廢青於中世紀魔法世界的生存法則: 7, Maslow既層次需求第一層 - Wifi
「喝！」
我掌心感到微暖，亦都見到有微弱既光包圍住部電話。
持續左十數秒之後，老野放低魔杖，溫暖既感覺同燈光亦熄滅。
「咳咳...剛才的已經是老身所剩餘的所有魔力。」
「長老！咁危險既事情請你唔好再做！」莫非傳送魔力係件好危險既事？
我再次緊接電話開關制。
螢幕發出白光，黑色既蘋果亦於螢幕中出現。
「矣？咁我以後咪唔使用尿袋？」
就係隊長同老野黎得切問尿袋係乜野之前，螢幕變回漆黑一片。
老野連一秒都維持唔到。
「此裝置之魔力消耗量果真巨大。」又或者係你腎虧無鬼用。
「咦...」係我地三條麻甩佬專注於電話既時候，身後傳來少女既聲音。
「菲兒！」隊長及長老均走至雪菲爾身旁。
「蘭卡特大哥...仲有長老。」蘭卡特應該係隊長個名。
我只係企係馬車車卡另一側離遠咁望。
總而言之無事就好，若果黎新世界之後唯一既女角都便當埋的話，搵鬼追個故？
「嘉穎，多謝你救左我。」
「......我乜野都無做到。」唔係出自謙虛，而係我真係乜都無做到。
再講，由一開始雪菲爾會有危險都係為左救我，若果你要我以身相許我都OK架！
「距離白石鎮已經唔遠，各位今晚就好好休息。」聽隊長一講，我先留意到附近既路已經開始平坦。
「老身沒有休息的餘暇，在見到劫的出末之後。」
「劫？」雪菲爾問：「佢頭先出現左？」
「係。」隊長答。
「從結果黎講，佢救左我地。」我補充。
隊長同老野聽完之後用不滿既表情望住我，弊，唔記得左雪菲兒同劫之間錯縱複雜既老土關係添！
「原來係咁...」
「詳細既事我聽日同教堂報告完之後再話你知。今晚你就好好地休息。」隊長拍拍雪菲兒膊頭縱示安慰。
＊ ＊ ＊
我部電話完全無晒電，所以確認唔到時間。
體感上大概係11點左右，一般黎講我都仲未會訓。
係香港地邊有後生仔會11點前訓架？唔好玩啦，呀伯咩你？
馬車進入城門，雖然四周圍都好黑，但係似乎我地已經到左白石鎮。
隊長係城門落車之後吩咐馬車送我地返去。
即使隊長同長老唔係好願意，但係係雪菲兒既堅持，同埋無其他更好既選擇之下，安排左我去雪菲兒到暫住。
馬車繼續向鎮裡面前進。
係頭先進入城門之後，成條街已經黑蚊蚊，剩係得幾盞用黎維持治安用既街燈。
進入城鎮之後，老野似乎因為疲累，已經懶得講任何說話。
數分鐘之後馬車係一座巨型建築物前面停低，老野就係依到落車。
「老身必需將剛才發生之事回報，雪菲兒今夜就好好休息。」
「你都係呀長老，小心唔好捱壞自己。」
長老聽到之後摸摸雪菲兒頭頂，並且露出笑容。
然後老野轉左個好兇狠既眼神望住我，並用食指及中指作出剪型手勢。
呀叔你放心啦，佢識魔法架，我唔怕比人燒屎忽咩？
馬車繼續前進，無幾耐就係另一座建築物前面停低。
「到喇，依到就係我屋企。」
我落馬車之後抬頭望，由於實在太黑，乜都望唔到。
但係可見棟建築物都有幾層高，雖然唔夠頭先老野落車果棟野咁巨大。
雪菲兒打開木門，然後召喚出鬼火球。
「小心梯級。」佢叮囑完我之後就走上樓梯，我亦跟隨。
我摸住牆壁慢慢前進，傳入手中既係石頭既質感。
上完一層梯階之後，雪菲兒再打開另一道較大既門。
打開門之後，見到既係一個好大既房間，門口正面對住既係一塊好大塊既彩繪玻璃，就好似歐洲既大教堂既彩繪玻璃一樣，無返咁上下既樓底係唔會裝到依隻玻璃。
