔係佢此刻上半身全裸露出，都真係會被佢欺騙到……
某層面上黎講，都鐸的確係名紳士。
佢地會講咩呢？好緊張呀……
傻啦，我一啲都唔緊張，見識過兩兄妹各種挑戰下限既行為之後，已經無野嚇到我。
「諸君，我好愛菲兒。」
…………………………
OK, YOU WIN
都鐸再一次成功挑戰下限。
此刻全場靜晒司機減速，我左右兩邊聽完果句之後都好似打左個冷震。
我唔怪你地，我都仲起緊雞皮。
但係我地點諗唔緊要，最緊要係當時人受唔受。
當事人掩住塊面跪左係地下，都唔係好差姐……
咁都唔係差既反應，咁真係差既反應係乜？
我本住我不入地獄誰入地獄既心為大家示範下。
「喂，三葉。」
「…………唔？」佢仲特登拖長左個回應。
「我好愛你。」
「…………………………」
點解乜回應都無。
「睇黎你真係醉得好緊要。」
「我只係唔想浪費口水回應你。」
「咦，醒喇喎。」
「比你嚇醒。」
「請問我係咪阻住左兩位？」蘭卡特準備起身就走。
真係慘，鐘意左十幾年既囡囡比人搶走左，仲要比人公開處刑，疊埋心水做汁男既時侯竟然被最意想不到既人放閃光彈炸盲眼。
「坐低啦師兄，我地兩個玩下姐……」
蘭卡特半信半疑地坐返低，然後我繼續講：「但係出面果兩個就好認真。」
「各位，我同菲兒將會係國立祭之後離開白石鎮。」呢句入面『我同』呢兩個字其實可以省略左佢，對一班思想保守既村姑阿伯黎講，一個入左村兩日既後生仔邊個會Care？
有一個人會好care，此刻佢握實拳頭，盯實菲兒。
對一班鄉親父老黎講，都鐸既出現就好似含辛如苦養左十九幾年，終於亭亭玉立既女兒被唔知邊到走出黎既金毛MK搶走一樣。
至於對蘭兇特黎講，就好似鐘意左十九幾年既幼馴染被金毛MK中出即飛一樣……其實都唔係『好似』，呢段描述已經發生緊。
菲兒係旁邊向眾人鞠躬，老野同伯雷聽到之後都顯得非常意外，而其他人，包括WW既眾人都有類似表情。
唯一一個無感到意外既人亦都係蘭卡特，回想佢琴日場決鬥講過既野，似乎佢一早就知道菲兒呢個決定。
「你無野丫嘛？」我低聲問。
「你咪出聲啦……」三葉道。
其實一眼就睇得出，蘭卡特咁既款無野就奇。
「昨日一處理完果兩個精靈之後……」溫馨提示，即係DS果兩個死剩種。「我立即就走左去搵菲兒。」
由此可見，蘭卡特都係一個處理完公務先會搞私事既人，換轉都鐸係同一個處境，佢一定會話知果兩隻女精靈直奔菲兒所在之處。
「佢第一句就同我講決定要離開白石鎮。」
到最後呢兩個人都會離開白石鎮，但佢地並唔係一齊離開。
「當我話要做佢旅伴既時侯，佢拒絕。」
菲兒既形象係有求必應果隻，呢種女人係謎漫謎動畫同現實都好易被人foot on the door咁呃左隻豬。
但這些機會不是屬於蘭卡特的。
我無急於催問佢之後既發展，一黎有人命令我收聲，二黎就算我唔催佢都會講。
我同蘭卡特既關係連好都稱唔上，一般情況下我根本唔係佢傾心事既對象。
此刻我只係扮演緊樹窿既角色，因為蘭卡特本身亦都無其他傾訴對象。
係下屬面前佢係有威嚴既上司(於慘遭三葉屌打之前)，於長老及伯雷面前佢係可靠既下屬(於慘遭三葉屌打之前)，於將軍面前佢係滿師下山既徒兒(於慘遭都鐸屌打之前)，係其他人面前佢係遙不可及既貴族哥兒(於慘遭都鐸屌打之前)。
本來佢既處境可以用高處不勝寒黎形容，但係此刻佢女神比人溝走左，於全村面前霸氣盡失，仲裸辭左份高薪厚職，我只可稱之為「地底不勝寒」。
「佢同我講佢已經有旅伴。」
男兒有淚不輕彈，你要忍住呀！
「最令我傷心既唔係我做唔到佢旅伴，而係佢講呢番話果陣，臉上果份滿足既笑容……」
雪菲兒，你真係個罪孽深重既女人。
我拍拍蘭卡柒既肩膀以示安慰，雖則Call of duty既野我未經歷過(連入伍既資格都無)。
換轉係一般收開兵既娘娘，以蘭生既條件至少都做到高級騎兵;偏偏菲兒係收左兵都不自知既天然觀音。
更甚既係雖然蘭生係地方土豪，但對手叫做澤楷，點鬥？
若果我係到同佢講都鐸既真正身份，唔知佢會點諗。
菲兒同都鐸放完閃光之後，伯雷終於傳召蘭卡特去講幾句。
而我既任務亦即將開始。