由於三葉堅持唔食刺身,所以佢走左去搵樹枝黎生火。

我本身非常反對,因為如果我地一失散的話就好難搵得返對方。
但係三葉留低既就只有一句「命運會引領我返黎你身邊。」

由於唔識點吐槽,所以唯有let it go。
「樹葉的離開是因為風的追求,還是樹的不挽留?。」

如果唔提高自己既中二系數,調較返個電波頻率,我怕同三葉會有代溝溝通唔到。
入返正題,隻豬既內臟部份已經比我拎晒出黎處理好。





而我既處理方法只係放埋一邊,雖然平時豬大腸好好味,但係親眼睇過係乜野一回事之後就唔會想食。
然後要處理既就係野豬既毛皮,若果剥落黎的話保暖既問題亦都解決到。

雖然以我劏豬既技術非常粗糙,但係總算係一輪功夫之後剥到塊皮。
即使塊皮癡住左啲脂肪,但係再加以處理的話應該係一塊唔錯既皮草。

野豬剩低既就只有血淋淋既肉同埋骨架,係我勉強將骨同肉分開之後,三葉就返到黎。
「你又真係識路返黎。」





「其實我只係隨便行。」三葉回答。
「有乜收獲?」

我留意到三葉兩手空空。
「我發現到個山洞,頭先收集返黎既柴木已經放晒係果到。」

小姐你會唔會太神?
「物資移動既工作就拜托你。」三葉無打算要獲得我既同意就逕自帶路。

但係我唔拎,唔通叫個女仔拎咩?




我將所有切好既肉放係毛皮正中間,然後將四隻腳既毛皮用螯蛛毛綁埋一齊拎起,就好似聖誕老人拎住袋禮物一樣,但係明明前面位小姐先係著得有聖誕氣氛果位。
如是者我又跟住三葉行左陣,為左打破沉默我又開始搵野講。

「咁你離開左屋企咁耐,究竟去左邊?」
「既然出世以黎都無離開過白石鎮,有機會的話當然要周圍去下,順便去探下我啲呀哥。十年間基本上我已經去過晒恩基大陸既所有大城市。」

唔知係地球用十年間夠唔夠去晒所有大城市呢?
「你一個女仔去旅行,唔會有危險咩?」

「正因為有風險,旅行先有趣。依番話係四哥同我講既,佢係真正既旅行家,四海為家,隨遇而安。有機會的話你都應該趁後生試下,等到你有家庭負擔同工作負擔既時侯,想去都無得去。依句係我講既。」
點解我要聽個十幾歲既後生女向我說教?
「咦,點解行左咁耐仲未到既,個山窿係邊?」

「唔知呢。」三葉回道,完全無半點猶疑。
跟住三葉去旅行真係好有趣,有趣到我接受唔到。





我發誓,返到白石鎮之後一定唔會再同依條靚妹有任何來往!
「你……你無留低記號架咩?」我盡量令自己講出黎既說話不帶責備既意圖。

「我從來都唔會咁做,反正命運會引領我。」
你究竟點樣自己一個女仔旅行十年都無事?我跟住你行幾個鐘已經爭啲心臟病發兩次!
「哈哈……真係唔知話你勇敢,話你樂天,抑或……」話你無腦。

「到喇,你睇下。」三葉指住遠方一個既山洞。
又真係比佢搵得返個山窿。
進入山窿既時侯,天色已經明顯轉暗。

我利用三葉收集返黎既柴枝生火,轉眼間黑暗既山洞已經變得光猛同溫暖。
除此之外我用剩餘既木枝架起木架,然後再將木枝穿過豚肉,掛係木架之上燒烤。





總有一種跳起完yeah一聲成個故事就可以完既感覺。
「你既求生技巧係邊到學返黎?」三葉問,佢已經將短靴脫出並且放埋一邊。

你就咁輕鬆,我又要生火又要煮食,公平咩?
「我參加求生測試之前有上過堂,好好醜醜都算係學過求生既技巧。」

「矣~」
「有咩辦法,為左生存就要咁。你遲早都要參加白石鎮既就業測試,到時你就知。」

「就業測試……的確係,返到白石鎮之後我都應該會參加黎玩下。」
玩,竟然用咁既字眼,你到底對自己幾有自信?

「你志願係乜?」就算係貴族,都一樣要參加測試先可以獲得係白石鎮生存既資格。

「唔……的確係,我從來都無考慮過咁既問題。」咁你依家就應該考慮下!




「我對生產無乜認識,由細到大既起居飲食都係由同居既哥哥負責,係最近十年出黎旅行先學多左小小野。」我睇關於生活上既野你乜野都無學過!
「不過由於家庭原因,由細到大都被迫讀左好多書,不斷累積既情況下……我諗都夠做個學者。」向身為學者既雪菲兒道歉!
「只係懷住試下都無妨既心理係過唔到關,依番話係白石鎮既前輩同我講既。」如果我唔依家提醒三葉,下次參加生存測試既就係佢。
以佢既生存技巧,好可能返唔到白石鎮。
「不過如果論興趣的話,果然魔法先係首選。」

「如果係想深造魔法的話,點解唔去蒂芬妮亞?」
「的確呢,當年係蒂芬妮亞逗留果陣都有人邀請我繼續留係果到深造魔法,但係始終想返白石鎮向哥哥報左平安先,畢竟離家出走左一段時間。」
「所以你打算報完平安之後就去蒂芬妮亞?」

「會都唔出奇,我都差唔多到要自立既年紀。但係點都好,白石鎮既測試我都會參加。」原來眼前既少女都有好好考慮過自己既未來。
「祝你好運。」我道。

「比起我你更加需要擔心自己。」三葉唔領情之餘仲串返我轉頭。
八婆!!




「假設你過到今次生存測試,你打算點?係白石鎮做一世守衛?」場對話既攻守逆轉。

「我依家既資料非常有限,只可以見步行步。」的而且確我唔知道跟住落黎應該點做,但係若果我過唔到生存測試的話,根本無考慮之後去向既餘地。
「你咁難得黎到一個唔同既世界,你甘於係白石鎮乜都唔做過世咩?」

「但係比起周圍去冒險,留係白石鎮收集資料,搵返自己世界既方法更加保險。」
「你要唔要同我去旅行?」

三葉終於露出狐狸尾巴,之前講既野都係鋪路想水我去旅行。
「我拒絕。」即答。
「唔好睇我咁樣,我都算係幾可靠。」除左你既投石技巧之外,你身上無任何野可以用可靠黎形容!

「我拒絕。」
「你唔使即刻答我,返到白石鎮再考慮下都唔遲。」

「唔使考慮,我拒絕。」揀旅伴係一門好高深既學問,如果你認為同女仔去旅行,條女是否jjable係最重要的話,你一定兇多吉少。我對旅伴唔算非常挑剔,但係同三葉依類咁行事隨便既女仔去旅行一定無好結果。
「我地兩個來自唔同世界既人可以相遇,此刻可以成為旅伴,單從或然率黎講可能性係幾高?」三葉問。
我已經估到佢跟住落黎想問乜。

「你相唔相信命運?」
已有 0 人追稿