玻璃外面既係姣潔既月光，雖然我唔知佢地係咪用依個方法稱呼佢地既月亮。
事實上我留意到佢地既月亮比我平時係香港見到既月亮更加大個，因此亦份外耀眼。
外國既月光特別圓係咪咁既意思？
雪菲兒指示鬼火球飛往房間上方，位於天花既大燈亦因此點著左。
原來黑媽媽既房間亦都變得光猛起黎。
原來依個房間係圖書館，係我既左右方全部都係書架。
我一直行到房間中心，依到有幾張長檯同長凳，雪菲兒就行埋去長凳到背住張檯咁坐低。
「依到就係我平時工作既地方，我住既房間就係裡面。」
雪菲爾指住旁邊既書架，而書架既側面有一道房門。
「其他人呢？」係行兇之前確認無目擊者係犯罪者既常識。
「其他人？無其他人，就得我一個咋。」雪菲兒理所當然咁回答。
「你一個人打理咁大間圖書館？」間圖書館雖然無中央圖書館咁大間，但係睇依到咁多書架，樓底又咁高，藏書量應該比一般既地區圖書館更多，但應該少於我既Harddise。
「平時都係得我一個人打理，但係偶然長老同埋蘭卡特大哥都會帶人黎幫手，所以都唔算好吃力。」佢既聲音完全聽唔出半點委屈。
「你真係厲害，係我地世界，你咁上下歲數既女仔好多連自理都未必搞得掂，何況要管咁大間圖書館。」
「如果唔努力，唔為其他人作出貢獻的話，我就無面目面對向我善捨恩惠既人。」雪菲兒用傷感既語氣續道：「我地世界面對既困難太多，如果每個人都唔好好地付出自己既全部的話，成個族群好難會生存到。」
「頭先我地係馬車講既野，你聽到晒？」雪菲兒似乎回應住頭先馬車上討論既話題。
雪菲兒默默點頭。
「我唔係討厭或者妒忌，亦都無埋怨。我相信你地既世界亦都有你地自己既煩惱，你頭先提到人類面對最大既問題係人類自己，我根本難以想像。」我見話題可能會再持續一陣，於事就係雪菲兒旁邊坐低，同時雪菲兒企起身踱步。
「我依家生活得好開心，雖然面對既困難有好多，但係我可以完全相信身邊既人，身邊既人，例如長老同蘭卡特大哥亦都完全相信同依賴我。可以被依賴同可以依賴人既感覺非常之好。」雪菲兒回頭望向我，再續道：「若果有一日我唔可以再相信身邊共事既其他人……我會覺得好可怕，即使世界上再無任何龍禍，再無任何怪物既襲擊。」
雪菲兒講既亦有一定道理，正因為面對既困難太多，人類先必需要團結先生存到，亦都無暇內鬥，所謂同仇敵愾。
「雖然我咁講，但係我對有關你世界既事非常有興趣，如果可以的話我仲想再聽更多。」
「你想聽的話，隨時都可以。」我回答。
雪菲兒報以一個微笑。
＊ ＊ ＊
圖書館既另一角，係屬於我既房間。
「因為無預過會有賓客，所以地方淺窄，希望你唔好介意。」
房間並唔算好大，但係已經大過我屋企果間放完雙格床就已經無左大半位既房，你可以想像到我平時搵位放figure同輕小說有幾辛苦。
除左床之外，地面有好多雜物。
「簡單既被鋪係櫃入面會有，你用住先。聽朝早我帶你落市集買其他日用品，順便帶你認識下白石鎮。」雖然咁講，但係生活所需要用既基本都有齊，係爭個飛機杯。
「早抖。」
「晚安。」鬼火球與雪菲兒一同離開房間，原本有溫暖燈光既房間變到冷冰冰。
我望住窗外面既月光，同埋月光下面未知既風景。
明明周末就應該係屋企毒全日唔出街睇動畫打機既，我今日就要行路上廣州不特止，仲差啲連命仔都無埋！
呢個世界又無得叉電又無特上網，想上高登問人點返香港都做唔到。
首先我要知道太一想我搵既究竟係乜，但係我依家手頭上乜野線索都無……
事到如今，我只可以見步行步。