「作為你既教官,咁短時間之內就有如此進步,我必需稱讚你。」

「唔需要稱讚我,我係開左外掛先頂得住。」一個稱為森宿既外掛。
雖然頂得住之前三招,但係呢三招都係睇完攻略拆過譜先勉強頂得順……

作為一個低端玩家,跟住落黎既大版本最終boss後半戰我點先可以初見踏破?
此刻蘭卡特站於V型火痕既尖端處,而我就企係V字其中一側既旁邊。
上次係森林打菲兒,一黎有熊侏分散注意、二黎有樹林掩護、三黎對方hea住打先負碌打得嬴。

今仗並唔係咁易,有見及此我使出錦囊-打電話問朋友。




『森宿大大有乜提議?你有三十秒時間作答。』

『長兵鬥短兵,於平地之上即使雙方實力相若仍是長兵佔優,何況……』

『得,我知我廢,最後答案係乜A定B?』

『若場地轉換成樹林於戰鬥層面上或可支持片刻。』

『就照你說話做。』





『你肯定?』

『拜託你。』
於樹林之類既狹窄空間,揮動短兵器比使用長兵器容易,可以拉近雙方戰力。

『預備好。』
「無限樹制-----」我好型咁嗌出招名,事實上實際用途只係通知森宿我都準備好。

空曠既土地長出十數棵樹,就好似賣緊EPS廣告咁樣。
我趁呢個機會再次確認一個非常關鍵既位置,但係回神既時侯,蘭卡特已經唔見左。





「我唔知道點解你會識用長老既魔法,但若果你以為單靠樹木就可以阻止我的話,就未免太睇少我。」
雖然係動漫界之中,一路打交一路傾計係行規,但係蘭卡柒呢句會唔會長左少少?
「鏘---」蘭卡特從樹冠上躍下,我舉起木盾檔住其中一邊,而佢右手準備揮劍。

偷襲?同香港人鬥陰濕?
我用西瓜刀檔住另一邊,但蘭卡特由上而下進攻有體重優勢,一秒之內我防守必定崩潰。

「木屑!」我以聲音向森宿傳達自己既意思,下一刻木盾就往蘭卡特臉部噴出木屑。
當然成套連技無咁快完,「Sprite hear my call. To set my enemy on fire!」

「熊-----」
既然天生魔力不足,就出古蠱黎提高技能既傷害力。
呢下粉塵爆破傷害力非常驚人,同菲兒當日招火蝴蝶有得揮!





而整個樹冠既樹葉都被波及,火勢於樹頂層開始蔓延。
『小伙子,你用這種戰鬥方式支持不了多久』

方丈多謝你既提示,不過我由一開始就無打算打持久戰。
塵爆消散後,蘭卡特原本所處既位置被完全燒黑既劍鞘所取代。

雖然我都估到條友實有方法避到先敢用招殺傷力咁大既招式,但係依家算點?考緊中忍考試?劍鞘替身術?
「鹿躍!」原來呢個世界都有鹿……等等,我既著眼點應該唔係呢到?

燒黑既劍鞘就好似被魚絲扯走一樣,而蘭卡特拎住雙劍指向我,好似雄鹿用佢對角做武器衝鋒一樣……掛。
佢地啲招式名真係唔比啲想像地都聯想唔到,獅吼?邊撚到獅?睇過?
我無打算直接檔呢招,本人一向都係鐘意打游擊戰陰陰濕濕,你以為中國共慘黨點樣打個江山返黎?咪又係一路打一路走。
「打我阿笨蛋。」

「向人挑戰然後又於戰鬥中閃閃縮縮,你有無作為武人既尊嚴?」





「尊嚴?換到幾多錢?」
好Cheap?嬴咪得囉,嬴左之後歷史你點寫都得,『二萬五千里大長征』呢個名點睇?

我都準備黎個二百五十米大長征。
「其實蘭生,你都無乜資格講尊嚴,廿歲人又身居要職,恃住自己就走就亂咁講野。」

「鹿躍!」不知名既力量將另一個無燒焦到既劍鞘牽引到我面前,然後被有如魚絲拉走既特效再次出現,蘭卡特再次衝鋒。
幸好暫時兩次佢都只能作出直線衝鋒,因此於樹木既掩護之下唔算難閃避。

趁係咁嘴炮多兩句先。
「你地廿歲人已經相等於我地廿八歲,三張野都黎仲咁幼稚講野唔理其他人感受,唔怪得無人鐘意你。」

「鹿躍!」
我一路打一路走,而蘭卡柒就用繼續用接近變魔術既形式追擊,地利關係本人依然輕……





「彭-----」

蘭卡特使用鹿躍既時侯直接將檔係中間既成棵樹切開,爭少少劍鋒就劃中我。
睇黎我既挑釁術實在太成功。

「咁你又唔使咁嬲既……你又型出身又好身手又勁……」拿拿聲補獲先!
「既然你無心戀戰我就直接了結你。」

蘭卡特張開雙臂,架起雙劍儲氣。
我見佢個勢咁猛,立即想走開,但森宿傳來賀電……

『現在是阻止他的最佳機會,若詠唱結束的話你可以直接投降。』

『點解佢會唱技架?佢唔係戰士黎架咩?』





『誰規定戰士不可以詠唱?』
糞Game,平衡team呢?

呢場戰鬥入面遊戲既mindset幫左我好多,但係同上次打菲兒一樣,遊戲既mindeset亦都製造左好多死角。
要唔要禁緊急制呢?但係佢身處既位置實在太遠……未係時侯。

屌呢媽,頂硬上!
我轉身就衝返去蘭卡特面前使出普通跳斬,蘭卡特交叉架起雙劍輕鬆檔住,口中既詠唱尚未停止。
「喂蘭生,你唱緊乜野姐?」
係比較Hardcore既遊戲裡面好多時都有「DPS Check」呢個概念。

舉例,隻王係戰鬥開始之後十三分鐘就會詠唱一招強制滅團既技能,稱為hard dps check。有硬必有軟,soft dps check通常唔會直接秒殺你,取而代之既係戰鬥持續越耐,隻王既能力就會越強,最終必定有一方死亡。就算係芒亨入面既50分鐘timer都可以當係dps check。
點解要有咁既設定?點解唔可以比戰鬥持續至2046?
一般黎講坦同補既錯誤係最顯而易見,因為佢地一做錯就會團崩,而另一方面就算dps駁錯招傷害都只會低左,其影響好難先會留意到。
而dps check呢個概念既其中一個目的就係懲罰弱既dps。
點解我要用無啦啦用成段黎講個咁既概念?

我除左欺騙字數之外,仲想帶出一個重點 - 本人係弱既dps。
以我既技術同裝備想正面突破呢個dps check可謂困難重重,唯有利用遊戲外既方法 - 出口術。
「喂喂,中二病臭屁孩。」

蘭卡特專心詠唱技能,完全唔理我既口術。

我舉起木盾,向蘭卡特臉部再次噴出木屑。

「顏射!」本人中文底子唔係幾好,實在諗唔到其他更加好既技名,
但係都幾貼切丫?你地話係咪?
我以為呢招咁狠既攻擊可以嚇停蘭卡特,豈料佢成口一滴滴咁繼續唱技之餘,仲左手揮劍將我推開。
明明係樹林裡面,點解仲可以咁靈活?

我望一望佢雙手,原來佢捉住劍身既位置黎揮刀,武器太長而帶來既不便因此消失,但另一方鮮血亦由佢掌中流出。
注意力一時被分散既後果非常慘烈,蘭卡特首先再用右手直刺我臉部,我舉起木盾檔開,但依然劃中左邊臉頰及耳朵。
傷口既刺痛感覺非常真實。
『嘉穎,你知道決鬥的意義嗎?』

我左手摸一摸臉上既傷口,然後就立即衝上前繼續戰鬥。
鍵盤戰士係我既職階,但此刻我實在無暇回覆森宿。

『就是一份不惜以性命相搏的堅持及執著』
電源剩低唔多,再發一球火球術的話,所有魔法都會消失……

若果係預定時間之前耗盡魔力,就再無取勝既希望。
『沒有這種堅持就謀然向他人挑戰的你,實在太魯莽』
「喝----」

一句說話觸怒蘭卡特,仲要令到佢失控停止施法之餘仲會追住我黎斬……
答案豈不是顯而易見?

但為左自己既人身安全,我一定要係佢身距離範圍細細聲講。
唔可以有其他一聽到,一定唔可以!
已有 0 人追稿